ផ្នែកមួយនៃបទប្បញ្ញត្តិបាល់ទាត់ថ្មីក្នុងលីគកីឡាបាល់ទាត់អង់គ្លេស អាជ្ញាកណ្តាលនឹងបូកបន្ថែមពេលវេលាពិតប្រាកដដែលបានបាត់បង់នៅក្នុងការអបអរពេលស៊ុតបាល់ចូលទី ការផ្លាស់ប្តូរកីឡាករ ឬរបួស ដើម្បីបន្ថែមម៉ោងប្រកួតបន្ត។ 
  

ជាក់ស្តែងក្នុងការប្រកួតពានរង្វាន់បើករដូវកាល Community Shield រវាងក្រុម Arsenal ទល់នឹងក្រុម Manchester City មានការបន្ថែមពេលវេលបង្គ្រប់រយៈពេល ៨នាទី។ Arsenal តាមស្មើលទ្ធផល ១-១ នាទី៩០+៧ ហើយបានឈានជើងដល់វគ្គស៊ុតបាល់កាត់សេចក្តី ១១ម៉ែត្រ លទ្ធផល ៤-១។ 
 

ការប្រកួតមួយចំនួននៅក្នុងក្របខណ្ឌទីពីររបស់អង់គ្លេស Championship ជុំទីមួយនាទីបូកបន្ថែមក្នុងការប្រកួតមានរយៈពេលដល់ទៅ ១០នាទី ឬលើសពីនេះ ក្នុងការប្រកួត។
 

Varane បានសរសេរបង្ហោះនៅលើបណ្តាញសង្គម X អតីត ​​Twitter ដោយបង្ហាញក្តីបារម្ភពីការបន្ថែមពេលវេលាកាន់តែច្រើន ស្របពេលការប្រកួតកាន់តែមមាញឹកសម្រាប់កីឡាករអាជីពសព្វថ្ងៃ។ ខ្សែការពារបារាំងរូបនេះ ចាត់ការផ្លាស់ប្តូរពេលវេលាក្នុងការប្រកួតជាសម្ពាធសម្រាប់កីឡាករ។
  

ខ្សែការពារក្រុម Manchester United រូបនេះបានអះអាងបន្ថែមទៀតថា កីឡាករទាំងអស់ចង់បានកម្លាំងពេញ ១០០ភាគរយនៅលើទីលានដើម្បីអាចផ្តល់ការប្រកួតស្ទើរតែ ១០០ភាគរយនៃកម្លាំងដើម្បីក្រុម ព្រមទាំងអ្នកគាំទ្រ។ ខ្សែការពារសញ្ជាតិបារាំងបន្ថែមទៀតថា មតិរបស់កីឡាករទាំងអស់មិនត្រូវបាន FA យកចិត្តទុកដាក់ឡើយ។
 

ក្រៅពីនេះលោក Pep Guardiola ក៏បានរិះគន់ចំៗចំពោះការផ្លាស់ប្តូរនៃការបន្ថែមពេលវេលាក្នុងការប្រកួតបែបនេះ ក្រោយក្រុមរបស់លោកបានរបូតគ្រាប់បាល់នៅក្នុងនាទីបន្ថែមបង្គ្រប់រហូតដល់ជាង ១១នាទី​ដែលបានចាញ់ក្រុម Arsenal។
 

ការប្រកួតក្នុងពានរង្វាន់ Community Shield ពេលថ្មីនេះ ក៏បានបង្ហាញអំពីច្បាប់ថ្មី ដែលក្រុមមន្ត្រីអាជ្ញាកណ្តាលបានប្រើក្នុងការប្រកួត ដោយក្នុងគោលបំណងធ្វើឱ្យប្រសើរឡើងនូវអាកប្បកិរិយារបស់កីឡាករ អ្នកចាត់ការ និងអ្នកគាំទ្រជាដើម។ តែយ៉ាងណាអ្នកចាត់ការក្រុម Arsenal លោក Mikel Arteta ត្រូវបានពិន័យកាតលឿងសម្រាប់ការតវ៉ាចំពោះការសម្រេចចិត្តរបស់អាជ្ញាកណ្តាល ដោយការបន្ថែមពេលវេលាលើសលុប៕