មន្រ្តីជាន់ខ្ពស់មកពីប្រទេសប្រមាណ ៤០ នៅសប្តាហ៍មុន បានចូលរួមកិច្ចប្រជុំថ្នាក់ទីប្រឹក្សាសន្តិសុខជាតិ និងមន្រ្តីផ្សេងទៀត នៅក្រុង Jeddah អារ៉ាប៊ីសាអូឌីត ដោយក្នុងនោះមានចិន អាម៉េរិក ឥណ្ឌា និងបណ្តាប្រទេសជាច្រើនទៀត។ 
 

តាមរយៈសេចក្តីថ្លែងការណ៍របស់អារ៉ាប៊ីសាអូឌីត កិច្ចប្រជុំស្វែងរកសន្តិភាពនៅអ៊ុយក្រែននេះ មិនមានលទ្ធផលអ្វីទេដោយបានត្រឹមតែឯកភាពបន្តកិច្ចសន្ទនាស្វែងរកសន្តិភាព។ មន្រ្តីមកពីប្រទេសប្រមាណ៤០នេះ បានយល់ព្រមរៀបចំកិច្ចប្រជុំមួយទៀត ក្នុងរយៈពេល៦សប្តាហ៍ខាងមុខ។ 

 

ទោះជាយ៉ាងណា វត្តមានចិនក្នុងកិច្ចប្រជុំនេះ ជារឿងគួរកត់សម្គាល់ព្រោះរុស្ស៊ីអវត្តមាន។ ក្រោយកិច្ចប្រជុំខាងលើ លោក វ៉ាង យី រដ្ឋមន្រ្តីការបរទេសចិន ក៏បានជជែកតាមទូរស័ព្ទជាមួយសមភាគីរុស្ស៊ី ស៊ែហ្គេយ៍ ឡាវរ៉ូវ។

 

លោក វ៉ាង ប្រាប់លោក ឡាវរ៉ូវ ថា រដ្ឋាភិបាលក្រុងប៉េកាំង នៅតែបន្តប្រកាន់យកតួនាទីមិនជ្រើសយកភាគីណាមួយឡើយ ហើយរក្សជំហរឯករាជ្យលើអ៊ុយក្រែន ដើម្បីស្វែងរកការដោះស្រាយវិបត្តិបញ្ហានយោបាយនៅប្រទេសតំបន់អឺរ៉ុបខាងកើតមួយនេះ។ 
 

បើតាមលោកវ៉ាង សំឡេងរបស់ចិន នឹងប្រកបដោយហេតុផល រួមទាំងមិនរងឥទ្ធិពលពីប្រទេសណាមួយឡើយ នៅលើឆាកអន្តរជាតិ និងចូលរួមលើកតម្កើងកិច្ចចរចាប្រកបដោយសន្តិភាព។ 

 

កន្លងមក រដ្ឋាភិបាលក្រុងប៉េកាំង មិនបានរិះគន់លើរុស្ស៊ី ក្នុងការឈ្លានពានអ៊ុយក្រែនឡើយ ដោយបានត្រឹមតែជំរុញឱ្យភាគីពាក់ព័ន្ធដោះស្រាយជម្លោះ ដោយសន្តិវិធី និងតាមរយៈតុចរចា។ មិនតែប៉ុណ្ណោះ ចិន ក៏បានស្នើផែនការស្វែងរកសន្តិភាពចំនួន ១២ចំណុចទៅអ៊ុយក្រែន និងរុស្ស៊ី ដើម្បីដោះស្រាយវិបត្តិផង។​

 

ចំណែកប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី ក៏តែងតែលើកយកពីផែនការសន្តិភាពចំនួន ១០គោលការណ៍ ដើម្បីបញ្ចប់សង្រ្គាម ដែលរុស្ស៊ីបានឈ្លានពានខ្លួនចាប់តាំងពីខែកុម្ភៈ ឆ្នាំ២០២២មក៕