ប្រេងរុស្ស៊ីដែលនាំចេញទៅឥណ្ឌាក្នុងខែមិថុនា មានតម្លៃទាបបំផុតចាប់តាំងពីសង្គ្រាមនៅអ៊ុយក្រែនបានចាប់ផ្តើមកាលពីដើមឆ្នាំមុន ដែលជាមធ្យមមានតម្លៃ៦៨,១៧ដុល្លារក្នុងមួយបារ៉ែល។ នេះបើតាមការផ្សាយរបស់ទូរទស្សន៍ Bloomberg ។
តួលេខចុងក្រោយរបស់ក្រសួងឧស្សាហកម្ម និងពាណិជ្ជកម្មឥណ្ឌាបង្ហាញថា ក្នុងខែមិថុនា ប្រេងដែលនាំចូលពីរុស្ស៊ីបូកជាមួយនឹងថ្លៃដឹកជញ្ជូនមានតម្លៃជាមធ្យម ៦៨,១៧ដុល្លារក្នុងមួយធុងប៉ារ៉ែល។ តម្លៃនេះគឺធ្លាក់ចុះពី៧០,១ដុល្លារកាលពីខែឧសភា។
នេះក៏ជាកម្រិតថ្លៃទាបបំផុតចាប់តាំងពីដើមឆ្នាំ២០២២។ តម្លៃដែលលោកខាងលិចដាក់លើប្រេងរុស្ស៊ីនាពេលបច្ចុប្បន្នគឺ ៦០ដុល្លារក្នុងមួយបារ៉ែល (មិនរាប់បញ្ចូលថ្លៃដឹកជញ្ជូន)។
ក្រោយសង្គ្រាមនៅអ៊ុយក្រែន ឥណ្ឌា និងចិនបានក្លាយជាអ្នកប្រើប្រាស់ប្រេងរុស្ស៊ីច្រើនជាងគេ ដោយសារផលិតផលនេះត្រូវបានលោកខាងលិចដាក់ទណ្ឌកម្ម ។ ក្រុមហ៊ុនទិន្នន័យ Kpler បានលើកឡើងថា ការនាំចូលប្រេងរបស់ឥណ្ឌាបានធ្លាក់ចុះក្នុងរយៈពេលពីរខែកន្លងមកនេះ។ ចំនួននេះត្រូវបានគេព្យាករថា នឹងធ្លាក់ចុះបន្តទៀតនៅពេលដែលរុស្ស៊ី កាត់បន្ថយការនាំចេញ ។
យ៉ាងណាមិញ Kpler ព្យាករថា ការនាំចូលប្រេងរបស់ឥណ្ឌាពីរុស្ស៊ីនឹងកើនឡើងម្តងទៀតចាប់ពីខែតុលា។ ឥណ្ឌាជាធម្មតាទិញប្រេងពីរុស្ស៊ីក្នុងទម្រង់ជាអ្នកលក់ដែលទទួលខុសត្រូវលើការដឹកជញ្ជូន ការធានារ៉ាប់រង និងការចំណាយផ្សេងៗផ្សេងទៀត។
យោងតាមទិន្នន័យរបស់រដ្ឋាភិបាលឥណ្ឌា តម្លៃប្រេងដែលបាននាំចូលពីអ៊ីរ៉ាក់ក្នុងខែមិថុនាគឺមានតម្លៃ ៦៧,១ដុល្លារក្នុងមួយបារ៉ែល។ ប្រេងពីអារ៉ាប៊ីសាអូឌីតមានតម្លៃខ្ពស់ជាងគឺ ៨១,៧ ដុល្លារ។ បច្ចុប្បន្នឥណ្ឌាត្រូវនាំចូល ៨៨ភាគរយនៃប្រេងដែលខ្លួនកំពុងប្រើប្រាស់ប្រចាំថ្ងៃ។
កាលពីចុងសប្តាហ៍មុន រដ្ឋមន្ត្រីប្រេង និងឧស្ម័នធម្មជាតិឥណ្ឌា Hardeep Singh Puri បាននិយាយថា ប្រេងរុស្ស៊ីមិនត្រូវបានបញ្ចុះតម្លៃច្រើនដូចឆ្នាំមុនទេ។ ឥណ្ឌាក៏បានធ្វើពិពិធកម្មប្រភពប្រឹងដែរ ដោយបានទិញពី២៧ទៅ៣៩ប្រទេសផ្សេងគ្នា។
តម្លៃប្រេងពិភពលោកបានកើនឡើងក្នុងប៉ុន្មានសប្តាហ៍ថ្មីៗនេះ នៅពេលដែលរុស្ស៊ី និងអារ៉ាប៊ីសាអូឌីតបានប្រកាសកាត់បន្ថយការផ្គត់ផ្គង់ ដើម្បីទាញទីផ្សារប្រេងកើនឡើង។ ក្នុងខែកញ្ញា អារ៉ាប៊ីសាអូឌីតបន្តកាត់បន្ថយផលិតកម្មប្រេងមួយលានបារ៉ែលក្នុងមួយថ្ងៃ ខណៈរុស្ស៊ីគ្រោងកាត់បន្ថយការនាំចេញប្រេងចំនួន ៣០០ពាន់បារ៉ែលក្នុងមួយថ្ងៃ៕