បន្ទាប់ពីរដ្ឋាភិបាលឥណ្ឌាកាលពីថ្ងៃទី ២០ ខែកក្កដាបានហាមឃាត់ការនាំចេញអង្ករប្រភេទមួយចំនួនដើម្បីគ្រប់គ្រងតម្លៃក្នុងស្រុក ពាណិជ្ជករជាច្រើនមានការព្រួយបារម្ភថាទំនិញម្ហូបអាហារផ្សេងទៀត​ អាចនឹងត្រូវហាមឃាត់ដែលនោះគឺ ស្ករ។

 

ពិភពលោកពឹងផ្អែកកាន់តែខ្លាំងឡើងលើការនាំចេញស្ករពីប្រទេសអាស៊ីខាងត្បូងមួយនេះ ខណៈដែលការផ្គត់ផ្គង់ពិភពលោកកាន់ពិបាក។ បរិមាណទឹកភ្លៀងធ្លាក់មិនគ្រប់គ្រាន់ នៅទូទាំងប្រទេសឥណ្ឌាបានបង្កការព្រួយបារម្ភពីផលិតកម្មស្ករនឹងធ្លាក់ចុះ។ ទិន្នផលស្ករបានធ្លាក់ចុះរយៈពេលពីរឆ្នាំជាប់ៗគ្នា ដែលនេះអាចកំណត់សមត្ថភាពនៃនាំចេញរបស់ឥណ្ឌា។

 

លោក Henrique Akamine ប្រធានផ្នែកស្រាវជ្រាវស្ករ និងអេតាណុលនៅ Tropical Research Service ដែលមានមូលដ្ឋាននៅប្រេស៊ីលបានឱ្យដឹងថា ការហាមឃាត់ការនាំចេញអង្ករ គឺជាសញ្ញាច្បាស់លាស់សម្រាប់រដ្ឋាភិបាលឥណ្ឌាដែលមានការព្រួយបារម្ភអំពីសន្តិសុខស្បៀង និងអតិផរណា។ 

 

លោក​បាន​បន្ត​ថា​៖ « ​ការ​ព្រួយ​បារម្ភ​នៅ​ពេល​នេះ​គឺ​ថា ​រដ្ឋាភិបាល​ប្រហែល​ជា​នឹង​ធ្វើ​តាម​និង​​អ្វី​ស្រដៀង​គ្នា​ទាក់ទង​នឹង​ស្ករ »។

 

បើតាមលោក Aditya Jhunjhunwala ប្រធានសមាគមរោងចក្រផលិតស្ករឥណ្ឌា ចម្ការអំពៅនៅក្នុងតំបន់ផលិតសំខាន់នៃរដ្ឋ Maharashtra និងរដ្ឋ Karnataka មិនមានភ្លៀងធ្លាក់គ្រប់គ្រាន់ទេក្នុងខែមិថុនា ដែលនាំឲ្យមានការព្រួយបារម្ភអំពីទិន្នផលនៅឆ្នាំនេះ។ 

 

សមាគមរំពឹងថាការផលិតស្ករសនឹងធ្លាក់ចុះ ៣,៤ភាគរយបើធៀបឆ្នាំមុនមកត្រឹម ៣១,៧លានតោនក្នុងឆ្នាំ ២០២៣-២០២៤។ យ៉ាងណាមិញលោក Jhunjhunwala បាន​បញ្ជាក់​ថា ការ​ផ្គត់​ផ្គង់​អាច​បំពេញ​តម្រូវ​ការ​ក្នុង​ស្រុកបាន។

 

ទន្ទឹមនឹងនេះ ឥណ្ឌានឹងប្រើប្រាស់ស្ករបន្ថែមទៀតសម្រាប់ជីវសាស្ត្រ។ សមាគមបានរកឃើញថារោងម៉ាស៊ីនបានបង្វែរ ៤,៥លានតោនស្ករទៅជាផលិតកម្មអេតាណុលដែលកើនឡើង ៩,៨ភាគរយធៀបនឹងឆ្នាំមុន៕