ក្នុងសុន្ទរកថាពីក្រុង Albuquerque រដ្ឋNew Mexico លោក ចូ បៃឌិន ប្រធានាធិបតីអាម៉េរិក បានបញ្ជាក់បំណងចង់បំពេញទស្សនកិច្ចនៅវៀតណាមដើម្បីកែលម្អទំនាក់ទំនងទ្វេភាគី។ 

 

«ខ្ញុំនឹងទៅវៀតណាមក្នុងពេលឆាប់ៗ ដោយសារវៀតណាមចង់ផ្លាស់ប្តូរទំនាក់ទំនង និងក្លាយជាដៃគូមួយរបស់យើង»។ លោក បៃឌិន បានបញ្ជាក់បែបនេះ នៅថ្ងៃទី៨ ខែសីហា។ សុន្ទរកថាត្រង់ចំណុចនេះ មិនត្រូវបានថតជាប់ឡើយ ប៉ុន្តែត្រូវបានបញ្ចេញដោយអ្នកសារព័ត៌មានដែលចូលរួមកម្មវិធីខាងលើ។

 

គម្រោងទស្សនកិច្ចរបស់មេដឹកនាំអាម៉េរិកនៅវៀតណាមបែបនេះ ធ្វើឡើងស្របពេលប្រទេសទាំងពីរ បានបង្កើតភាពជាដៃគូគ្រប់ជ្រុងជ្រោយរយៈពេល ១០ឆ្នាំ។ លោកបៃឌិន មិនបានបញ្ជាក់ឡើយ ថាតើលោកនឹងបំពេញទស្សនកិច្ចនៅពេលណា។ ប៉ុន្តែប្រធានាធិបតីអាម៉េរិកអាចនឹងយកឱកាសណាមួយ ក្នុងពេលចូលរួមទស្សនកិច្ចនៅកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធក្នុងខែកញ្ញា ដើម្បីធ្វើទស្សនកិច្ចនៅវៀតណាម។ 
 

ការបញ្ជាក់ក្នុងសុន្ទរកថា ធ្វើឡើងស្របពេលអាម៉េរិក កំពុងស្វះស្វែងរកការទប់នឹងការកើនឡើងឥទ្ធិពលចិននៅក្នុងតំបន់។ 

 

នៅឆ្នាំមុន លោកបៃឌិន ជាមួយមេដឹកនាំបណ្តាប្រទេសក្នុងតំបន់អាស៊ី-ប៉ាស៊ីហ្វិកផ្សេងទៀតដូចជាវៀតណាម ថៃ អូស្រ្តាលី ព្រុយណេ ឥណ្ឌា ជប៉ុន កូរ៉េខាងត្បូង និងម៉ាឡេស៊ីជាដើម បានសម្ពោធក្របខណ្ឌសេដ្ឋកិច្ចឥណ្ឌូ-ប៉ាស៊ីហ្វិក (IPEF) ក្នុងពេលបំពេញទស្សនកិច្ចនៅជប៉ុន។ ក្របខណ្ឌមួយនេះ ផ្តោតលើសសរស្តម្ភចំនួន៤ ដូចជា ការតភ្ជាប់សេដ្ឋកិច្ចជាមួយដៃគូ, ការស្តារសេដ្ឋកិច្ចឡើងវិញ,​ សេដ្ឋកិច្ចដើរដោយថាមពលស្អាត និងសេដ្ឋកិច្ចប្រកបដោយភាពត្រឹមត្រូវ។

 

សមាជិកIPEF ភាគច្រើនសុទ្ធតែមានភាពតានតឹងជាមួយចិនដូចជា អាម៉េរិក ឥណ្ឌា ជប៉ុន និងអូស្រ្តាលី ខណៈបណ្តាប្រទេសអាស៊ានមួយចំនួន មានជម្លោះជាមួយចិន នៅក្នុងសមុទ្រចិនខាងត្បូង។ 

 

សូមបញ្ជាក់ថា វៀតណាម និងអាម៉េរិក ជាដៃគូពាណិជ្ជកម្មដ៏ធំបំផុតមួយ នៅក្នុងតំបន់អាស៊ាន ដោយទំហំពាណិជ្ជកម្មទំនិញរវាងប្រទេសទាំងពីរមានចំនួន ប្រមាណ១២៧,៥ ពាន់លានដុល្លារនៅក្នុងឆ្នាំ២០២២។ វៀតណាមនាំទៅអាម៉េរិកមានទំហំ ១២៧,៥ពាន់លានដុល្លារ ខណៈអាម៉េរិកនាំចេញទៅវៀតណាមមានត្រឹម ១១,៣ពាន់លានដុល្លារប៉ុណ្ណោះ៕