រយៈពេលជាង៨ខែហើយ ដែលយុវជនរូបនេះ បានចំណាយពេលក្នុងបង្ហាត់បង្រៀនជំនាញសំខាន់ៗដូចជាលេខនព្វន្ត រៀនអក្សរ ភាសាបរទេស ការថែរក្សាបរិស្ថាន ការរស់នៅមានអនាម័យ ​ក៏ដូចជាសុជីវធម៌នៃការរស់នៅជាដើម ​ដល់កុមារក្រៅសាលានៅក្នុងសហគមន៍ និងកុមារតាមសាលារៀនរដ្ឋ ដែលត្រូវការបំប៉នបន្ថែម។ 

 

 

ថ្នាក់បំប៉នចល័តដែលយុវជនស្ម័គ្រចិត្តរូបនេះ​ បង្កើតឡើង គឺនៅតាមវត្តអារាម ក្រោមដើមឈើ នៅវាលស្រែ និងនៅតាមផ្ទះរបស់កុមារក្រៅសាលា​តែម្តង​។ 

 

សម្រាប់ យុវជន ស្វាយ ឧត្តម រូបគេពិតជាសប្បាយចិត្តដែលបានមើលឃើញពីការផ្លាស់ប្តូរ ឥរិយាបថ និងការយកចិត្តទុកដាក់សិក្សាឡើងវិញរបស់កុមារដែលរូបគេបានបំប៉ន។ ក្នុងនាមជាយុវជនស្ម័គ្រចិត្តមួយរូបក្នុងវិស័យអប់រំ ស្វាយ ឧត្តម ចង់​ឃើញកុមារក្រៅសាលា អាចទទួលបានការសិក្សាពេញលេញ ហើយក្លាយជាយុវជនដ៏មានសក្តានុពលសម្រាប់សហគមន៍នាពេលអនាគត៕