អន្តរជាតិ
ចិនអះអាងថា សេដ្ឋកិច្ចរបស់ខ្លួននៅតែជាក្បាលម៉ាស៊ីនសំខាន់សម្រាប់កំណើនពិភពលោក
× ក្រុងប៉េកាំងអះអាងថា សេដ្ឋកិច្ចរបស់ខ្លួននៅតែជាក្បាលម៉ាស៊ីនដ៏សំខាន់សម្រាប់កំណើនសេដ្ឋកិច្ចពិភពលោក។ មហាអំណាចទី២មួយនេះ ក៏បានច្រានចោលចំពោះការអះអាងទាំងឡាយណាដែលថាការធ្លាក់ចុះកំណើនសេដ្ឋកិច្ចរបស់ចិនអាចបង្កហានិភ័យដល់សេដ្ឋកិច្ចពិភពលោក។
ថ្លែងក្នុងសន្និសីទព័ត៌មាននៅទីក្រុងប៉េកាំងនៅថ្ងៃទី១៦ ខែសីហា អ្នកនាំពាក្យក្រសួងការបរទេសចិន Wang Wenbin បាននិយាយថា សេដ្ឋកិច្ចរបស់ចិននៅតែបន្តងើបឡើងវិញ និងឆ្ពោះទៅរកភាព ប្រសើរឡើងជាធម្មតា។ ទិន្នន័យពីការិយាល័យស្ថិតិជាតិ (NBS) បានបង្ហាញនៅក្នុងខែកក្កដាថា ផលិតផលក្នុងស្រុកសរុប (GDP) របស់ចិនបានកើនឡើង៥,៥ភាគរយក្នុងឆមាសទីមួយនៃឆ្នាំ ២០២៣ ។
លោក Wang បញ្ជាក់ផងដែរថា ចំនួននេះក៏ខ្ពស់ជាងអត្រាកំណើនប្រចាំឆ្នាំជាមធ្យមរបស់ចិន៤,៥ ភាគរយក្នុងអំឡុងពេលបីឆ្នាំនៃជំងឺរាលដាលកូវីដ-១៩ ហើយច្រើនជាង៣ភាគរយនៃអត្រាកំណើនផលិតផលក្នុងស្រុកសរុបរបស់អាម៉េកនៅក្នុងឆមាសទីមួយក្នុងឆ្នាំនេះផងដែរ។
«ចិនកំពុងជំរុញការអភិវឌ្ឍប្រកបដោយគុណភាពខ្ពស់នៃសេដ្ឋកិច្ចដោយមានចំណុចខ្លាំងទាំងគុណភាព និងបរិមាណ»។ លោក Wang សង្កត់ធ្ងន់បែបនេះ រួចបន្តថា នៅក្នុងរបាយការណ៍ទស្សនវិស័យសេដ្ឋកិច្ចពិភពលោកចុងក្រោយរបស់មូលនិធិរូបិយវត្ថុអន្តរជាតិ បង្ហាញកាលពីខែកក្កដា សេដ្ឋកិច្ចរបស់ចិនត្រូវបានព្យាករណ៍នឹងកើនឡើង៥,២ភាគរយសម្រាប់ឆ្នាំ២០២៣ ហើយនឹងរួមចំណែកមួយភាគបីទៅកាន់កំណើនពិភពលោកនៅឆ្នាំ២០២៣។
កត្ដាដែលជំរុញកំណើនសេដ្ឋកិច្ចរបស់ចិនគឺ ការប្រើប្រាស់ជាក់ស្ដែងរបស់ប្រជាជន។ លើសពីនេះ អត្រារួមចំណែកនៃតម្រូវការក្នុងស្រុកចំពោះកំណើនសេដ្ឋកិច្ចចិនបានឈានដល់១១០,៨ភាគរយក្នុងរយៈពេលប្រាំមួយខែដំបូងក្នុងឆ្នាំ២០២៣ ដែលជាការកើនឡើងចំនួន៥៩,៤ភាគរយ។ ឯអត្រារួមចំណែកនៃការប្រើប្រាស់ចុងក្រោយបានកើនឡើងដល់៧៧,២ភាគរយ៕
© រក្សាសិទ្ធិដោយ thmeythmey.com