អន្តរជាតិ
នាវាចម្បាំងដ៏ធំបំផុតរបស់អូស្ត្រាលី ចូលរួមសមយុទ្ធនៅហ្វីលីពីន
× នាវាចម្បាំងដ៏ធំបំផុតរបស់អូស្ត្រាលីបានចូលរួមក្នុងសមយុទ្ធរួមគ្នាជាមួយហ្វីលីពីន និងអាម៉េរិកនៅសមុទ្រចិនខាងត្បូងនាថ្ងៃទី២១ ខែសីហា ដែលធ្វើឡើងស្របពេលដែលអាម៉េរិក និងដៃគូរបស់ខ្លួនពង្រឹងទំនាក់ទំនងផ្នែកការពារជាតិចំពោះមុខវត្តមានយោធាចិនដែលកំពុងកើនឡើងនៅក្នុងតំបន់។
នាវា HMAS Canberra ជានាវាមួយក្នុងចំណោមនាវាជាច្រើនដែលចូលរួមក្នុងការធ្វើសមយុទ្ធយោធា Alon នៅហ្វីលីពីន។ Alon ជាភាសាតាកាឡុករបស់ហ្វីលីពីនដែលមានន័យថារលក។ ក្នុងសមយុទ្ធនេះ ទាហានជាង២,០០០នាក់មកពីអូស្ត្រាលី និងហ្វីលីពីនចូលរួមក្នុងសមយុទ្ធផ្លូវអាកាស សមុទ្រ និងផ្លូវ គោកចាប់ពីថ្ងៃទី១៤ ដល់ថ្ងៃទី៣១ខែសីហា។ ទាហានជើងទឹកអាម៉េរិក ប្រហែល១៥០នាក់ក៏ចូលរួមដែរ។
សមយុទ្ធនេះ ធ្វើឡើងនៅភាគខាងត្បូងនៃកោះ Palawan របស់ហ្វីលីពីន ស្ថិតនៅចម្ងាយប្រហែល២០០គីឡូម៉ែត្រពីប្រជុំកោះ Spratlys ដែលជាទីប្រទាញប្រទង់រវាងទីក្រុងម៉ានីល និងទីក្រុងប៉េកាំង។
«ដូចហ្វីលីពីនដែរ អូស្ត្រាលីចង់បានតំបន់សន្តិភាព ស្ថិរភាព និងវិបុលភាពដែលគោរព អធិបតេយ្យភាព និងដែលត្រូវបានដឹកនាំដោយច្បាប់»។ អគ្គរដ្ឋទូតអូស្ត្រាលីប្រចាំទីក្រុង ម៉ានីល លោកស្រី Hae Kyong Yu បានថ្លែងនៅឯតំបន់Tarumpitao Point Airfield បែបនេះ។
មេបញ្ជាការនាវាអូស្ត្រាលី លោកស្រី Phillipa Hay បានប្រាប់អ្នកយកព័ត៌មាននៅលើនាវា HMAS Canberra ថា ការចូលរួមនេះស្ថិតក្នុងគម្រោងជាយូរមកហើយ ហើយវាជារឿងធម្មតាក្នុងការហ្វឹកហាត់ជាមួយដៃគូ។
សមយុទ្ធនេះកើតឡើងបន្ទាប់ពីនាវាល្បាតចិនរារាំងការផ្គត់ផ្គង់របស់ហ្វីលីពីនទៅកាន់កោះ Second Thomas Shoal ដែលជាផ្នែកមួយនៃប្រជុំកោះ Spratlys កាលពីថ្ងៃទី៥ ខែសីហាដែលបង្កឱ្យមានជម្លោះការទូតមួយប្រាវទៀត។ យោធាហ្វីលីពីន បាននិយាយថា ខ្លួននឹងបញ្ជូនការផ្គត់ផ្គង់នេះដដែល៕
Tag:
អូស្ត្រាលី
ហ្វីលីពីន
© រក្សាសិទ្ធិដោយ thmeythmey.com