គណបក្សឆ្ពោះទៅមុខដែលដឹកនាំដោយលោក Pita បានឈ្នះឆ្នោតកាលពីខែឧសភាកន្លងទៅ។ ប៉ុន្តែលោកមិនបានក្លាយជានាយករដ្ឋមន្ត្រីទេ ដោយហេតុតែសមាជិកព្រឹទ្ធសភាភាគច្រើនមិនបានបោះឆ្នោតឱ្យ ព្រោះបក្សនេះមានបំណងកែប្រែច្បាប់ប្រមាថព្រះមហាក្សត្រ។ 

 

ក្នុងបទសម្ភាសន៍ជាមួយទូរទស្សន៍សិង្ហបុរី CNA លោក Pita បានលោកពីទស្សនៈ អតីនាយករដ្ឋមន្រ្តីសិង្ហបុរី លោក លី ខ្វាន់យូ ថា ៖ « មានតែការតស៊ូឥតឈប់ឈរ ដើម្បីធ្វើឱ្យកើតឡើង នោះហើយគឺជាភាពជាអ្នកដឹកនាំ »។ 

 

លោកបន្តថា ស្ថានភាពនយោបាយថៃបច្ចុប្បន្ន​អាចសង្ខេបមកត្រឹម២ឬ៣ពាក្យនោះគឺ របបផ្តាច់ការភាគច្រើន ។ ទោះបីមិនបានក្លាយជានាយករដ្ឋមន្ត្រី លោក Pita មិនមានការសោកស្តាយអ្វីនោះឡើយ ហើយលោកបានសម្លឹងនូវចក្ខុវិស័យវែងឆ្ងាយពីការដឹកនាំប្រជាធិបតេយ្យផ្លាស់ប្តូរសង្គមថៃ។ 

 

ការធ្វើជានាយករដ្ឋមន្ត្រីគឺជាជំហានមួយដែលនាំមកនូវការផ្លាស់ប្តូរនៅក្នុងប្រទេសថៃ ហើយគោលបំណងធំបំផុតរបស់ខ្ញុំគឺក្លាយជាមេដឹកនាំដែលមិនជម្លោះនៅក្នុងសង្គមប្រជាធិបតេយ្យថៃ។ នេះជាការអះអាងរបស់លោក Pita ។ 

 

ជុំវិញសំណួរថាតើលោក Pita នឹងមានការទទួលខុសត្រូវយ៉ាងណាចំពោះម្ចាស់ឆ្នោត មេដឹកនាំបក្សឆ្ពោះទៅមុខរូបនេះបានបញ្ជាក់ថា ៖« ខ្ញុំបានឈ្នះ ប៉ុន្តែខ្ញុំត្រូវបានដកបេក្ខភាព ខ្ញុំមិនបានចុះចាញ់ទេ »។ 
 

ទោះបីក្លាយជាមេដឹកនាំប្រឆាំង ក៏លោកអាចធ្វើច្បាប់ បង្កើតច្បាប់ ត្រួតពិនិត្យពីតុល្យភាពនៅក្នុងសភា ដើម្បីជួយសង្គមថៃទោះស្ថិតនៅក្នុងតំណែងអ្វីក៏ដោយ ។
 

យ៉ាងណាមិញ ទោះបីមិនបានកាន់តំណែងនាពេលនេះ មេដឹកនាំរូបនេះជឿជាក់ថានឹងអាចកាន់តួនាទីកំពូលមួយនេះនៅពេលក្រោយ។ « ខ្ញុំទើបតែ ៤២ឆ្នាំ ខ្ញុំអាចរង់ចាំបាន នយោបាយប្រៀបដូចជាការរត់ម៉ារ៉ាតុង »។ 

 

នៅថ្ងៃទី២២ ខែសីហា សភាថៃបានបោះឆ្នោតគាំទ្របេក្ខភាពមកពីបក្សភឿ លោក Srettha Thavisin​ ជានាយករដ្ឋមន្រ្តីថៃជាផ្លូវការ៕