អន្តរជាតិ
ឥណ្ឌា នឹងហាមឃាត់ការនាំចេញស្ករសជាលើកដំបូងក្នុងរយៈពេល៧ឆ្នាំ
× ឥណ្ឌា នឹងហាមឃាត់ការនាំចេញស្ករសក្នុងរដូវបន្ទាប់ចាប់ពីខែតុលាតទៅ ដែលជាការរឹតត្បិតជាលើកដំបូងក្នុងរយៈពេលប្រាំពីរឆ្នាំដោយសារកង្វះទឹកភ្លៀងដែលបានកាត់បន្ថយទិន្នផលអំពៅ។
អវត្តមានស្ករសរបស់ឥណ្ឌាពីទីផ្សារពិភពលោក ទំនងជានឹងបង្កើនតម្លៃគោលស្ករសនៅទីក្រុងញូវយ៉ក និងទីក្រុងឡុងដ៍ដែលពឹងផ្អែកខ្លាំងលើឥណ្ឌាអស់ពេលជាច្រើនឆ្នាំ ហើយក៏បង្កឱ្យមានការភ័យខ្លាចដល់អតិផរណាបន្ថែមទៀតលើទីផ្សារអាហារពិភពលោក។
«ការផ្តោតសំខាន់របស់យើងគឺបំពេញតម្រូវការស្ករក្នុងស្រុក និងផលិតអេតាណុលពីអំពៅដែលលើសចំនួន»។ ប្រភពរដ្ឋាភិបាលបានបញ្ជាក់បែបនេះរួចបន្តថា សម្រាប់រដូវកាលខាងមុខ ឥណ្ឌានឹងមិនមានស្ករគ្រប់គ្រាន់សម្រាប់បែងចែកដល់ចំនួនកំណត់ក្នុងការនាំចេញឡើយ។ នេះបើតាមទីភ្នាក់ងារព័ត៌មាន Reuters ។
សព្វថ្ងៃ ឥណ្ឌាបានអនុញ្ញាតឱ្យរោងម៉ាស៊ីននាំចេញស្ករសត្រឹមតែ៦,១លានតោនក្នុងរដូវប្រមូលផលបច្ចុប្បន្នដែលគិតដល់ថ្ងៃទី៣០ ខែកញ្ញា។ នារដូវកាលមុន ឥណ្ឌាលក់បាន១១,១លានតោន។
បម្រែបម្រួលអាកាសធាតុ ជាកត្តាចម្បងដែលនាំដល់ការរឹតត្បិតនេះ។ នាយកដ្ឋានទិន្នន័យអាកាសធាតុឥណ្ឌា អះអាងថា ភ្លៀងមូសុងធ្លាក់នៅរដ្ឋភាគខាងលិច Maharashtra និងរដ្ឋភាគខាងត្បូង Karnataka ដែលរូមបញ្ចូលគ្នាមានផ្ទៃដីដាំអំពៅធំជាងគេ និងផ្ដល់ទិន្នផលច្រើនជាងពាក់កណ្តាលនៃផលិតកម្មស្ករសរុបរបស់ឥណ្ឌាបានធ្លាក់ចុះដល់ទៅ៥០ភាគរយក្រោមមធ្យមភាគ។
លើសពីនេះ ឥណ្ឌាក៏បារម្ភពីអតិផរណាម្ហូបអាហារដែរ ហើយការកើនឡើងនៃតម្លៃស្ករនាពេលថ្មីៗនេះទាញចុះលទ្ធភាពនៃការនាំចេញថែមទៀត។ អតិផរណាលក់រាយនៅក្នុងឥណ្ឌាបានកើនឡើងដល់កម្រិតខ្ពស់រយៈពេល១៥ខែ ដល់ទៅ៧,៤៤ភាគរយនៅក្នុងខែកក្កដា ហើយអតិផរណាម្ហូបអាហារដល់១១,៥ភាគរយ ដែលជាកម្រិតខ្ពស់បំផុតក្នុងរយៈពេលបីឆ្នាំ៕
© រក្សាសិទ្ធិដោយ thmeythmey.com