នាជំនួបពិភាក្សាថ្ងៃទី២៨ ខែសីហា លោក ផាម មិញជិញ បានលើកឡើងថា ដំណើរទស្សនកិច្ចរបស់នាយករដ្ឋមន្ត្រីសិង្ហបុរីមានអត្ថន័យធំធេងក្នុងបរិបទដែលប្រទេសទាំងពីរប្រារព្ធខួប ៥០ឆ្នាំនៃទំនាក់ទំនងការទូត និង១០ឆ្នាំនៃការបង្កើតទំនាក់ទំនងដៃគូយុទ្ធសាស្ត្រ ។

 

លោក​ លី សៀនឡុង មានការពេញចិត្តចំពោះការអភិវឌ្ឍន៍ទំនាក់ទំនងវៀតណាម-សិង្ហបុរីនាពេលកន្លងមកដោយសង្កត់ធ្ងន់ថា វៀតណាមជាដៃគូយុទ្ធសាស្ត្រសំខាន់របស់សិង្ហបុរីក្នុងតំបន់។ នេះបើតាមសារព័ត៌មានវៀតណាម VnExpress ។

 

មេដឹកនាំទាំងពីរបានវាយតម្លៃថា ទំនាក់ទំនងរវាងប្រទេសទាំងពីរបន្តអភិវឌ្ឍយ៉ាងឆាប់រហ័ស។  នាឱកាសជំនួបនេះ នាយករដ្ឋមន្ត្រីវៀតណាមបានស្នើសិង្ហបុរី បង្កើតលក្ខខណ្ឌដើម្បីបង្កើនការនាំចូលផលិតផលវៀតណាម អភិវឌ្ឍន៍ និងប្រែក្លាយសួនឧស្សាហកម្មប្រពៃណីវៀតណាម - សិង្ហបុរី (VSIP) ទៅជាសួនឧស្សាហកម្មឆ្លាតវៃ ពង្រីកការវិនិយោគវិនិយោគលើវិស័យសំខាន់ៗ និងក្នុងក្រុមអាទិភាពរបស់វៀតណាម។  

 

ទន្ទឹមនេះ លោក ផាម មិញជិញ ចង់ឱ្យសិង្ហបុរីជួយឧបត្ថម្ភវៀតណាមក្នុងការអភិវឌ្ឍន៍ឧស្សាហកម្មដូចជា វាយនភណ្ឌ កែច្នៃគ្រឿងសង្ហារិម ការសាងសង់ចំណតនាវា ការអភិវឌ្ឍន៍ហេដ្ឋារចនាសម្ព័ន្ធឧស្សាហកម្ម គីមី ឥន្ធនៈ និងឧស្ម័នធម្មជាតិ។

 

លើសពីនេះ វៀតណាមក៏បានស្នើឱ្យសិង្ហបុរីដំណើរការមជ្ឈមណ្ឌលទិន្នន័យដ៏ធំមួយ ដើម្បីលើកកម្ពស់ប្រសិទ្ធភាពក្នុងការប្រយុទ្ធប្រឆាំងនឹងឧក្រិដ្ឋកម្ម ជាពិសេសឧក្រិដ្ឋកម្មបច្ចេកវិទ្យាខ្ពស់ ជំរុញការតភ្ជាប់ប្រព័ន្ធរបស់វៀតណាមជាមួយប្រព័ន្ធកំណត់អត្តសញ្ញាណអេឡិចត្រូនិកនៅសិង្ហបុរី ដើម្បីបង្កើតលក្ខខណ្ឌអំណោយផលបន្ថែមទៀតសម្រាប់ប្រជាពលរដ្ឋនៃប្រទេសទាំងពីរក្នុងដំណើរការទៅមក រស់នៅ និងធ្វើការ។

 

ភាគីទាំងពីរបានឯកភាពពង្រឹងកិច្ចសហប្រតិបត្តិការលើវិស័យការពារជាតិ និងសន្តិសុខ ដោយជំរុញការចុះហត្ថលេខា និងអនុវត្តប្រកបដោយប្រសិទ្ធភាពនៃកិច្ចព្រមព្រៀងសហប្រតិបត្តិការជំរុញការសន្ទនា ការសម្របសម្រួលបណ្តាយន្តការ និងសកម្មភាពពហុភាគី។

 

ក្រោយបញ្ចប់កិច្ចប្រជុំ ភាគីទាំងពីរបានចុះហត្ថលេខាលើឯកសារចំនួន ៧ ដូចជា ទេពកោសល្យសម្រាប់ការច្នៃប្រឌិត ការអភិវឌ្ឍជំនាញ ការអប់រំ ការអភិវឌ្ឍន៍ហេដ្ឋារចនាសម្ព័ន្ធប្រកបដោយនិរន្តរភាព និងសេដ្ឋកិច្ចរួម​ទាំង​លិខិត​ផ្លាស់​ប្តូរ​ស្តី​ពី​ការ​ធ្វើ​ឱ្យ​ប្រសើរ​ឡើង​នូវ​កិច្ច​ព្រម​ព្រៀង​ក្រប​ខណ្ឌ​​ការ​តភ្ជាប់​សេដ្ឋកិច្ច​ទាំង​ពីរ​វៀត​ណាម​-សិង្ហបុរី។

 

វៀតណាម និងសិង្ហបុរីបានបង្កើតទំនាក់ទំនងការទូតនៅឆ្នាំ ១៩៧៣ និងលើកកំពស់ទំនាក់ទំនងទៅជាដៃគូយុទ្ធសាស្ត្រក្នុងឆ្នាំ ២០១៣។ សិង្ហបុរីជាដៃគូសេដ្ឋកិច្ចឈានមុខគេរបស់វៀតណាមនៅក្នុងតំបន់។ វៀតណាមជាដៃគូពាណិជ្ជកម្មធំជាងគេទី ១២ របស់សិង្ហបុរី ហើយសិង្ហបុរីជាដៃគូពាណិជ្ជកម្មធំជាងគេទី ១៥ របស់វៀតណាម។

 

សិង្ហ​បុរី ​នាំមុខ​អាស៊ាន និង​ជាប់​ចំណាត់ថ្នាក់​លេខ​២​ក្នុង​ពិភពលោក​ក្នុង​វិស័យ​ទុនវិនិយោគ​នៅ​វៀតណាម​ជាមួយនឹង​គម្រោង​ចំនួន ៣២៧៣គម្រោងដែល​មាន​ដើមទុន​សរុប ៧៣,៤​ពាន់​លាន​ដុល្លារ​។ ទំហំពាណិជ្ជកម្មសរុបរវាងវៀតណាម និងសិង្ហបុរីក្នុងឆ្នាំ២០២២ នឹងឈានដល់ប្រហែល ៩,១៥ពាន់លានដុល្លារកើនឡើង ១១,៥៧ភាគរយបើធៀបនឹងឆ្នាំ ២០២១៕