ក្នុងដំណើរទស្សនកិច្ចទៅកាន់ទីក្រុងប៉េកាំងនាថ្ងៃទី៣០ ខែសីហា រដ្ឋមន្ត្រីការបរទេសអង់គ្លេស លោក James Cleverly បានលើកឡើងពីការព្រួយបារម្ភអំពីកំណត់ត្រាសិទ្ធិមនុស្សរបស់ចិន តែក៏មិនភ្លេចរិះរកមធ្យោបាយសម្រាប់ប្រទេសទាំងពីរក្នុងការប្រាស្រ័យទាក់ទងគ្នាកាន់តែប្រសើរឡើង។
ដំណើរទស្សនកិច្ចជាលើកដំបូងរបស់រដ្ឋមន្ត្រីការបរទេសអង់គ្លេសទៅកាន់ចិនក្នុងរយៈពេលជាងប្រាំឆ្នាំធ្វើឡើងស្របពេលទំនាក់ទំនងប្រទេសទាំង២ធ្លាក់ចុះដោយសារបញ្ហាជាបន្តបន្ទាប់រួមទាំងការរិះគន់លើសេរីភាពរបស់ក្រុងហុងកុងដែលជាអតីតអាណានិគមរបស់អង់គ្លេស បញ្ហាជនភាគតិចមូស្លីមតំបន់ស៊ីនជាំង ការគាំទ្ររបស់ចិនចំពោះរុស្ស៊ី និងទំនាក់ទំនងសន្តិសុខជិតស្និទ្ធរបស់អង់គ្លេសជាមួយអាម៉េរិក។
នៅប៉េកាំង លោក James Cleverly បានជួបជាមួយរដ្ឋមន្ត្រីការបរទេសចិន វ៉ាង យី និងអនុប្រធានាធិបតីចិន ហាន ចឹង Han ក្នុងដំណើរទស្សនកិច្ចមួយថ្ងៃ។ អ្នកការទូតប្រទេសទាំង២ បាន គូសបញ្ជាក់អំពីសារសំខាន់នៃកិច្ចសន្ទនារវាងប្រទេសទាំងពីរទោះបីជាមានភាពជូរចត់ក្នុងទំនាក់ទំនងក្នុងប៉ុន្មានឆ្នាំថ្មីៗនេះក៏ដោយ។
«កិច្ចសន្ទនា និងកិច្ចសហប្រតិបត្តិការ ជាពាក្យគន្លឹះនិងជាសំឡេងសំខាន់នៃគោលនយោបាយរបស់ចិនចំពោះចក្រភពអង់គ្លេស»។ លោក វ៉ាង បានលើកឡើងបែបនេះតែក៏ទទួលស្គាល់ថា ពីមួយពេលទៅមួយពេលមានបញ្ហារំខានខ្លះៗនៅក្នុងទំនាក់ទំនងចិន-អង់គ្លេស ខណៈដែលកិច្ចសហប្រតិបត្តិការរវាងចិន និងអង់គ្លេសអាចមានផលប៉ះពាល់ជាសកលថែមទៀត។
ឯលោក Cleverly បាននិយាយថា វាជារឿងសំខាន់បំផុតក្នុងការថែរក្សាទំនាក់ទំនងជាមួយទីក្រុងប៉េកាំងដើម្បីជៀសវាងការយល់ច្រឡំ។
«វាជារឿងសំខាន់ដែលប្រទេសដូចជាពួកយើងជួប និងនិយាយទល់មុខគ្នា ទៀងទាត់ដើម្បីបង្កើនការយល់ដឹង ជៀសវាងការយល់ច្រឡំ និងដោះស្រាយបញ្ហាប្រឈម និងភាពខុសគ្នាដែលមាននៅក្នុងទំនាក់ទំនងទ្វេភាគី»។ លោក Cleverly លើកឡើងបែបនេះក្រោយជំនួបជាមួយអនុប្រធានាធិបតីចិន។ ប្រមុខការទូតអង់គ្លេស ក៏បានសន្ទនាលើផ្នែកជាច្រើនជាមួយតំណាងជាន់ខ្ពស់របស់រដ្ឋាភិបាលចិន ហើយក៏បានលើកឡើងពីបញ្ហាសិទ្ធិមនុស្សនៅក្នុងរាល់ការប្រជុំទាំងអស់ ហើយលោកនឹងបន្តធ្វើដូច្នេះទៀត។
នៅពេលសួរអំពីដំណើរទស្សនកិច្ចរបស់លោក Cleverly ក្នុងសន្និសីទសារព័ត៌មានប្រចាំថ្ងៃនៅថ្ងៃដដែលនោះ អ្នកនាំពាក្យក្រសួងការបរទេសចិន លោក Wang Wenbin បាននិយាយថា ក្នុងនាមជាសមាជិកអចិន្ត្រៃយ៍ពីរក្នុងចំណោមសមាជិកអចិន្ត្រៃយ៍ទាំងប្រាំនៃក្រុមប្រឹក្សាសន្តិសុខអង្គការសហប្រជាជាតិ និងប្រទេសសេដ្ឋកិច្ចធំៗ ចិននិងអង់គ្លេសគួរតែផ្តល់តួនាទីរួមគ្នាក្នុងការលើកកម្ពស់សន្តិភាពពិភពលោក ស្ថិរភាព និងការអភិវឌ្ឍ។
ទោះជាយ៉ាងណាក៏ដោយ លោកបានបន្ថែមថា បញ្ហាទាក់ទងនឹងហុងកុង និងស៊ីនជាំងជាកិច្ចការផ្ទៃក្នុងរបស់ចិនសុទ្ធសាធ ហើយគ្មានប្រទេសណាមួយគួរជ្រៀតជ្រែកឡើយ។
ដំណើរទស្សនកិច្ចរបស់លោក Cleverly ក៏បានកើតឡើងនៅពេលគណៈកម្មាធិការកិច្ចការបរទេសសភាអង់គ្លេសបានចេញផ្សាយរបាយការណ៍ដែលហៅសកម្មភាពរបស់បក្សកុម្មុយនិស្តចិនជាការគំរាមដល់ចក្រភពអង់គ្លេស និងផលប្រយោជន៍របស់ខ្លួន៕