ក្រសួងពាណិជ្ជកម្មចិន បានចេញរបាយការណ៍លទ្ធផលជំនួបរវាងលោក Wang Wentao រដ្ឋមន្រ្តីពាណិជ្ជកម្មចិន និងសមភាគីអាម៉េរិក Gina Raimondo ដែលទើបបញ្ចប់ដំណើរទស្សនកិច្ចនៅចិន។ ដ្បិតមិនមានលទ្ធផលអ្វីធំដុំ កិច្ចសន្ទនារវាងលោកស្រី Raimondo ជាមួយមេដឹកនាំកំពូលៗរបស់​ចិន​បានបញ្ចប់ដោយសញ្ញាសុទិដ្ឋិនិយមមួយចំនួនដែរ។

 

ទាក់ទងជំនួបទ្វេភាគីរវាងលោក Wang និងលោកស្រី Gina អ្នកនាំពាក្យក្រសួងពាណិជ្ជកម្មចិន អះអាងថា ភាគីចិនបានរិះគន់អាម៉េរិកក្នុងការដាក់សម្ពាធលើអាជីវកម្មចិនដែលកំពុងដំណើរការនៅ​អាម៉េរិក។

 

«ចិនទាមទារឱ្យអាម៉េរិកផ្តល់ការគ្រប់គ្រងស្មើៗគ្នាដល់សហគ្រាសចិនដែលវិនិយោគនៅអាម៉េរិក​ក្នុង​លក្ខខណ្ឌនៃការទទួលបានទីផ្សារ ការអនុវត្តបទប្បញ្ញត្តិ លទ្ធកម្មសាធារណៈ និង​ការ​គាំទ្រ​ផ្នែកគោល​នយោបាយ»។ អ្នក​នាំពាក្យ​ក្រសួង​ពាណិជ្ជកម្ម​ចិន លោកស្រី Shu Jueting​ បញ្ជាក់បែបនេះក្នុងសន្និសីទសារព័ត៌មានថ្ងៃទី៣១ ខែសីហា រួចបន្តថា ​ចិន​ព្រួយ​បារម្ភ​យ៉ាង​ខ្លាំង​ទាក់​ទង​នឹង​ការ​រើសអើង​ផ្នែកពន្ធ​របស់​អាម៉េរិក។

 

ទោះជាយ៉ាងណាក៏ដោយ ក្រុងប៉េកាំងជឿជាក់ថាមធ្យោបាយល្អប្រសើរជាងមុនដើម្បីកាត់បន្ថយ​ហានិភ័យគឺធ្វើឱ្យទំនាក់ទំនងសេដ្ឋកិច្ច និងពាណិជ្ជកម្មចិន-អាម៉េរិក ត្រលប់ទៅដំណាក់កាល​នៃ​ការ​អភិវឌ្ឍដោយរឹងមាំ និងមានស្ថិរភាព។

 

ដំណើរទស្សកិច្ចរបស់រដហឋមន្រ្តីពាណិជ្ជកម្មអាម៉េរិកមានគោលបំណងពង្រឹងខ្សែទំនាក់ទំនង​ជាពិសេសក្នុងវិស័យសេដ្ឋកិច្ច និងការពារជាតិ សំដៅធានាថាការប្រឈមមុខរវាងប្រ​ទេស​មហា​អំណាចទាំង២ មិនអាចទៅផុតពីការគ្រប់គ្រងឡើយ។ លោក Wang និង លោកស្រី Raimondo បាន​យល់ព្រមជួបគ្នាយ៉ាងហោចណាស់ម្តងក្នុងមួយឆ្នាំដើម្បី​បន្ដការពិភាក្សាលើបញ្ហា​ពាណិជ្ជកម្ម​នេះ​។

 

គួររំលឹកថា មហាអំណាចសេដ្ឋកិច្ចទាំង២ ធ្លាប់ជាដៃគូពាណិជ្ជកម្មធំជាងគេបង្អស់រៀងៗខ្លួន ប៉ុន្តែ​រង្គោះ​រង្គើដោយសារតែជម្លោះពាណិជ្ជកម្មទាំងទងនឹង​ពន្ធដែលបានផ្ទុះឡើងអំឡុង​រដ្ឋបាល​ប្រធានាធិប​តី​ ដូណាល់ ត្រាំ ។ ចាប់តាំងពីពេលនោះមក ប្រធានាធិបតីអាម៉េរិក ចូ បៃឌិន និង​សម្ព័ន្ធ​មិត្ត​របស់​អាម៉េរិក​មួយចំនួនទៀត ចាប់ផ្ដើមរឹតបន្តឹងការនាំចេញទៅកាន់ចិន។
 

បច្ចុប្បន្ននេះ ចិនកំពុងធ្វើពាណិជ្ជកម្មកាន់តែច្រើនជាមួយអាស៊ីអាគ្នេយ៍ ខណៈអាម៉េរិកក៏ងាកទៅរកស៊ី​ជាមួយប្រទេសជិតខាងដូចជាកាណាដា និងម៉ិកស៊ិក៕