សេដ្ឋកិច្ចអន្តរជាតិ
អន្តរជាតិ
ប្រធានាធិបតីហ្វីលីពីនប្រកាសកំណត់តម្លៃអង្ករក្នុងស្រុក
× ប្រធានាធិបតីហ្វីលីពីន Ferdinand Marcos Jr. បានប្រកាសកំណត់ពិដានតម្លៃអង្ករ ក្នុងបរិបទនៃការឡើងថ្លៃខ្ពស់ចំពោះតម្លៃលក់រាយ ស្របពេលដែលអតិផរណាបានកើនឡើងវិញ។
ប្រធានាធិបតីហ្វីលីពីនបានចេញក្រឹត្យមួយ នៅថ្ងៃទី៣១ ខែសីហា ដោយកំណត់ថា តម្លៃអង្ករធម្មតាដែលអាចលក់លើទីផ្សារបានត្រឹមតែតម្លៃ៤១ប៉េសូ (០,៧២ដុល្លារ) ក្នុងមួយគីឡូក្រាមប៉ុណ្ណោះ ខណៈអង្ករល្អអាចលក់ក្នុងតម្លៃ៤៥ប៉េសូ(០,៨ដុល្លារ) ។ ក្រឹត្យនេះចូលជាធរមានភ្លាមៗ។
កាលពីមុន អង្ករទាំងពីរប្រភេទនេះ លក់បានថ្លៃជាងតម្លៃបានកំណត់ខាងលើ២៤ភាគរយ និង២៤ភាគរយរៀងគ្នា ។ នេះបើយោងតាមទិន្នន័យពីក្រសួងកសិកម្មហ្វីលីពីន។
ការកើនឡើងយ៉ាងឆាប់រហ័សនៃតម្លៃអង្ករអាចបណ្តាលឱ្យអតិផរណាកើនឡើងម្តងទៀត បន្ទាប់ពីបានធ្លាក់ចុះដល់កម្រិតទាបរយៈពេល ១៦ខែកាលពីខែកក្កដា។ បច្ចុប្បន្នអង្ករមានចំណែក ៩ភាគរយនៃទំនិញសរុបដែលត្រូវបានគណនាកម្រិតអតិផរណានៅហ្វីលីពីន។ ធនាគារកណ្តាលហ្វីលីពីនកត់សម្គាល់ថា អតិផរណាកាលពីខែមុនបានកើនឡើងវិញក្រោយរយៈពេលប្រាំពីរខែ ដែលជំរុញដោយប្រេងឥន្ធនៈ និងតម្លៃអង្ករកើនឡើង។
នៅឆ្នាំ ២០១៨ ការកើនឡើងតម្លៃអង្ករនៅហ្វីលីពីន ដោយសារតែកង្វះការផ្គត់ផ្គង់បានជំរុញឱ្យមានអតិផរណាខ្ពស់ ដែលបង្ខំឱ្យប្រទេសនេះដំឡើងអត្រាការប្រាក់។ កាលពីខែមុន តម្លៃអង្ករនៅអាស៊ី បានឡើងដល់កម្រិតខ្ពស់ក្នុងរយៈពេល ១៥ឆ្នាំ ខណៈឥណ្ឌាដែលជាប្រទេសនាំចេញអង្ករធំជាងគេរបស់ពិភពលោក បានហាមឃាត់ការលក់អង្ករច្រើនប្រភេទទៅបរទេស ។
ក្រសួងកសិកម្មហ្វីលីពីនព្យាករថា ការផ្គត់ផ្គង់អង្ករនៅឆមាសទីពីរឆ្នាំនេះនឹងកើនឡើងដល់ ១០,១៥លានតោន ដែលគ្រប់គ្រាន់សម្រាប់បំពេញតម្រូវការបច្ចុប្បន្នចំនួន ៧,៧៦ លានតោន។
ប្រធានាធិបតីហ្វីលីពីនក៏បានស្នើឲ្យមន្រ្តីត្រួតពិនិត្យសម្របសម្រួលជាមួយរដ្ឋាភិបាលដើម្បីធានាការអនុវត្តពិដានតម្លៃនេះ។ គយហ្វីលីពីននឹងរឹតបន្តឹងការត្រួតពិនិត្យឃ្លាំងស្តុកអង្ករ ដើម្បីបញ្ចៀសការសង្ស័យ ក៏ដូចជាការរត់ពន្ធ៕
© រក្សាសិទ្ធិដោយ thmeythmey.com