ប្រមុខការទូតរុស្ស៊ី ស៊ែហ្គេយ៍ ឡាវរ៉ូវ នឹងធ្វើជាតំណាងរុស្ស៊ីនៅក្នុងកិច្ចប្រជុំ G20 ចាប់ពីថ្ងៃទី៩ ដល់ថ្ងៃទី ១០ខែកញ្ញា នៅទីក្រុងញូវដែលី។ ប្រធានាធិបតីរុស្ស៊ី វ្ល៉ាឌីមៀ ពូទីន នឹងមិនទៅចូលរួមឡើយ ចាប់​តាំង​ពីតុលាការឧក្រិដ្ឋកម្មអន្តរជាតិបានចេញដីកាចាប់ខ្លួនលោកកាលពីខែមីនាពីបទសង្ស័យឧក្រិដ្ឋកម្មសង្គ្រាមនៅអ៊ុយក្រែន។

 

«វានឹងមិនមានសេចក្តីប្រកាសទូទៅក្នុងនាមសមាជិកទាំងអស់ទេ ប្រសិនជំហររបស់យើងមិនត្រូវ​បា​ន​ឆ្លុះបញ្ចាំង»។ លោក ឡាវរ៉ូវ ប្រាប់និស្សិតនៅវិទ្យាស្ថានទំនាក់ទំនងអន្តរ ជាតិរដ្ឋមូស្គូដែលជាវិទ្យាស្ថានការទូតដ៏ល្បីល្បាញមួយមុនជំនួបសប្ដាហ៍ក្រោយ។

 

អ្នកការទូតជើងចាស់រូបនេះបន្តថា លោកខាងលិចបានលើកឡើងពីអ៊ុយក្រែននៅក្នុងកិច្ចប្រជុំកំពូល ដែលជាព្យាយាមរៀបចំប្រធានបទពិភាក្សាដោយខ្លួនឯង ហើយដែលធ្វើឱ្យខូច​សិទ្ធិអំណាច​នៃ​ស្ថាប័ន​អន្តរជាតិ។ លោកសង្កត់ធ្ងន់ថា ប្រសិនបើមិនអាចឈានដល់ការឯកភាពគ្នានៅឯកិច្ចប្រជុំ G20 សេចក្តីថ្លែងការណ៍មួយអាចត្រូវបានចេញដោយប្រធាន G20 ឬជម្រើសមួយផ្សេងទៀតគឺការអនុម័ត ឯកសារមួយដែលអនុញ្ញាតឱ្សគ្រប់ប្រទេស​លើកឡើង​ពី​ជំហររៀងៗខ្លួន។

 

ជាមួយការជំទាស់របស់រុស្ស៊ី ឥណ្ឌាទំនងជាចេញសេចក្ដីប្រកាសរបស់ប្រធានអង្គប្រជុំមួយដែលសង្ខេបពីជំហរមិនត្រូវគ្នារបស់សមាជិក G20 ដូចដែលម្ចាស់ផ្ទះមុនៗធ្លាប់ធ្វើ។ សមាជិក G20 មានចិន ឥណ្ឌា និងប្រេស៊ីលបានអំពាវនាវឱ្យមានសន្តិភាពនៅអ៊ុយក្រែន ប៉ុន្តែក៏រក្សាទំនាក់ទំនងផ្ទាល់ខ្លួនជាមួយទី ក្រុងមូស្គូផងដែរ៕