អន្តរជាតិ
អាស៊ាន
អាស៊ាន ជជែកពីតម្រូវការពឹងផ្អែកលើជីកសិកម្មខ្លួនឯងដើម្បីធានាសន្តិសុខស្បៀង
× ប្រធានសភាពាណិជ្ជកម្ម និងឧស្សាហកម្មហ្វីលីពីន លោក George Barcelon បានលើកឡើងថា ប្រទេសសមាជិកអាស៊ានបានពិភាក្សាអំពីតម្រូវការក្នុងការពឹងផ្អែកដោយខ្លួនឯងលើការផលិតជីកសិកម្មដើម្បីសម្រេចបានសន្តិសុខស្បៀងអាហារក្នុងតំបន់ ស្របពេលដែលវិបត្តិអ៊ុយក្រែនបង្កក្ដីបារម្ភខ្លាំងលើផ្នែកនេះ។
«នៅក្នុងតំបន់របស់យើង យើងពឹងផ្អែកយ៉ាងខ្លាំងលើជីដែលមកពីបរទេស។ ពិតប្រាកដណាស់ អ្នកផលិតជីអាសូតគឺចិន អាម៉េរិក រុស្ស៊ី និងឥណ្ឌា»។ លោក Barcelon បាននិយាយនៅក្នុងបទសម្ភាសមួយជាមួយទូរទស្សន៍ GMA នៅក្រៅនៃកិច្ចប្រជុំធុរកិច្ច និងការវិនិយោគអាស៊ាននៅឥណ្ឌូណេស៊ី។
លោក Barceon កត់សម្គាល់ថា ឥណ្ឌូណេស៊ីដែលម្ចាស់ផ្ទះនៃកិច្ចប្រជុំអាស៊ាន ក៏ជាប្រទេសផលិតជីផងដែរ ប៉ុន្តែក៏នៅតែត្រូវនាំចូលជីបន្ថែមសម្រាប់ផលិតកម្មកសិកម្ម។
«ជីមានសារសំខាន់ណាស់សម្រាប់តំបន់។ យើងបាននិយាយអំពីសន្តិសុខស្បៀង អាហារ ហើយយើងត្រូវតែពឹងផ្អែកលើខ្លួនឯងយ៉ាងហោចណាស់លើផ្នែកធំនៃជីរបស់យើង»។ លោក Barcelon សង្កត់ធ្ងន់បែបនេះរួចក៏លើកឡើងពីតម្រូវការដែលរដ្ឋាភិបាលផ្តោតការយកចិត្តទុកដាក់លើកសិករខ្នាតតូចដើម្បីបង្កើនផលិតភាពនិងការក្លាយខ្លួនជាសហគ្រិន។
បើតាមមន្ត្រីហ្វីលីពីន ការជំរុញផលិតភាពកសិករខ្នាតតូចនោះរួមមានការផ្តល់ហិរញ្ញប្បទាន ការកែលម្អហេដ្ឋារចនាសម្ព័ន្ធប្រព័ន្ធធារាសាស្រ្ត ផ្លូវដឹកជញ្ជូនទំនិញពីកសិដ្ឋានទៅទីផ្សារ និងការអនុវត្តតាមបែបឌីជីថល៕
© រក្សាសិទ្ធិដោយ thmeythmey.com