សេចក្ដីជូនដំណឹងរបស់ក្រសួងវប្បធម៌ និងវិចិត្រសិល្បៈ នៅថ្ងៃទី៤ ខែកញ្ញា បានឱ្យដឹងថា មួយរយៈចុងក្រោយនេះ មន្រ្តីជំនាញនៃក្រសួងវប្បធម៌ សង្កេតឃើញថា មានអាជីវករ និងអ្នកលក់អនឡាញមួយចំនួន បានប្រើប្រាស់រូបថតវត្ថុបុរាណខ្មែរ ដែលក្រសួងធ្លាប់បង្ហោះកន្លងមក ទៅផ្សព្វផ្សាយតាមបណ្ដាញសង្គមហ្វេសប៊ុក និងតិកតុក ដើម្បីលក់ដូរវត្ថុសិល្បៈឯកជនរបស់ខ្លួន។ 
 

ការយករូបថតវត្ថុបុរាណមកប្រើប្រាស់បែបនេះ គឺជាសកម្មភាពខុសឆ្គង និងជារូបភាពបោកប្រាស់ ដែលនាំឱ្យសាធារណជនមានការភាន់ច្រឡំ។ ទង្វើនេះក៏អាចធ្វើឱ្យសមត្ថកិច្ចបរទេស និងអ្នកកាន់កាប់សមុច្ច័យឯកជននានា យល់ច្រឡំថាវត្ថុបុរាណខ្មែរដែលគេបានប្រគល់ឱ្យវិញ ត្រូវបានចរាចរលក់ដូរក្នុងទីផ្សារ ដោយខ្វះការគ្រប់គ្រង់ និងការពារពីរដ្ឋាភិបាលកម្ពុជា។
 

ករណីនេះ ក៏ធ្វើឱ្យប៉ះពាល់ធ្ងន់ធ្ងរដល់ដំណើរការទាមទារវត្ថុបុរាណខ្មែរមកវិញ និងបាត់បង់ទំនុកចិត្តមកលើរដ្ឋាភិបាលកម្ពុជាដែលប្រឹងប្រែងក្នុងការស្វែងរក និងនាំយកមកវិញនូវសម្បត្តិវប្បធម៌ខ្មែរ ដែលត្រូវបានលួចនាំចេញដោយខុស ច្បាប់ទៅក្រៅប្រទេស។
 

ក្រសួងវប្បធម៌ បានអំពាវនាវដល់អាជីវករ និងអ្នកលក់អនឡាញនានា ត្រូវបញ្ឈប់ជាបន្ទាន់រាល់ការប្រើប្រាស់រូបភាពវត្ថុបុរាណខ្មែរ ដើម្បីផ្សព្វផ្សាយលក់វត្ថុសិល្បៈរបស់ខ្លួន។ ករណី អាជីវករ ឬ អ្នកលក់អនឡាញណា ដែលមិនបញ្ឈប់នូវទង្វើមិនស្របច្បាប់នេះ ក្រសួង នឹងចាត់វិធានការចាំបាច់ តាមច្បាប់ជាធរមាន៕