ជាតិ
អាស៊ាន ចង់ក្លាយជាតំបន់សេដ្ឋកិច្ចដែលមិនប៉ះពាល់ដល់បរិស្ថាន លោក Airlangga Hartarto រដ្ឋមន្រ្តីសម្របសម្រួលកិច្ចការសេដ្ឋកិច្ចឥណ្ឌូណេស៊ី។
× រដ្ឋសមាជិកអាស៊ានកំពុងធ្វើការរួមគ្នាឆ្ពោះទៅរកការកសាងប្លុកសេដ្ឋកិច្ចដែលមានលក្ខណៈអំណោយផលដល់ការការពារបរិស្ថានស្របតាមចក្ខុវិស័យរបស់អាស៊ានសម្រាប់ឆ្នាំ២០៤៥។ នេះបើតាមការលើកឡើងរបស់រដ្ឋមន្ត្រីសម្របសម្រួលកិច្ចការសេដ្ឋកិច្ចឥណ្ឌូណេស៊ី Airlangga Hartarto ក្នុងវេទិកាអាកាសធាតុអាស៊ាននៅទីក្រុងហ្សាការតា។
វេទិកាដែលធ្វើឡើងស្របគ្នាកិច្ចប្រជុំកំពូលអាស៊ានលើកទី៤៣ ផ្តោតលើគំនិតយុទ្ធសាស្ត្រ និងការគិតយ៉ាងទូលាយទាក់ទងនឹងការកាត់បន្ថយការបំភាយឧស្ម័ន ការផ្លាស់ប្តូរថាមពលដែលមានតម្លៃសមរម្យ យុទ្ធសាស្ត្រកាត់បន្ថយកាបូនដោយនិរន្តរភាព និងហិរញ្ញវត្ថុប្រកបដោយនិរន្តរភាព។
យោងតាមលោក Hartarto តំបន់អាស៊ីអាគ្នេយ៍ នឹងរងផលប៉ះពាល់ដោយការប្រែប្រួលអាកាសធាតុ ហើយអាចនឹងបាត់បង់ប្រហែល៣០ភាគរយនៃផលិតផលក្នុងស្រុកសរុប (GDP) របស់ខ្លួននៅឆ្នាំ ២០៥០ ដោយសារតែការកើនឡើងសីតុណ្ហភាពពិភពលោក និងការកើនកំដៅខ្លាំងបំផុត។
ដូច្នេះ ការបំភាយឧស្ម័នផ្ទះកញ្ចក់នៅអាស៊ីអាគ្នេយ៍ត្រូវកាត់បន្ថយពី១០ភាគរយទៅ២៥ ភាគរយនៅឆ្នាំ ២០៣០ ដើម្បីកម្រិតការឡើងកំដៅផែនដីមានត្រឹម១,៥អង្សា។ លោក Hartarto បានសង្កត់ធ្ងន់ថា ដើម្បីសម្រេចបានគោលដៅនេះ កិច្ចសហប្រតិបត្តិការរួមគ្នារវាងរដ្ឋាភិបាល និងវិស័យអាជីវកម្មពិតចាំបាច់នាពេលនេះ។ លោកបានបន្ថែមថា បណ្តាប្រទេសអាស៊ានបានព្រមព្រៀងគ្នាក្នុងការអភិវឌ្ឍប្រព័ន្ធអេកូឡូស៊ីយានយន្តអគ្គិសនី និងក្លាយជាផ្នែកមួយដ៏សំខាន់នៃខ្សែច្រវាក់ផ្គត់ផ្គង់ពិភពលោក។
កិច្ចសហប្រតិបត្តិការនេះរួមមានការកែលម្អហេដ្ឋារចនាសម្ព័ន្ធ និងស្ថានីយ៍សាកថ្ម ការបង្កើត បរិយាកាសធុរកិច្ច និងវិនិយោគដើម្បីទាក់ទាញការវិនិយោគ និងការលើកទឹកចិត្តដល់ភាពជាដៃគូសាធារណៈ និងឯកជន។
បច្ចុប្បន្ន ការអភិវឌ្ឍយានជំនិះអគ្គិសនីអាចដើរតួនាទីយ៉ាងសំខាន់ក្នុងការធានានិរន្តរភាពបរិស្ថានដោយចាប់ផ្តើមពីការកាត់បន្ថយការបំភាយផ្ទះកញ្ចក់ ការពន្លឿនការផ្លាស់ប្តូរថាមពល ការសម្អាតការបញ្ចេញឧស្ម័នតាមផ្នែកដឹកជញ្ជូនតាមផ្លូវគោក ដើម្បីសម្រេចបានគោលដៅការបំភាយឧស្ម័នសូន្យ ក៏ដូចជាការបង្កើនសន្តិសុខថាមពលនៅក្នុងតំបន់អាស៊ាន៕
© រក្សាសិទ្ធិដោយ thmeythmey.com