សាជីវកម្មយន្តហោះពាណិជ្ជកម្មចិន (Comac) បាននិយាយថា ខ្លួនទទួលបានការបញ្ជាទិញចំនួន១០៦១គ្រឿងសម្រាប់យន្តហោះប្រភេទ C919 និងបានចែកចាយយន្តហោះចំនួន ២គ្រឿងរួចមកហើយដែលកំពុងប្រតិបត្តិការដឹកអ្នកដំណើរនាពេលបច្ចុប្បន្ន ។
ព័ត៌មានខាងលើត្រូវបានប្រធានក្រុមហ៊ុន Comac លោក He Dongfeng ថ្លែងក្នុងវេទិកាមួយនៅទីក្រុងសៀងហៃកាលពីថ្ងៃទី១០ ខែកញ្ញា ដែលជាយន្តហោះផលិតដោយប្រទេសចិនផ្ទាល់តែម្តង។
បន្ទាប់ពីការអភិវឌ្ឍអស់រយៈពេល១៤ឆ្នាំ យន្តហោះប្រភេទ Comac C919 ត្រូវបានហោះហើរសាកល្បងកាលពីខែកញ្ញា ឆ្នាំ២០២២ ។ ជាយន្តហោះរាងតូចល្មមអាចផ្ទុកអ្នកដំណើរបានពី១៥៨ ទៅ១៦៩នាក់ C919 អាចហោះហើរបានចម្ងាយជាង៥៥០០ គីឡូម៉ែត្រ។ យន្តហោះ C919 មានសមត្ថភាពអាចប្រជែងជាមួយយន្តហោះ Boeing 737 និង Airbus 320។
កាលពីខែធ្នូ ឆ្នាំ២០២២ ក្រុមហ៊ុនអាកាសចរណ៍ចិន China Eastern Airlines បានក្លាយជាអតិថិជនដំបូងគេដែលបានទទួលយន្តហោះ C919។ យន្តហោះប្រភេទនេះ បានដាក់ឱ្យដំណើរការដោយក្រុមហ៊ុនអាកាសចរណ៍ចាប់ពីចុងខែឧសភា ឆ្នាំ២០២៣។ យន្តហោះ C919 ចំនួន ២គ្រឿងបច្ចុប្បន្នបានហោះហើរទៅមកលើផ្លូវអាកាស Shanghai - Chengdu ។
ទីក្រុងប៉េកាំងសង្ឃឹមថា C919 នឹងជួយចិនកាត់បន្ថយការពឹងផ្អែកលើបច្ចេកវិទ្យាបរទេស។ រដ្ឋាភិបាលរបស់ប្រទេសនេះមានគោលបំណងឱ្យ C919 មានចំណែកប្រមាណ ១០ភាគរយនៃទីផ្សារក្នុងស្រុកនៅឆ្នាំ ២០២៥ ។
យន្តហោះ C919 ត្រូវបានផ្តើមគំនិតឡើងដោយប្រធានាធិបតីចិន ស៊ី ជិនភីង កាលពីឆ្នាំ២០១៧ ។ លោកបានហៅវាថាជាកម្លាំងជំរុញនៅពីក្រោយនៃគំរូអភិវឌ្ឍន៍ថ្មីរបស់ចិន រួមជាមួយនឹងសមិទ្ធិផលវិទ្យាសាស្ត្រ និងបច្ចេកទេសផ្សេងទៀត។ យន្តហោះ C919 ក៏ជួយឲ្យចិនស្ថិតក្នុងបញ្ជីប្រទេសមួយចំនួនដែលអាចរចនា និងផលិតយន្តហោះផ្ទាល់ខ្លួនបានរួមមានអាម៉េរិក រុស្ស៊ី ប្រេស៊ីល កាណាដា អង់គ្លេស បារាំង និងអាល្លឺម៉ង់។
Comac ក៏បានផលិតយន្តហោះប្រភេទ ARJ21 ដែរ។ បច្ចុប្បន្ន ARJ21 ប្រហែល ១១២គ្រឿងកំពុងដំណើរការ។ ចំនួននៃការបញ្ជាទិញដែលទទួលបានដោយ Comac សម្រាប់យន្តហោះប្រភេទនេះមានចំនួ ៧៧៥គ្រឿង។
ឥណ្ឌូណេស៊ី គឺជាអតិថិជនអន្តរជាតិដំបូងគេរបស់ ARJ21 ដែលប្រទេសនេះបានអះអាងថា មិនត្រឹមតែប្រតិបត្តិការក្នុងឥណ្ឌូណេស៊ីប៉ុណ្ណោះទេ ប៉ុន្តែក៏ហោះហើរអន្តរជាតិទៅកាន់ម៉ាឡេស៊ី និងសិង្ហបុរីផងដែរ។ រហូតមកដល់ពេលនេះ ARJ21 បានដឹកជញ្ជូនអ្នកដំណើរចំនួន ៨,៦លាននាក់។
Comac បានបង្ហើបថា បច្ចុប្បន្នពួកគេមានយន្តហោះជាច្រើនប្រភេទ ចាប់ពីយន្តហោះតូច តួតូចចង្អៀត ហោះហើរចម្ងាយខ្លី និងមធ្យម ដល់យន្តហោះតួធំទូលាយ ហោះហើរចម្ងាយឆ្ងាយ។ ក្រុមហ៊ុនកំពុងរចនាយន្តហោះ C929 សម្រាប់ការហោះហើរអន្តរទ្វីប ដោយមានកៅអីអង្គុយចំនួនពី ២៥០ ទៅ៣៥០កៅអី និងសមត្ថភាពហោះហើរបានចម្ងាយ ១២ ០០០ គីឡូម៉ែត្រ៕