លោក Clement Teo ហាក់ដូចជាមិនពេញចិត្តសោះចំពោះការលេងរបស់កូនក្រុមខ្លួន ក្នុងការប្រកួតជាមួយគិរីវង់សុខសែនជ័យ បើទោះជា អ្នកទាំងនោះ ប្រឹងរកបាន ៣ពិន្ទុក៏ដោយ។ គ្រូបង្វឹករូបនេះ អះអាងចំពោះមុខអ្នកកាសែតក្រោយចប់ការប្រកួតលីគសប្តាហ៍ទី៥ ថាប្រសិនជា កីឡាករទាំងនោះ លេងបានល្អជាងនេះ និងរកគ្រាប់បាល់ច្រើន។
 

«ខ្ញុំ គិតថាចំណុចខ្វះខាត អ្នក បានឃើញ ខ្ញុំ បានឃើញ ហើយគេគ្រប់គ្នាបានឃើញដូចគ្នា វាគឺធម្មតា។ អ្វី ដែលសំខាន់សម្រាប់ក្រុម គឺពួកគេធ្វើអត់បានល្អទេ។ ប្រសិនជាពួកគេ ធ្វើបានល្អ ខ្ញុំ គឺមិនអីទេ ប៉ុន្ដែ ខ្ញុំ គិតថា ពួកគេអាចធ្វើបានល្អ ជាងនេះ។ អ្វី ដែលធ្វើឲ្យខ្ញុំ សប្បាយចិត្តនៃប្រកួតនេះ គឺយើង មិនខាតគ្រាប់បាល់។»។ លោក Clement Teo បញ្ជាក់ដូច្នេះ

ជាក់ស្ដែង កីឡាករបឹងកេត ក្ដាប់ឱកាសមិនបានល្អជាច្រើនលើកក្នុងការសម្រេចទី ហើយក៏ធ្វើឲ្យគូប្រកួតមានការវាយបកជាច្រើនលើក ដែលស្ទើតែអាចមានគ្រាប់បាល់កើតឡើងផងដែរ។
 

២គ្រាប់បឹងកេត យកឈ្នះ លើគិរីវង់សុខសែនជ័យនេះ រកបានដោយកីឡាករ Yoshihama Ryohei នៅនាទី២៨ ដោយការស៊ុត នៅក្នុងប្រអប់គ្រោះថ្នាក់។ ចំណែកគ្រាប់ទី២ នៅនាទី៤៧ កីឡាករ វ៉ាន់ តៃឡាម៉ី បានតែតបញ្ចូលទី បន្ទាប់ពីមិត្តរួមក្រុម កីឡាករ ម៉ាត់ ណូរុន លើកបាល់បញ្ជូនចូលតំបន់គ្រោះថ្នាក់។ បញ្ចប់ការប្រកួត បឹងកេត ឈ្នះ គិរីវង់សុខសែនជ័យ ២-០។
 

ដោយឡែក កីឡាករ វាន់ តៃឡាម៉ី ដែលជាប់ជាកីឡាករឆ្នើមប្រចាំជំនួបនេះ បានប្ដេជ្ញាថា ការប្រកួតលើក្រោយ រូបគេ និងមិត្តរួមក្រុម នឹងធ្វើបានល្អជាងនេះ។
 

គួរបញ្ជាក់ផងដែរថា គិតត្រឹមសប្ដាហ៍ទី៥ ព្រះខ័នរាជ ស្វាយរៀង ឈរនៅចំណាត់ថ្នាក់លេខ១ (បណ្ដោះអាសន្ន) មាន១៥ ពិន្ទុ និងចំណាត់ថ្នាក់លេខ២ ភ្នំពេញក្រោន មាន១២ ពិន្ទុ តាមពីក្រោយដោយ បឹងកេត ចំណាត់ថ្នាក់លេខ៣  មាន១០ពិន្ទុ។ ចំណែក វិសាខា ឈរនៅចំណាត់ថ្នាក់លេខ៤ មាន ៩ ពិន្ទុ។ លេខ ៥ ក្លិបកងយោធពលខេមរភូមិន្ទ មាន ៧ពិន្ទុ ស្មើគ្នាជាមួយ ព្រៃវែង ចំណាត់ថ្នាក់លេខ៦។ រីឯ ណាហ្គាវើលដ៍ លេខ៧ និង អាយ អេស អាយ ដង្កោសែនជ័យ លេខ៨ មាន៤ពិន្ទុ ដូចគ្នា។ អង្គរថាយហ្គឺរ ឈរចំណាត់ថ្នាក់លេខ៩ មាន ៣ពិន្ទុ ហើយគិរីវង់សុខសែនជ័យ ១ ពិន្ទុ នៅបាតតារាង៕