នៅថ្ងៃទី១៨ ខែកញ្ញា នាយករដ្ឋមន្ត្រីថៃថ្មីលោក សេដ្ឋា ថាវីស៊ីន បានប្រកាសថា រដ្ឋាភិបាលរបស់លោកនឹងអនុវត្តគោលនយោបាយថ្មីជាបន្តបន្ទាប់នៅចុងឆ្នាំនេះ ដើម្បីកាត់បន្ថយការចំណាយលើការរស់នៅរបស់ប្រជាពលរដ្ឋ រួមទាំងការកាត់បន្ថយតម្លៃអគ្គិសនី និងការដំឡើងប្រាក់ឈ្នួលអប្បបរមាប្រចាំថ្ងៃ ។ 

 

ទន្ទឹមនេះ លោក សេដ្ឋា ​ក៏បានប្រកាសពីគម្រោង​​ផ្លាស់​ប្តូរការរស់​នៅ និង​ធ្វើ​ការ​របស់ខ្លួននៅ​វិមាន​រដ្ឋាភិបាលតែម្តង។ លោកពន្យល់ថា ដោយសារតែផ្ទះរបស់លោកស្ថិតនៅចំកណ្តាលទីក្រុងបាងកក ក្បួនរថយន្តដឹកលោកទៅមកជារៀងរាល់ថ្ងៃអាចធ្វើឲ្យចរាចរណ៍ដ៏មមាញឹកស្រាប់រឹតតែកកស្ទះថែមទៀត។

 

បើតាមការអះអាងរបស់លោក សេដ្ឋា ការផ្លាស់ទៅរស់នៅវិមានរដ្ឋាភិបាលនេះ នឹងជួយកាត់បន្ថយការចំណាយលើការធ្វើដំណើររបស់ក្បួនរថយន្ត និងសន្សំសំចៃប្រេង។  

 

អ្នកនាំពាក្យរដ្ឋាភិបាលថៃ លោក Chai Watcharong បានលើកឡើងថា  នាយករដ្ឋមន្ត្រីថ្មីរូបនេះ បានស្នើឱ្យសមាជិកគណៈរដ្ឋមន្ត្រីកាត់បន្ថយការចំណាយលើការធ្វើដំណើរដោយប្រើថវិកា ក៏ដូចជាកាត់បន្ថយចំនួន និងទំហំនៃម៉ូតូដើម្បីកម្រិតផលប៉ះពាល់អវិជ្ជមាន។

 

ចាប់តាំងពីមុនចូលកាន់តំណែង លោក សេដ្ឋា ត្រូវបានគេលើកឡើងថា មានបំណងចង់ជួសជុលបន្ទប់មួយចំនួននៃអគាររដ្ឋាភិបាល ដើម្បីប្រែក្លាយបន្ទប់ទាំងនោះទៅជាកន្លែងសម្រាក។

 

លោក សេដ្ឋា ថាវីស៊ីន មានអាយុ ៦១ឆ្នាំ ត្រូវបានសភាបោះឆ្នោតជ្រើសរើសជាមេដឹកនាំថ្មីរបស់ថៃកាលពីថ្ងៃទី ២២ ខែសីហា ដោយបានបញ្ចប់ភាពជាប់គាំងក្នុងប្រទេសអស់រយៈពេលជាច្រើនខែបន្ទាប់ពីការបោះឆ្នោតសកលកាលពីខែឧសភា។ លោកបានស្បថចូលកាន់តំណែងនៅថ្ងៃទី៥ ខែកញ្ញា ដោយសន្យាភក្តីភាពចំពោះរបបរាជានិយម៕