ទីផ្សារការងាររបស់ជប៉ុនទំនងជានឹងធ្លាក់ចុះជាបន្តបន្ទាប់ ដោយសារតែមានកង្វះខាតកម្មកររាប់លាននាក់ ហើយអត្រាកម្លាំងពលកម្មដែលមានវ័យចំណាស់មានការកើនឡើងខ្ពស់។ ទន្ទឹមនេះ ក្រុមហ៊ុនជាច្រើនកំពុងទទួលអត្ថប្រយោជន៍ពីការប្រើប្រាស់ស្វ័យប្រវត្តិកម្ម និងបញ្ញាសិប្បនិមិត្ត (AI) ។
ការស្ទង់មតិរបស់វិស័យឯកជននៅជប៉ុនបង្ហាញថា កង្វះកម្លាំងពលកម្មកាន់តែមានស្ថានភាពអាក្រក់ទៅៗក្នុងប៉ុន្មានទសវត្សរ៍ខាងមុខនេះ។ ការសិក្សាមួយបានប៉ាន់ប្រមាណថា ការខ្វះខាតនឹងមានកម្មករច្រើនជាង ១១លាននាក់នៅឆ្នាំ២០៤០ ខណៈខែកក្កដាឆ្នាំនេះ ជប៉ុនមានកម្មករប្រហែល ៦៧លាននាក់។ នេះបើតាមសារព័ត៌មានជប៉ុន The Japan Times ។
សម្រាប់រយៈពេលខ្លី កង្វះកម្លាំងពលកម្មត្រូវបានបង្ហាញឱ្យឃើញនៅក្នុងវិស័យសេវាកម្ម បន្ទាប់ពីរងផលប៉ះពាល់ដោយជំងឺកូវីដ-១៩។ វិស័យដែលពឹងផ្អែកលើកម្លាំងពលកម្ម ដូចជាការសេវាកកម្មថែទាំ និងសំណង់កំពុងជួបការលំបាក។
រយៈពេលមួយទសវត្សរ៍កន្លងមកនេះ ជប៉ុនបានឃើញកំណើនស្ត្រី និងមនុស្សចាស់កាន់តែច្រើនឡើងចូលរួមក្នុងកម្លាំងពលកម្ម។ ក្រុមហ៊ុននៅក្នុងប្រទេសនេះពឹងផ្អែកកាន់តែខ្លាំងឡើងលើកម្មករវ័យចំណាស់។ កាលពីឆ្នាំមុន អាជីវកម្មជិត ៤០ភាគរយបានអនុញ្ញាតឱ្យបុគ្គលិកធ្វើការរហូតដល់អាយុ ៧០ឆ្នាំឬចាស់ជាងនេះ។
យោងតាមក្រសួងសុខាភិបាល ការងារ និងសុខុមាលភាពជប៉ុននៅឆ្នាំ ២០២២ អត្រានៃក្រុមហ៊ុនដែលមានកម្មវិធីជ្រើសរើសមនុស្សដែលមានអាយុចាប់ពី ៧០ឆ្នាំឡើងទៅ បានកើនឡើងច្រើនជាងពីរដងធៀបមួយទសវត្សរ៍កន្លងមក ។ បច្ចុប្បន្ន អត្រានៃអាជីវកម្មដែលមានអាយុចូលនិវត្តន៍ជាកាតព្វកិច្ចចាប់ពី ៦៥ឆ្នាំឡើងទៅក៏បានកើនឡើង ១២ភាគរយដល់ ២៥ភាគរយផងដែរ។
ក្រោយធ្វើវិសោធនកម្មច្បាប់ឆ្នាំ ២០១៣ ក្រុមហ៊ុននានាត្រូវបានតម្រូវឱ្យជ្រើសបុគ្គលិករហូតដល់អាយុ ៦៥ឆ្នាំ ប្រសិនបើពួកគេចង់បាន។ ដំបូងៗ ក្រុមហ៊ុនជាច្រើនបានជំទាស់ដោយបារម្ភការចំណាយខ្ពស់ជាង ប៉ុន្តែក្រោយមកពួកគេប្រជែងគ្នាជួលកម្មករវ័យចំណាស់ដើម្បីទប់ទល់នឹងការខ្វះខាតបុគ្គលិកធ្ងន់ធ្ងរ។
កាលពីឆ្នាំមុន មនុស្សដែលពេញអាយុធ្វើការមានចំនួន ៥៩ភាគរយនៃចំនួនប្រជាជនជប៉ុន ធ្លាក់ចុះ ៩ភាគរយធៀបនឹងឆ្នាំ២០០០។ យោងតាមក្រសួងកិច្ចការផ្ទៃក្នុង និងទំនាក់ទំនងកាលពីឆ្នាំមុន ចំនួនអ្នកធ្វើការដែលមានអាយុចាប់ពី ៦៥ឆ្នាំឡើងទៅមានចំនួន ៦,៣៩លាននាក់ដែលជាអត្រាខ្ពស់ស្មើរនឹង ១០,៦ភាគរយនៃចំនួនកម្មករនិយោជិតសរុប។
វិស័យដែលមានអត្រាមនុស្សចាស់ធ្វើការច្រើនក៏ប្រឈមនឹងកង្វះកម្លាំងពលកម្មធ្ងន់ធ្ងរ។ តួយ៉ាងវិស័យសំណង់ និងថែទាំមនុស្សចាស់មានច្រើនជាង ១៥ភាគរយគឺជាមនុស្សចាស់ ហើយច្រើនជាង ១០ភាគរយនៅក្នុងវស័យដឹកជញ្ជូន។ ប្រហែល ៣០ភាគរយនៃអ្នកបើកបរតាក់ស៊ី និងរថយន្តក្រុងក្នុងវិស័យដឹកជញ្ជូនមានអាយុចាប់ពី ៦៥ឆ្នាំឡើងទៅ។
Ukita Sangyo Kotsu ជាប្រតិបត្តិកររថយន្តតាក់ស៊ីនៅ Akita ភាគខាងជើងប្រទេសជប៉ុន ជួលអ្នកបើកបរប្រហែល ២៥នាក់ ដែលភាគច្រើនមានអាយុ ៦៥ឆ្នាំ ឬចាស់ជាងនេះ។ លោក Tadakatsu Ukita ប្រធានក្រុមហ៊ុនបាននិយាយថា មានមនុស្សក្មេងតែម្នាក់បានដាក់ពាក្យសម្រាប់ការងារនេះក្នុងរយៈពេលពីរខែ។
លោកបានថ្លែងថា៖ «ជាមួយនិន្នាការយុវជនដែលចាកចេញពីខេត្ត យើងមិនអាចរស់បានដោយគ្មានកម្មករចាស់នោះទេ។ ក្នុងចំណោមខេត្តចំនួន ៤៧របស់ជប៉ុន Akita មានអត្រាខ្ពស់បំផុតនៃចំនួនប្រជាជនដែលមានអាយុចាប់ពី ៦៥ឆ្នាំឡើងទៅ»។
យោងតាមអង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ មនុស្សដែលមានអាយុចាប់ពី ៦៥ឆ្នាំឡើងទៅមាន ៧ភាគរយនៃកម្លាំងការងារនៅអាម៉េរិក និង ៤ភាគរយនៅអាល្លឺម៉ង់ ទាបជាងច្រើនបើធៀបជប៉ុន១០,៦ភាគរយ។ នៅពេលដែលចំនួនកម្មករវ័យចំណាស់កើនឡើង គ្រោះថ្នាក់ការងារក៏កើនឡើងផងដែរ។
បើយោងតាមសារព័ត៌មាន Nikkei ជប៉ុនកំពុងបើកទូលាយសម្រាប់ទទួលយកពលករបរទេសកាន់តែច្រើន ប៉ុន្តែក្រុមហ៊ុនជាច្រើនហាក់ដូចជាមានជម្រើសតិចតួច ដោយសារការធ្លាក់ចុះនៃប្រាក់យ៉េននាពេលថ្មីៗនេះធ្វើឱ្យការជួលកម្មករបរទេសកាន់តែលំបាក ។
បញ្ហាប្រឈមដ៏ធំរបស់ជប៉ុន គឺតម្រូវការការងារកំពុងកើនឡើង ប្រាក់ឈ្នួលនៅទ្រឹង ។ នៅប្រទេសនេះប្រព័ន្ធការងារផ្អែកលើអតីតភាពការងារ ផលិតភាពទាប និងការស្ទាក់ស្ទើររបស់មនុស្សជាច្រើនក្នុងការផ្លាស់ប្តូរការងារបានរក្សាកំណើនប្រាក់ឈ្នួលយឺតអស់រយៈពេលជាច្រើនឆ្នាំ។
ដូច្នេះ រដ្ឋាភិបាលកាន់តែយកចិត្តទុកដាក់លើកំណែទម្រង់ ដោយសង្កត់ធ្ងន់លើតម្រូវការសម្រាប់ការបណ្តុះបណ្តាលឡើងវិញ និងលើកកម្ពស់ភាពចល័តក្នុងទីផ្សារការងារ។ លោក Takuya Hoshino សេដ្ឋវិទូជាន់ខ្ពស់នៅវិទ្យាស្ថានស្រាវជ្រាវ Dai-ichi បាននិយាយថា ប្រសិនបើមនុស្សកាន់តែច្រើនផ្លាស់ទីពីក្រុមហ៊ុនមួយទៅក្រុមហ៊ុនមួយ ក្រុមហ៊ុនជាច្រើននឹងផ្តល់ប្រាក់ឈ្នួលខ្ពស់ដើម្បីទាក់ទាញកម្មករវ័យក្មេងដែលមានជំនាញខ្ពស់។
ការយកចិត្តទុកដាក់ត្រូវបានផ្តោតកាន់តែខ្លាំងទៅលើនិរន្តរភាពនៃកំណើនប្រាក់ឈ្នួល ដែលកំពុងបង្កើនល្បឿនដ៏លឿនបំផុតក្នុងរយៈពេលបីទសវត្សរ៍។ នាយករដ្ឋមន្ត្រី Fumio Kishida ចង់ឃើញការដំឡើងប្រាក់ឈ្នួលជាភាគរយខ្ពស់ជាងអត្រាអតិផរណា។
ទន្ទឹមនេះ ខណៈពេលដែលវិស័យមួយចំនួនកំពុងទទួលបានអត្ថប្រយោជន៍ពីស្វ័យប្រវត្តិកម្ម និងបញ្ញាសិប្បនិមិត្ត (AI) ក្រុមហ៊ុននានាគ្រោងនឹងបង្កើនការវិនិយោគលើវិស័យទាំងនេះ ស្របពេលដែលមានភាពមិនប្រាកដប្រជាក្នុងការធ្វើឱ្យមានស្ថេរភាពនូវផលប៉ះពាល់រយៈពេលវែងលើទីផ្សារការងារ។
វិទ្យាស្ថានស្រាវជ្រាវ Mitsubishi ប៉ាន់ប្រមាណថា ការងារ ៩,៧លាននឹងត្រូវបាត់បង់នៅឆ្នាំ ២០៣៥ ដោយសារតែឥទ្ធិពលនៃឌីជីថលនីយកម្មរួមទាំង AI ។ យ៉ាងណាមិញ កម្លាំងពលកម្មនឹងនៅតែខ្វះខាតនៅឆ្នាំនោះ ដោយសារកិច្ចខិតខំប្រឹងប្រែងដើម្បីលើកកម្ពស់ការផ្លាស់ប្តូរពណ៌បៃតង និងឌីជីថលក៏ដូចជាកិច្ចខិតខំប្រឹងប្រែងដើម្បីជំរុញឧស្សាហកម្មសឺមីកុងអុចទ័រ។
ក្នុងកិច្ចខិតខំប្រឹងប្រែងដើម្បីការពារសន្តិសុខសេដ្ឋកិច្ចជាតិ ជប៉ុនមានបំណងស្តារឡើងវិញនូវវិស័យផលិតបន្ទះឈីប។ យោងតាមការប៉ាន់ប្រមាណដោយវិទ្យាស្ថានស្រាវជ្រាវ Mitsubishi ចំនួនវិស្វករអាជីពនឹងត្រូវកើនឡើងយ៉ាងខ្លាំងសម្រាប់ប្រទេសនេះ ដើម្បីបង្កើនចំណែកទីផ្សាររបស់ខ្លួនទ្វេដងនៅក្នុងឧស្សាហកម្មសឺមីកុងឌុចទ័ររហូតដល់ ១៥ភាគរយនៅឆ្នាំ ២០៣៥៕