ការណែនាំនេះធ្វើឡើង ក្រោយមានករណីក្រពើជំទង់៣ក្បាល បានរួចចេញពីកន្លែងចិញ្ចឹមមួយ ស្ថិតនៅភូមិត្រពាំងត្រាវ ឃុំគោកធ្លកក្រោម ស្រុកជីក្រែង ខេត្តសៀមរាប កាលពីថ្ងៃទី៦ តុលា ដោយការធ្វេសប្រហែសរបស់កម្មករពុំបានចាក់សោទ្វារអាង បន្ទាប់ពីផ្តល់ចំណីហើយ។ ជាសំណាងល្អ ក្រពើទាំងនោះ មិនបានបង្កគ្រោះថ្នាក់ដល់មនុស្សឡើយ ហើយត្រូវបានម្ចាស់វាចាប់យកទៅដាក់ចិញ្ចឹមនៅក្នុងកសិដ្ឋានវិញ។
 

ជុំវិញករណីនេះ រដ្ឋបាលជលផល បានណែនាំឱ្យម្ចាស់កសិដ្ឋានទាំងអស់ ត្រួតពិនិត្យជាប្រចាំនូវហេដ្ឋារចនាសម្ព័ន្ធចិញ្ចឹមតាមបទដ្ឋានបច្ចេកទេស ដើម្បីធានាសុវត្ថិភាព។ ហាមក្មេងចូលក្នុងបរិវេណចិញ្ចឹមក្រពើ ឬប្រើក្មេងផ្តល់ចំណីឬលាងសំអាតអាង។ 
 

ម្ចាស់កសិដ្ឋាន ត្រូវប្រើមនុស្សពេញកម្លាំងក្នុងការផ្តល់ចំណី លាងសំអាតអាង ប្រមូលពង ឬទាក់ចាប់ក្រពើ។ ជាពិសេសត្រូវរៀបចំសោភណ្ឌភាពនិងអនាម័យកន្លែងចិញ្ចឹមក្រពើ ដើម្បីសុខមាលភាពសាធារណៈ និងសម្រាប់បម្រើឱ្យវិស័យទេសចរណ៍។ នេះបើតាមរដ្ឋបាលជលផល។
 

ជាមួយគ្នានេះ រដ្ឋបាលជលផល ក៏ស្នើឱ្យអាជ្ញាធរមូលដ្ឋាន និងគណៈកម្មការសហគមន៍ អ្នកចិញ្ចឹមក្រពើ ជួយណែនាំបន្ថែមដល់អ្នកចិញ្ចឹមក្រពើឱ្យយកចិត្តទុកដាក់អំពីសុវត្ថិភាព និងសោភ័ណ្ឌភាពក្នុងការចិញ្ចឹម ជាពិសេស ត្រូវចាត់វិធានការបន្ទាន់ក្នុងករណីមានក្រពើរួច ឬឧបទ្ទវហេតុផ្សេងៗដែលកើតឡើងពីការចិញ្ចឹមក្រពើ៕