ជាមួយគ្នានេះលោក ឃួង ស្រេង ក៏បានប្រាប់ឱ្យស្នងការរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និងបញ្ជាការដ្ឋានយោធភូមិភាគពិសេស ត្រៀមកងកម្លាំង និងមធ្យោបាយ ដូចជា រថយន្ត ទូក កាណូត និងសម្ភារៈផ្សេង ដើម្បីជួយសង្គ្រោះពលរដ្ឋ។ រីឯមន្ទីរសាធារណការ ក៏ត្រូវបញ្ចេញគ្រឿងចក្រផ្សេងៗ ស្ដាររចនាសម្ព័ន្ធ និងរៀបចំបង្គន់អនាម័យ សម្រាប់ពលរដ្ឋ។

 

ចំណែកមន្ទីរធនធានទឹក ធ្វើព្យាករជាប្រចាំ ដើម្បីផ្ដល់ដំណឹងដល់ពលរដ្ឋ និងអាជ្ញាធរមូលដ្ឋាន ខណៈមន្ទីរព័ត៌មាន ត្រូវផ្សព្វផ្សាយឱ្យបានទូលំទូលាយដល់ពលរដ្ឋ។ ដោយឡែកមន្ទីរសុខាភិបាល ត្រូវត្រៀមផែនការការពារសុខភាព និងមន្ត្រី រួមទាំងរថយន្តសង្គ្រោះ សម្ភារៈសុខាភិបាល និងថ្នាំផ្សេងៗ សម្រាប់ពលរដ្ឋ ដែលជម្លៀសពីតំបន់រងគ្រោះ។ នេះបើតាមលោក ឃួង ស្រេង។
 

លោក ក៏ជំរុញឱ្យមន្ទីរអប់រំ និងមន្ទីរធម្មការ សុំគោលការណ៍អនុញ្ញាតពីក្រសួងអប់រំ យុវជន និងកីឡា ដើម្បីសុំផ្អាកដំណើរការគ្រឹះស្ថានណា ដែលរងប្រទះដោយសារទឹកជំនន់ ជាបណ្ដោះអាសន្នដែរ។ «រដ្ឋបាលខណ្ឌទាំង១៤ និងមន្ទីរ-អង្គភាពជំនាញជុំវិញរដ្ឋបាលរាជធានីភ្នំពេញ ត្រូវត្រៀមសហការ និងធ្វើការសម្របសម្រួលការងារពាក់ព័ន្ធទៅតាមជំនាញសមត្ថកិច្ចរៀងខ្លួន ដើម្បីជួយសង្គ្រោះពលរដ្ឋដែលរងគ្រោះ»។ នេះបើតាមអភិបាលរាជធានីភ្នំពេញ ដែលអំពាវនាវឱ្យពលរដ្ឋរស់នៅតាមបណ្ដោយដងទន្លេមេគង្គ និងស្ទឹងព្រែកត្នោត តាមដាន និងប្រុងប្រយ័ត្នខ្ពស់ ជាពិសេសទុកដាក់ទ្រព្យសម្បត្តិឱ្យបានត្រឹមត្រូវ ចៀសវាងបាត់បង់ដោយសារទឹកជំនន់៕