កីឡាអន្តរជាតិ
អន្តរជាតិ
Rosberg បើកយុគសម័យកាលថ្មីនៃ F1 ជាមួយនឹងជ័យជម្នះយ៉ាងកក់ក្តៅ
× កីឡាករ Nico Rosberg បានបើកយុគសម័យកាលថ្មីនៃការប្រណាំងរថយន្ត Formula One ជាមួយនឹងការទទួលជ័យជម្នះយ៉ាងកក់ក្តៅក្នុងព្រឹត្តិការណ៍ Australian Grand Prix កាលពីថ្ងៃអាទិត្យ ខណៈដែលម្ចាស់ការពារតំណែងជើងឯកពិភពលោក Sebastian Vettel និងកីឡាករ Lewis Hamilton សុទ្ធសឹងបានជួបឧប្បត្តិហេតុនៅដើមទី។
Rosberg ដែលក្រុម Mercedes របស់គេបានបង្ហាញពីភាពខ្លាំងបំផុតជាមួយនឹងបច្ចេកវិទ្យាថ្មីរបស់កីឡានេះ បានធ្វើការនាំមុខចាប់តាំងពីចាប់ផ្តើមប្រកួតរហូតដល់បញ្ចប់ និងបានឆ្លងកាត់ខ្សែបន្ទាត់ទីផ្តាច់ព្រ័ត្រជាមួយនឹងការនាំមុខក្នុងថិរវេលា២៤,៥វិនាទីលើកីឡាករសញ្ជាតិអូស្ត្រាលី Daniel Ricciardo របស់ក្រុម Red Bull។
ស្របពេលជាមួយគ្នានេះ វាមាននូវការបញ្ចប់ក្នុងចំណាត់ថ្នាក់លេខ៣ដ៏ត្រចះត្រចង់មួក្នុងការបង្ហាញខ្លួនជាលើកដំបូងក្នុងការប្រណាំង Formula One សម្រាប់ Kevin Magnussen វ័យ២១ឆ្នាំ របស់ក្រុម McLaren ដែលបានក្លាយជាកីឡាករដាណឺម៉ាកទី១ក្នុងការបញ្ចប់ក្នុងចំណាត់ថ្នាក់កំពូលតារាងទាំងបី។
កីឡាករ Jenson Button របស់ក្រុម McLaren និងម្ចាស់ជើងឯកពិភពលោកពីរសម័យកាល Fernando Alonso របស់ក្រុម Ferrari បានបញ្ចប់ក្នុងចំណាត់ថ្នាក់លេខ៤ និងលេខ៥ ដោយនាំមុខលើកីឡាករ Valtteri Bottas របស់ក្រុម Williams កីឡាករ Nico Hulkenberg របស់ក្រុម Force India និងកីឡាករ Kimi Raikkonen របស់ក្រុម Ferrari៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com