អន្តរជាតិ
ប្រមុខ UN ច្រានចោលការបំភាន់សុន្ទរកថាទាក់ទងវិបត្តិនៅហ្កាហ្សា តែអុីស្រាអែលនៅតែចង់ឱ្យលោកចុះចេញ
×
ដោយ៖ ងួនសៅ ពុទ្ធិឫទ្ធិ
អគ្គលេខាធិការ UN អាន់តូនីញូ ហ្គូតេរ៉េស នៅថ្ងៃទី២៥ ខែតុលា បានច្រានចោលការបំភាន់សុន្ទរកថារបស់លោកនៅសម័យប្រជុំក្រុមប្រឹក្សាសន្តិសុខស្ដីអំពីភាពសោកសៅរបស់ប្រជាជនប៉ាឡេស្ទីន។ សុន្ទរកថានេះ ធ្វើឱ្យអ៊ីស្រាអែលខឹងសម្បារយ៉ាងខ្លាំងរហូតដល់ថ្នាក់បានប្តេជ្ញាសងសឹកប្រឆាំងនឹងស្ថាប័នពិភពលោកមួយនេះថែមទៀត។
នៅក្នុងសម័យប្រជុំក្រុមប្រឹក្សាសន្តិសុខកាលពីថ្ងៃទី២៤ ខែតុលា លោក អាន់តូនីញ៉ូ ហ្គូតេរ៉េស បាននិយាយអំពីភាពជាក់ស្ដែងនៃការរំលោភលើច្បាប់មនុស្សធម៌អន្តរជាតិដែលកំពុងកើតឡើងនៅតំបន់ហ្គាហ្សា។ នៅត្រង់ចំណុចមួយ លោក ហ្គូតេរ៉េស បានលើកឡើងពីការវាយប្រហាររបស់ហាម៉ាស និងប៉ាឡេស្ទីនត្រូវបានទទួលរងនូវការកាន់កាប់អស់រយៈពេល៥៦ឆ្នាំ។ សម្ដីលោក ហ្គូតេរ៉េស ធ្វើឱ្យអ៊ីស្រាអែលក្ដៅស្លឹកត្រចៀកយ៉ាងខ្លាំង។
មួយថ្ងៃក្រោយ ប្រមុខ UN បានច្រានចោលការបំភាន់សុន្ទរកថារបស់លោក ដែលប្រៀបដូចជាលោកបានបង្ហាញថាអំពើភេរវកម្មដោយក្រុមហាម៉ាសជារឿងត្រឹមត្រូវ។
ជាមួយគ្នានេះ អគ្គលេខាធិការអង្គការ UN រូបនេះក៏បានបញ្ជាក់ថា វាពិតជាចាំបាច់ក្នុងការកត់ត្រាឱ្យច្បាស់លាស់ ជាពិសេសដោយសេចក្ដីគោរពចំពោះជនរងគ្រោះ និងក្រុមគ្រួសាររបស់ពួកគេ។ លោកបន្ថែមទៀតថា លោកបាននិយាយអំពីភាពសោកសង្រេងរបស់ប្រជាជនប៉ាឡេស្ទីន ដែលមិនបានបង្ហាញថាអំពើភេរវកម្មដោយក្រុមហាម៉ាសជារឿងត្រឹមត្រូវនោះទេ។
លោក Gilad Erdan ឯកអគ្គរដ្ឋទូតអ៊ីស្រាអែលប្រចាំ UN បានច្រានចោលការពន្យល់នេះ ហើយបានអំពាវនាវឲ្យអគ្គលេខាធិការអង្គការ UN រូបនេះលាលែងពីតំណែង។ ជាមួយគ្នានេះ លោកក៏បានប្រកាសថា អ៊ីស្រាអែលនឹងលែងផ្តល់ទិដ្ឋាការដោយស្វ័យប្រវត្តិដល់មន្ត្រី UN ហើយបានចោទប្រកាន់មន្ត្រីផ្សេងទៀតថា បាននិយាយកុហកលើស្ថានភាពដែលបានកើតឡើងនេះ៕
© រក្សាសិទ្ធិដោយ thmeythmey.com