អន្តរជាតិ
កងទ័ពអុីស្រាអែលប្រយុទ្ធនឹងក្រុមសកម្មជននៅទូទាំងតំបន់ហ្កាហ្សាខាងជើងដែលគ្មានទឹក គ្មានភ្លើង
ពលរដ្ឋប៉ាឡេស្ទីនភៀសខ្លួនចេញពីតំបន់ហ្កាហ្សាភាគខាងជើងឆ្ពោះទៅភាគខាងត្បូង ខណៈដែលរថក្រោះអ៊ីស្រាអែលរំកិលចូលកាន់តែជ្រៅ ក្នុងពេលមានជម្លោះដែលកំពុងកើតមានជាបន្តរវាងអ៊ីស្រាអែល និងក្រុមហាម៉ាស់នៅតំបន់ហ្គាហ្សាស្ទ្រីព។
×![]()
ដោយ: VOA
កងទ័ពអ៊ីស្រាអែលបានប្រយុទ្ធនឹងក្រុមសកម្មប្រយុទ្ធប៉ាឡេស្ទីន នៅក្នុងជំរំជនភៀសខ្លួន ក្នុងទីក្រុងនិងនៅជិតមន្ទីរពេទ្យមួយកន្លែង ខណៈកងទ័ពអ៊ីស្រាអែលកំពុងពង្រីកប្រតិបត្តិការយោធានៅទូទាំងតំបន់ហ្កាហ្សាភាគខាងជើង ដែលនៅទីនោះពលរដ្ឋកំពុងគ្មានអគ្គិសនីនិងទឹកប្រើប្រាស់ គ្មានស្បៀងអាហារ និងរបស់របរចាំបាច់អស់ពេលជាច្រើនសប្តាហ៍កន្លងទៅ។ នេះបើតាមការចេញផ្សាយរបស់ទីភ្នាក់ងារសារព័ត៌មាន AP។
សង្គ្រាមក្នុងសមរភូមិជួរមុខ ដែលចូលដល់សប្តាហ៍ទី៧ហើយនោះ ពេលនេះកំពុងរាលទៅដល់ជំរំជនភៀសខ្លួន Jabaliya ដែលជាទីតាំងដែលមានអគារថ្មជាច្រើននៅជិតទីក្រុងហ្កាហ្សា ដែលជាទីជំរករបស់ក្រុមគ្រួសារដែលបាត់បង់ផ្ទះសម្បែងកាលពីក្នុងសង្គ្រាមឆ្នាំ១៩៤៨ ជាពេលដែលរដ្ឋអ៊ីស្រាអែលមួយត្រូវបានបង្កើតឡើង។ អ៊ីស្រាអែលបានបាញ់ដាក់តំបន់នោះអស់ពេលជាច្រើនសប្តាហ៍មកហើយ ហើយយោធាអ៊ីស្រាអែលនិយាយថា ពួកយុទ្ធជនហាម៉ាស់ បានប្រមូលកម្លាំងរបស់ខ្លួនឡើងវិញនៅទីនោះ ក៏ដូចជានៅក្នុងបណ្តាស្រុកភាគខាងកើតមួយចំនួន ក្រោយពីត្រូវបានវាយរុញចេញពីទីក្រុងហ្កាហ្សាមួយផ្នែកធំនោះ។
ការប្រយុទ្ធគ្នាក៏កំពុងមានសភាពខ្លាំងផងដែរនៅជិតអគារមន្ទីរពេទ្យឥណ្ឌូណេស៊ី ដែលមន្ត្រីសុខាភិបាលប៉ាឡេស្ទីននិយាយថា ការវាយប្រហារតាមផ្លូវអាកាសកាលពីថ្ងៃចន្ទម្សិលមិញ បានសម្លាប់មនុស្ស១២នាក់។ ពួកគេនិយាយនៅថ្ងៃអង្គារនេះថា អ្នកជំងឺរាប់រយនាក់និងអ្នកគ្មានផ្ទះសម្បែងជាច្រើននាក់បានជាប់នៅក្នុងមន្ទីរពេទ្យនោះ ដោយការផ្គត់ផ្គង់កាន់តែអស់ទៅៗ បន្ទាប់ពីមនុស្សប្រមាណ២០០នាក់ ត្រូវបានជម្លៀសចេញមួយថ្ងៃមុន។
ទន្ទឹមនឹងនេះក្រុមមន្ត្រីជាន់ខ្ពស់ហាម៉ាស់បាននិយាយថា ពួកគេជិតឈានទៅសម្រេចបានកិច្ចព្រមព្រៀងមួយតាមរយៈអ្នកសម្របសម្រួលអន្តរជាតិ ដើម្បីដោះលែងចំណាប់ខ្មាំង ដែលគេប៉ាន់ស្មានថាមានចំនួន២៤០នាក់ ដែលក្រុមហាម៉ាស់បានចាប់កាលពីថ្ងៃទី៧ខែតុលាកន្លងទៅ ពេលពួកគេចូលវាយប្រហារលើអ៊ីស្រាអែល ដែលបង្កើតឱ្យមានសង្គ្រាមនៅពេលនេះ។ ប៉ុន្តែការពិភាក្សាលើបញ្ហានេះបានជាប់គាំងជាច្រើនលើកច្រើនសារ ហើយការប៉ាន់ស្មានពីការបំបែកភាពទាល់ច្រកក្នុងពេលកន្លងទៅនៅមិនទាន់ដឹងនៅឡើយ។
ពលរដ្ឋជាច្រើននិយាយថា មានការប្រយុទ្ធគ្នាដ៏ខ្លាំងក្លា ខណៈកម្លាំងថ្មើរជើងអ៊ីស្រាអែលកំពុងព្យាយាមរុលទៅមុខ ដោយមានការវាយប្រហារជួយពីលើអាកាសផងដែរ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 ថ្ងៃ
