កីឡាអន្តរជាតិ
អន្តរជាតិ
លទ្ធផលនៃការចាប់ឆ្នោតសម្រាប់ជំនួបវគ្គ១/៤ផ្តាច់ព្រ័ត្រ Champions League
× យោងតាមលទ្ធផលនៃការចាប់ឆ្នោតវគ្គ១/៤ផ្តាច់ព្រ័ត្រនៃក្របខណ្ឌ Champions League នាថ្ងៃសុក្រ ទី២១ ខែមិនា ឆ្នាំ២០១៤ នៅតំបន់ Nyon ប្រទេសស្វ៊ីស ក្លិប Manchester United ត្រូវប៉ះជាមួយម្ចាស់ការពារតំណែងជើងឯក Bayern Munich, Chelsea ជួប Paris Saint-Germain, Real Madrid ប៉ះ Borussia Dortmund ខណៈ Barcelona ត្រូវតទល់ជាមួយ Atletico Madrid ដែលមកពីអេស្ប៉ាញដូចគ្នា។
Manchester United ត្រូវប៉ះជាមួយ Bayern Munich ដែលខ្លួនធ្លាប់បំបាក់ដើម្បីឈ្នះពាន European Cup ពីឆ្នាំ១៩៩៩ ។ ក្រុមទាំងពីរធ្លាប់ប៉ះគ្នាននៅវគ្គដូចគ្នានេះ កាលពីឆ្នាំ២០១០ ដោយបញ្ចប់ក្នុងលទ្ធផលសរុប ៤-៤ ប៉ុន្តែ Bayern មានប្រៀបលើការស៊ុតបាល់បញ្ចូលទីនៅក្រៅដី។ តាមប្រវត្តិនៃជំនួបកន្លងមក Bayern ឈ្នះ៣លើក Man Utd ឈ្នះ២លើក និងស្មើ៤លើក។
លោក Jose Mourinho អ្នកចាត់ការទូទៅក្លិប Chelsea ត្រូវប្រឈមជាមួយខ្សែប្រយុទ្ធ Zlatan Ibrahimovic នៃក្លិប PSG ដោយអ្នកទាំងពីរធ្លាប់ធ្វើជាគ្រូ និងសិស្សនៅក្នុងក្លិប Inter Milan របស់អ៊ីតាលី។ Chelsea ធ្លាប់ជួប PSG តែម្តងគត់ក្នុងវគ្គជម្រុះតាមពូលកាលពីឆ្នាំ២០០៤ ដែលនៅកាលនោះ តោខៀវឈ្នះ ៣-០ នៅក្រៅដី ប៉ុន្តែបានបញ្ចប់ដោយគ្មានការស៊ុតបញ្ចូលទីនៅក្នុងផ្ទះ។
Barcelona តទល់ជាមួយ Atletico Madrid ដែលមកពីអេស្ប៉ាញដូចគ្នា សម្រាប់ជំនួបលើកទីមួយនៅក្នុងព្រឹត្តិការណ៍ប្រកួតតំបន់អឺរ៉ុប។ រីឯចំណាត់ថ្នាក់ក្នុងក្របខណ្ឌ La Liga វិញ ក្រុមទាំងពីរកំពុងមានពិន្ទុប្រដេញគ្នា ដោយ Atletico Madrid កំពុងឈរលំដាប់លេខពីរ និងនាំមុខ Barcelona មួយពិន្ទុ។
ដោយឡែក Real Madrid ត្រូវប៉ះជាមួយជើងឯករងឆ្នាំចាស់ Borussia Dortmund។ ក្រុមទាំងពីរបានជួបគ្នានៅវគ្គពាក់កណ្តាលផ្តាច់ព្រ័ត្រកាលពីឆ្នាំមុន ដែលនៅកាលនោះ Dortmund បានបោះជំហានទៅកាន់វគ្គផ្តាច់ព្រ័ត្រក្រោយជ័យជម្នះក្នុងលទ្ធផលទាំងពីរជើង ៤-៣ ។
ការប្រកួតជើងទីមួយនឹងប្រព្រឹត្តទៅនៅថ្ងៃទី១ ទី២ ខែមេសា រីឯជើងទីពីរនៅថ្ងៃទី៨ ទី៩ ខែមេសា។ ការចាប់ឆ្នោតវគ្គពាក់កណ្តាលផ្តាច់ព្រ័ត្រ ប្រព្រឹត្តនៅថ្ងៃទី១១ ខែមេសា ខណៈជំនួបផ្តាច់ព្រ័ត្រនឹងប្រព្រឹត្តទៅនៅកីឡដ្ឋាន Estadio do Sport Lisboa e Benfica ទីក្រុង Lisbon ប្រទេសព័រទុយហ្គាល់៕
© រក្សាសិទ្ធិដោយ thmeythmey.com