Arsenal កំពុងតែប្រឈមមុខនឹងការកាត់បន្ថយការគ្រប់គ្រងក្នុងការប្រជែងដណ្តើមពាន ក្រោយពីការបរាជ័យយ៉ាងអាម៉ាស់ក្នុងលទ្ធផល ៦-០ នៅលើទឹកដីក្រុម Chelsea ក្នុងការប្រកួតជាលើកទី១០០០របស់លោក Arsene Wenger ក្នុងនាមជាអ្នកចាត់ការទូទៅកាលពីថ្ងៃសៅរ៍។
លោក Wenger បានចាត់ទុកថា លទ្ធផលនេះ គឺជាថ្ងៃមួយក្នុងចំណោមថ្ងៃដ៏អាក្រក់បំផុតនៃអាជីពរបស់លោក ហើយភាពវេទនារបស់លោកបានកើនឡើងបន្ថែមទៀតតាមរយៈការទទួលជ័យជម្នះជាបន្តបន្ទាប់របស់ក្រុមប្រជែងដណ្តើមពាន Liverpool និង Manchester City ដែលបានធ្វើឲ្យក្រុមរបស់លោកធ្លាក់ទៅឈរក្នុងចំណាត់ថ្នាក់លេខ៤ ។
ខ្សែប្រយុទ្ធ Luis Suarez បានស៊ុតបាល់បញ្ចូលទីបីគ្រាប់ ខណៈដែល Liverpool បានទទួលជ័យជម្នះ ៦-៣ នៅលើទឹកដីក្រុម Cardiff City ដើម្បីដេញតាមពីក្រោយក្រុម Chelsea បួនពិន្ទុ ខណៈដែល Man City ដេញតាមពីក្រោយពីរពិន្ទុបន្ថែមទៀត ប៉ុន្តែ ជាមួយនឹងការនៅសល់៣ប្រកួតក្នុងដៃ ក្រោយពីខ្សែបម្រើ Yaya Toure ក៏បានស៊ុតបាល់បញ្ចូលទីបីគ្រាប់ផងដែរក្នុងពេលពួកគេទទួលជ័យជម្នះ ៥-០ លើក្រុម Fulham។
Arsenal បានដេញតាមពីក្រោយក្រុមឈរលេខ១៧ពិន្ទុ បើទោះបីនៅសល់១ប្រកួតក្នុងដៃក៏ដោយ ក្រោយពីក្រុមរបស់លោក Wenger បានបណ្តោយឲ្យមានគ្រាប់បាល់បញ្ចូលទីជាច្រើននៅត្រឹមតង់ទី១ពីសំណាក់កីឡាករ Samuel Eto'o, Andre Schurrle, Eden Hazard និង Oscar នៅឯកីឡដ្ឋាន Stamford Bridge ។
ស្របពេលជាមួយគ្នានេះ លោកអាជ្ញាកណ្តាល Andre Marriner បានធ្វើការសុំអភ័យទោសចំពោះកំហុសលើការផ្តល់កាតក្រហមដល់ខ្សែការពារ Kieran Gibbs របស់ក្រុម Arsenal ក្រោយ Alex Oxlade-Chamberlain បានយកដៃវៃបាល់ពីការស៊ុតរបស់ Hazard៕
លទ្ធផលកាលពីថ្ងៃសៅរ៍
Chelsea 6-0 Arsenal
Cardiff 3-6 Liverpool
Everton 3-2 Swansea
Hull 2-0 West Brom
Man City 5-0 Fulham
Newcastle 1-0 Crystal Palace
Norwich 2-0 Sunderland
West Ham 0-2 Man Utd
ប្រែសម្រួលដោយ ផេង សំណាង