RFI
អន្តរជាតិ
របាយការណ៍វិទ្យាសាស្ត្រ ៖ ទឹកបរិសុទ្ធក្នុងដបជ័រ ផ្ទុកលម្អងធាតុប្លាស្ទិករាប់ពាន់ រូបភាពតំណាង។ សម្បកដបជ័រ ក្នុងដំណើរការច្នៃប្រើឡើងវិញ នៅប៉ាគីស្ថាន ឆ្នាំ២០២៣។ AP - Pervez Masih
×
ដោយ៖ហេង ឧត្តម/RFI
ទឹកក្នុងដបជ័រប្លាស្ទិក គឺអ្នកវិទ្យាសាស្ត្ររកឃើញថា មានផ្ទុកជាតិប្លាស្ទិក ជាទម្រង់លម្អង ជាធាតុល្អិតតូចឆ្មារ និងមីក្រូប្លាស្ទិក។ ជាក់ស្តែង ទឹកបរិសុទ្ធក្នុងដបជ័រ មានផ្ទុកលម្អងសារធាតុប្លាស្ទិក ដល់ទៅរាប់ពាន់ឯណោះ ក្នុងចំណុះទឹក១លីត្រ។ នេះបើតាមរបាយការណ៍សិក្សាថ្មី ចេញផ្សាយនៅក្នុង ទស្សនាវដ្តីបណ្ឌិត្យសភាវិទ្យាសាស្ត្រអាមេរិក (Proceedings of the National Academy of Sciences – PNAS) នៅថ្ងៃចន្ទ ទី៨ មករា។
អ្នកវិទ្យាសាស្ត្រអាមេរិក បានប្រើប្រាស់បច្ចេកវិទ្យាទំនើប និង ប្រព័ន្ធឡាស្សែរ ដើម្បីធ្វើតេស្តពិសោធ គុណភាពទឹកនៅក្នុងដបប្លាស្ទិក ជាច្រើនប្រភេទផ្សេងគ្នា និងបានឲ្យដឹងថា ប្រសិនបើគិតជាមធ្យម យ៉ាងហោច មានបំណែកជាតិប្លាស្ទិក ២៤ម៉ឺន បំណែក ក្នុងចំណុះទឹក ១ លីត្រ នៃដបទឹកជ័រ។ ដើម្បីធ្វើពិសោធវិទ្យាសាស្ត្រ នៅក្នុងសិក្សាថ្មីនេះ គឺគេបានយកដបទឹកជ័រប្លាស្ទិក ម៉ាក់ល្បីៗ ចំនួន ៣ ប្រភេទ ដែលអ្នកស្រាវជ្រាវ សូមមិនបញ្ជេញឈ្មោះទេ។
សហនិពន្ធរបាយការណ៍ម្នាក់ ឈ្មោះ បីស្ហាន់ យ៉ាន បានប្រាប់ទីភ្នាក់ងារសារព័ត៌មានបារាំងអាអេហ្វប៉េ ប្រចាំរដ្ឋធានីវ៉ាស៊ីនតោន ថា «តាមរយៈការសិក្សាថ្មីនេះ គឺ ពុំមែនចង់ផ្តល់អនុសាសន៍ កុំឲ្យបរិភោគទឹក ក្នុងដបទឹកបរិសុទ្ធជ័រប្លាស្ទិកដាច់ខាចនោះទេ តែគេនៅតែបន្តពីសាបាន ប្រសិនបើចាំបាច់។ ពីព្រោះថា ការស្ងួតខ្វះជាតិទឹក គឺអាចនឹងនាំហានិយភ័យដល់សុខភាពខ្លាំង។ »
នាប៉ុន្មានឆ្នាំចុងក្រោយនេះ លម្អងសារធាតុប្លាស្ទិក ណាណូប្លាស្ទិក គឺទាក់ទាញចំណាប់អារម្មណ៍អ្នកសិក្សាស្រាវជ្រាវនិងក្រុមអ្នកបរិស្ថានខ្លាំងណាស់។ គេដឹងស្រេចហើយថា មីក្រូប្លាស្ទិក គឺតូចជាង ៥ ពាន់ មីក្រូម៉ែត្រ (ឬតូចជាងប្រមាណ ៥ មីលីម៉ែត្រ) ហើយ ណាណូប្លាស្ទិក គឺតូចជាង ១ មីក្រូម៉ែត្រ ទៅទៀត។ ដូច្នេះ លម្អងណាណូប្លាស្ទិក គឺ ល្អិតតូចខ្លាំងណាស់ ដែលអាចជ្រៀបចូលនៅក្នុងប្រព័ន្ធឈាម និងសរីរាង្គមនុស្ស ហើយវាអាចចូលដល់ខួរក្បាល និងបេះដូង បានយ៉ាងងាយដែរ។
ទោះយ៉ាងនេះក្តី សហនិពន្ធរបាយការណ៍សិក្សាវិទ្យាសាស្ត្រ លោក បីស្ហាន់ យ៉ាន បានលើកឡើងថា «ករណីប្រសិនបើមនុស្សយើង ព្រួយបារម្ភខ្លាច លម្អងជាតិប្លាស្ទិក ណាណូប្លាស្ទិក ក្នុងដបទឹកបរិសុទ្ធ គឺ ក្នុងដំណាក់កាលនេះ គេអាចផឹក ឬប្រើប្រាស់ទឹករ៉ូប៊ីនេ ជាបណ្តោះអាសន្នសិន»។
ថ្ងៃអនាគត អ្នកវិទ្យាសាស្ត្ររពឹងសង្ឃឹម ថានឹងពិសោធទឹកក្នុងប្រព័ន្ធទឹករ៉ូប៊ីនេ ដែលគេជឿថាអាចនឹងលម្អងប្លាស្ទិក ណាណូប្លាស្ទិកខ្លះដែរ ប៉ុន្តែ វាទំនងជាតិចតួចជាង ណាណូប្លាស្ទិកក្នុងទឹកដបជ័រប្លាស្ទិក៕
© រក្សាសិទ្ធិដោយ thmeythmey.com