អន្តរជាតិ
ប៉ាពូអាស៊ីនូវែលហ្គីណេដាក់ប្រទេសក្នុងភាពអាសន្ន និងព្យួរតំណែងមន្ត្រី ក្រោយមនុស្ស១៦នាក់ស្លាប់ក្នុងកុបកម្ម កុបកម្មនៅប៉ាពូអាស៊ីនូវែលហ្គីណេនៅថ្ងៃទី១០ ខែមករា។ រូបភាព AFP
× នាយករដ្ឋមន្ត្រីប៉ាពូអាស៊ីនូវែលហ្គីណេ នៅថ្ងៃទី១១ ខែមករា បានប្រកាសដាក់ប្រទេសក្នុងភាពអាសន្ន និងព្យួរមន្ត្រី និងប៉ូលិសមួយចំនួនក្រោយមនុស្សចំនួន ១៦ នាក់ត្រូវបានស្លាប់ក្នុង កុបកម្ម។
រូបភាពចាក់ផ្សាយលើទូរទស្សន៍បានបង្ហាញពីមនុស្សរាប់ពាន់នាក់នៅតាមដងផ្លូវនៃរដ្ឋធានី ព័រម៉ូរេសប៊ី បានដឹកទំនិញដែលទំនងដូចជាត្រូវបានលួចយក ខណៈដែលផ្សែង ខ្មៅបានហុយពេញទីក្រុង។ ទូរទស្សន៍រដ្ឋអូស្ត្រាលី ABC បានរាយការណ៍ថា មនុស្ស ៩ នាក់ បានស្លាប់នៅក្នុងកុបកម្មនៅទីក្រុងព័រម៉ូរេសប៊ី និង ៧ នាក់បានស្លាប់នៅក្នុងទីក្រុង Lae ភាគខាងជើង។
នាយករដ្ឋមន្ត្រីប៉ាពូអាស៊ីនូវែលហ្គីណេ លោក James Marape បានប្រាប់សន្និសីទព័ត៌មាន ថា លោកបានព្យួរតំណែងប្រធានប៉ូលិសរបស់ពូអាស៊ីនូវែលហ្គីណេ និងមន្ត្រីការិយាធិបតេយ្យកំពូលៗក្នុងផ្នែកហិរញ្ញវត្ថុ និងរតនាគារ ខណៈដែលរដ្ឋាភិបាលធ្វើការត្រួតពិនិត្យទៅលើមូលហេតុនៃកុបកម្ម។
«ទីនេះមានព័ស្តុតាងនៃកុបកម្មគ្រោងរៀបចំទុកមុន បានកើតឡើង»។ លោក Marape ថ្លែងបែប នេះដោយបន្ថែមថា ការពិនិត្យឡើងវិញនឹងធានាថា ពួកគេទទួលបានលទ្ធិប្រជាធិបតេយ្យ និងព្រមទាំងនីតិរដ្ឋ។
លោកសម្គាល់ផងដែរថា បុគ្គលិកយោធាប្រមាណ ១ ពាន់នាក់កំពុងរង់ចាំ ដើម្បីបង្ការភាពចលាចលដែលអាចកើតមានបន្ថែមទៀត។
មន្ត្រីប៉ូលិសបានធ្វើកូដកម្ម កាលពីព្រឹកថ្ងៃទី១០ ខែមករា បន្ទាប់ពីរកឃើញការកាត់បន្ថយ កញ្ចប់ប្រាក់ខែរបស់ពួកគេ។ មន្ត្រីក៏បានបន្ទោសលើភាពមិនប្រក្រតីផ្នែករដ្ឋបាល ដែលមាន ការធ្លាក់ចុះនៃច្បាប់របស់ប្រទេស។ យ៉ាងណាមិញ មូលហេតុនៃកុបកម្មមិនទាន់បញ្ជាក់ជាផ្លូវ ការនៅឡើយ។
ទន្ទឹមនេះ ស្ថានទូតអាម៉េរិកនៅទីក្រុងព័រម៉ូរេសប៊ីបង្ហាញថា ប៉ូលិសបានត្រឡប់ ទៅធ្វើការ វិញហើយ ប៉ុន្តែភាពតានតឹងនៅតែមានកម្រិតខ្ពស់។ ឯស្ថានទូតចិនបញ្ជាក់ថា ពលរដ្ឋចិនជា ច្រើននាក់បានរងរបួសស្រាល ខណៈហាងរបស់ពលរដ្ឋចិនត្រូវបានទទួលរងការបំផ្លិចបំផ្លាញ និងការលួចផងដែរ។
នាយករដ្ឋមន្ត្រីអូស្ត្រាលី លោក អាន់តូនី អាល់បានីសមានប្រសាសន៍ថា គណៈកម្មការជាន់ ខ្ពស់របស់ប្រទេសនេះកំពុងតាមដានស្ថានការណ៍ ហើយទីក្រុងកង់បេរ៉ា មិនបានទទួលសំណើ សុំជំនួយណាមួយពីប៉ាពូអាស៊ីនូវែលហ្គីណេនោះឡើយ ទោះបីជាអូស្ត្រាលីជាទៀងទាត់ តែងតែគាំទ្រក្នុងផ្នែកប៉ូលិស និងសន្តិសុខប្រទេសមួយនេះ។
គួរបញ្ជាក់ថា ប៉ូលិសប៉ាពូអាស៊ីនូវែលហ្គីណេបានតស៊ូជាមួយនឹងការកើនឡើងនៃឧក្រិដ្ឋកម្ម ហឹង្សាក្នុងរយៈពេលមួយឆ្នាំកន្លងមកនេះ។ មេដឹកនាំ Marape សង្កត់ធ្ងន់ថា ការជំរុញសន្តិសុខ នឹងជួយទាក់ទាញការវិនិយោគបរទេសនៅក្នុងធនធានមាស និងទង់ដែង៕
© រក្សាសិទ្ធិដោយ thmeythmey.com