ប្រធានមន្ទីរព័ត៌មានខេត្តសៀមរាប លោក លីវ សុខុន បានឱ្យដឹងថា នៅខេត្តសៀមរាបមានសារព័ត៌មាន អនឡាញ សរុបជាង៣០ស្ថាប័ន ដែលគ្រប់គ្រងដោយឯកជន។ លោកថា កន្លងមកមានស្ថាប័នខ្លះ មិនបានបំពេញតាមវិជ្ជាជីវៈ និងក្រមសីលធម៌ត្រឹមត្រូវឡើយ ដោយសារមួយចំនួនបានចុះផ្សាយ មិនបានយោងប្រភពត្រឹមត្រូវ គឺនិយាយតែម្ខាងៗ។ មួយចំនួនទៀត ក៏បានប្រើភាសាវាយប្រហារ សង្កត់នៅភាគីម្ខាងៗ និងការសរសេរដោយដាក់ការសង្ស័យ ឬគ្រាន់តែជាការស្មានជាដើម។ 

 

ក្នុងនាមប្រធានមន្ទីរព័ត៌មាន ដែលមានសមត្ថកិច្ចត្រឹមណែនាំ និងអប់រំ លោក លីវ សុខុន ស្នើឱ្យអ្នកសារព័ត៌មានទាំងអស់គោរពតាមវិជ្ជាជីវៈរបស់ផ្ទាល់ ជាជាងការចាប់ទោសតាមច្បាប់ណាមួយ ជាយថាហេតុ។ ជាមួយគ្នានេះ លោកប្រធានមន្ទីរស្នើសុំទៅសាធារណជនទាំងអស់ ក៏ត្រូវចេះថ្លឹងថ្លែង និងពិនិ្យតមើលព័ត៌មានឱ្យបានច្បាស់លាស់ផងដែរ ជាជាងការចុចចូលចិត្ត ឬចែករំលែកព័ត៌មានក្លែងក្លាយ ដែលអាចបង្កបញ្ហាសម្រាប់ខ្លួនឯង និងគ្រួសារ៕