ក្នុងដំណើរទស្សនកិច្ចរយៈពេល ៣ថ្ងៃ ដោយផ្តើមពីថ្ងៃទី២១ ដល់ថ្ងៃទី២៣ ខែមេសា លោកវ៉ាង យី នាយកការិយាល័យនៃគណៈកម្មការមជ្ឈិមទទួលបន្ទុកកិច្ចការបរទេស និងរដ្ឋមន្រ្តីការបរទេសចិន បានលើកឡើងជាថ្មីពីការលើកតម្កើងការអភិវឌ្ឍសហគមន៍ដែលមានអនាគតរួមគ្នា។

 

«ចិន មានឆន្ទៈធ្វើការជាមួយកម្ពុជា ដើម្បីពង្រឹងទំនុកចិត្តទៅវិញទៅមកជាយុទ្ធសាស្រ្ត, ពង្រឹងសាមគ្គីភាព និងកិច្ចសហប្រតិបត្តិការ, ពង្រឹងមូលដ្ឋានផលប្រយោជន៍ទៅវិញទៅមក និងលើកតម្កើងពីការអភិវឌ្ឍក្នុងការកសាងសហគមន៍ចិន និងកម្ពុជា ដែលមានអនាគតរួមគ្នា»។ ទីភ្នាក់ងារព័ត៌មាន Xinhua បានស្រង់សម្តីលោកវ៉ាងបែបនេះ នៅក្នុងជំនួបជាមួយសមភាគីកម្ពុជា លោកសុខ ចិន្តាសោភា នៅថ្ងៃទី២១ ខែមេសា។

 

បើតាមលោកវ៉ាង ភាគីទាំងពីរ គួរតែពង្រឹងកិច្ចសហប្រតិបត្តិការនៅក្នុងវិស័យជាច្រើន, ធ្វើឱ្យប្រសើរឡើងលើការរួបរួម និងកិច្ចសហប្រតិបត្តិការ រួមទាំងលើកតម្កើងពីការផ្តោះប្តូរប្រជាជន និងប្រជាជន និងពង្រីកកិច្ចសហប្រតិបត្តិការបែបពហុភាគី។ ត្រង់ចំណុចនេះ ប្រមុខការទូតចិន បានត្រៀមខ្លួនជាស្រេច ដើម្បីធ្វើឱ្យភាគីទាំងពីរមានការស៊ីសង្វាក់គ្នា និងអភិវឌ្ឍរួមគ្នាលើវិស័យចំនួន ៦ដូចជា នយោបាយ, ផលិតកម្ម, សមត្ថភាព, កសិកម្ម, ថាមពល,​ សន្តិសុខ និងការផ្តោះប្តូរប្រជាជន និងប្រជាជន។ 

 

ជាការឆ្លើយតប លោកសុខ ចិន្តាសោភា ដែលជាឧបនាយករដ្ឋមន្រ្តីផងនោះ បានបញ្ជាក់ពីការរំពឹងទុកលើកិច្ចសហប្រតិបត្តិការទ្វេភាគីជាមួយចិន និងស្វាគមន៍អ្នកវិនិយោគចិន ជាច្រើនបន្ថែមទៀត មករកស៊ីនៅកម្ពុជា។

 

នៅចំពោះមុខលោកវ៉ាង លោក សុខ ចិន្តាសោភា បានបង្ហាញពីកាយវិការមិនយល់ស្របនឹងការលូកដៃរបស់កម្លាំងបរទេសនៅក្នុងតំបន់។ ពាក់ព័ន្ធនឹងបញ្ហានេះ រដ្ឋមន្រ្តីការបរទេសកម្ពុជា បានត្រៀមខ្លួនជាស្រេច ដើម្បីធ្វើការជាមួយចិន និងធានាឱ្យតំបន់អាស៊ីបូព៌ាមានការអភិវឌ្ឍ រួមទាំងសន្តិភាព និងស្ថិរភាព។ 

 

ក្នុងថ្ងៃដដែលនោះ លោកវ៉ាង ក៏បានចូលក្រាបបង្គំគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនីផងដែរ។ ព្រះមហាក្សត្រកម្ពុជា មានព្រះរាជបន្ទូលថា ចិននៅតែជាដៃគូដ៏ទុកចិត្តរបស់កម្ពុជា។ ជាការឆ្លើយតប លោកវ៉ាង បានប្តេជ្ញាថា ចិន នឹងបន្តជាដៃគូដ៏ទុកចិត្ត និងអ្នកគាំទ្រខ្លាំងបំផុតរបស់កម្ពុជា។

 

សូមបញ្ជាក់ ទំហំពាណិជ្ជកម្មរវាងកម្ពុជា និងចិន នៅក្នុងឆ្នាំ២០២៣ មានចំនួន២,២៦ពាន់លានដុល្លារ ដោយកម្ពុជានាំទៅចិនចំនួន ១,៤៧ពាន់លានដុល្លារ ហើយចិននាំមកកម្ពុជាមានចំនួន ១០,៧៨ពាន់លានដុល្លារ៕