លោក Mai Tien Dung ជាអតីតប្រធានការិយាល័យរដ្ឋាភិបាលវៀតណាម នៅចន្លោះឆ្នាំ២០១៦ ដល់ឆ្នាំ២០២១ ក្រោមរដ្ឋាភិបាលរបស់លោកង្វៀន សួនហ្វ៊ុក អតីតនាយករដ្ឋមន្រ្តីវៀតណាម។ យ៉ាងណាមិញ លោក Dung ត្រូវបានប៉ូលិសវៀតណាមចាប់ខ្លួន នៅថ្ងៃទី៣០ ខែមេសា ពាក់ព័ន្ធនឹងការស៊ើបអង្កេតទៅក្នុងករណីអំពើពុករលួយនៅក្នុងខេត្ត Lam Dong។ 

 

យ៉ាងណាមិញ សេចក្តីថ្លែងការណ៍របស់ក្រសួងសន្តិសុខវៀតណាម ដែលចេញនៅថ្ងៃទី៤ ខែឧសភា មិនបានបញ្ជាក់ពីព័ត៌មានលម្អិត ជុំវិញការចាប់ខ្លួននោះទេ។ សារព័ត៌មានវៀតណាម បានចុះផ្សាយថា លោក Dung ត្រូវបានចាប់ខ្លួនពាក់ព័ន្ធគម្រោងអចលនទ្រព្យនៅក្នុងខេត្ត Lam Dong។

 

ការចាប់ខ្លួនរបស់អតីតប្រមុខការិយាល័យរដ្ឋាភិបាលខាងលើ ធ្វើឡើងស្របពេលវៀតណាមកំពុងប្រើយុទ្ធនាការទ្រង់ទ្រាយធំប្រឆាំងអំពើពុករលួយនៅក្នុងប្រទេស។ កន្លងមកប្រធានាធិបតីពីរនាក់ រួមទាំងប្រធានសភាវៀតណាម បានលាលែងពីតំណែង បន្ទាប់ពីមន្រ្តីខ្លួន និងមនុស្សជំនិត បានប្រព្រឹត្តអំពើពុករលួយ និងរំលោភអំណាច៕