Ryan Giggs បានមើលឃើញការប្រកួតជាលើកដំបូងរបស់លោកក្នុងនាមជាអ្នកចាត់ការទូទៅរបស់ Manchester United បញ្ចប់ជាមួយនឹងជ័យជម្នះ ៤-០ លើក្រុម Norwich City ក្នុងការប្រកួតក្របខ័ណ្ឌ Premier League នៅកីឡដ្ឋាន Old Trafford កាលពីថ្ងៃសៅរ៍។
ខ្សែប្រយុទ្ធ Wayne Rooney និងខ្សែបម្រើបម្រុង Juan Mata បានស៊ុតបាល់បញ្ចូលទីពីរគ្រាប់ដូចគ្នា ខណៈដែលក្រុមម្ចាស់ការពារតំណែងជើងឯករបស់អង់គ្លេសមួយនេះ បានធ្វើឲ្យក្រុម Norwich មានតែមួយពិន្ទុពីលើក្រុមស្ថិតក្នុងតំបន់កាត់ចោល ខណៈដែលនៅសល់ពីរប្រកួតទៀត។
Giggs ដែលបានសម្រេចចិត្តមិនដាក់ឈ្មោះរបស់គេផ្ទាល់ក្នុងជម្រើស១១នាក់ដំបូង ឬជាកីឡាករបម្រុងនោះ បានមើលឃើញ Rooney ជួយឲ្យ Man United មានគ្រាប់បាល់នាំមុខជាមួយនឹងការស៊ុតបាល់ប៉េណាល់ទីនៅនាទី ទី៤១ ក្រោយពីខ្សែប្រយុទ្ធ Danny Welbeck ត្រូវបានធ្វើឲ្យដួលក្នុងប្រអប់គ្រោះថ្នាក់។ ខ្សែប្រយុទ្ធអន្តរជាតិអង់គ្លេស Rooney បានជួយឲ្យក្រុមនាំមុខ ២-០ ក្រោយពីសម្រាកតង់ទី១ ជាមួយនឹងការស៊ុតបាល់កោងចូលទីរបស់ក្រុម Norwich យ៉ាងល្អ។
Mata បន្ថែមការនាំមុខនេះនៅនាទី ទី៦៣ នៅពេលដែលរូបគេទទួលបានបាល់ពីការទាត់បាល់ចេញពីជ្រុងរបស់ខ្សែការពារ Phil Jones មុនពេលបន្ថែមគ្រាប់បាល់ទី២ក្នុងរយៈពេល១០នាទី ទីក្រោយ៕
លទ្ធផលគូផ្សេងទៀត
Southampton 2-0 Everton
Fulham 2-2 Hull
Stoke 0-1 Tottenham
Swansea 4-1 Aston Villa
West Brom 1-0 West Ham