កីឡាអន្តរជាតិ
អន្តរជាតិ
ការភ្លាត់ស្នៀតរបស់ Liverpool នាំឲ្យ Chelsea វិលទៅកាន់ការប្រជែងវិញ
× ការភ្លាត់ស្នៀតមួយពីសំណាក់ខ្សែបម្រើ Steven Gerrard បានជួយឲ្យក្រុម Chelsea ទទួលជ័យជម្នះ ២-០ លើក្រុម Liverpool ដែលកំពុងតែនាំមុខលើតារាង Premier League នៅកីឡដ្ឋាន Anfield កាលពីថ្ងៃអាទិត្យ ដើម្បីធ្វើឲ្យពួកគេវិលទៅកាន់ការប្រជែងដណ្តើមពានវិញ។
ប្រធានក្រុមរបស់ Liverpool រូបនេះ បានបាត់បង់ជំហរនៅជិតបញ្ចប់ការប្រកួតក្នុងតង់ទី១ ដែលនាំឲ្យខ្សែប្រយុទ្ធ Demba Ba ទទួលបានបាល់ និងស៊ុតបាល់បំប៉ោងសំណាញ់ ខណៈដែលខ្សែបម្រើ Willian បានបន្ថែមការនាំមុខនៅជិតបញ្ចប់ការប្រកួតដើម្បីជួយឲ្យក្រុមរបស់លោក Jose Mourinho ដេញតាមពីក្រោយក្រុមកំពូលតារាងចំនួន២ពិន្ទុ។
លទ្ធផលនេះ បានធ្វើឲ្យដំណើរនៃការមិនស្គាល់ចាញ់របស់ក្រុម Liverpool បញ្ចប់ត្រឹម១១ប្រកួត ហើយបើទោះបីវាបានបង្កើតឱកាសការប្រជែងដណ្តើមពានរបស់ Chelsea សារជាថ្មីក៏ដោយ ប៉ុន្តែ អត្ថប្រយោជន៍ដ៏ពិតប្រាកដនោះអាចនឹងធ្លាក់ទៅលើក្រុម Manchester City។
Man City បានទទួលជ័យជម្នះលើក្រុមម្ចាស់ផ្ទះ Crystal Palace ក្នុងលទ្ធផល ២-០ ក្នុងការប្រកួតមួយគូផ្សេងទៀតកាលពីថ្ងៃអាទិត្យ។ ពួកគេនឹងត្រូវលេងការប្រកួតក្នុងដៃចុងក្រោយរបស់ពួកគេក្នុងផ្ទះខ្លួនឯងជាមួយនឹងក្រុម Aston Villa រយៈពេលមួយសប្តាហ៍ មុននឹងឈានដល់សប្តាហ៍ចុងក្រោយនៃរដូវកាលនេះ។
Man City និង Chelsea សុទ្ធសឹងលេងមុនក្រុម Liverpool នៅសប្តាហ៍ក្រោយ ដោយ Man City នឹងត្រូវធ្វើដំណើរទៅប្រកួតនៅលើទឹកដីក្រុម Everton ហើយ Chelsea ត្រូវទទួលភ្ញៀវ Norwich City មុននឹងក្រុម Liverpool របស់លោក Brendan Rodgers ធ្វើដំណើរទៅកាន់ទឹកដី Palace នៅថ្ងៃចន្ទ៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com