កីឡាអន្តរជាតិ
អន្តរជាតិ
គ្រូបង្វឹក Liverpool ថា Chelsea ចតឡានពីរគ្រឿងនៅមុខសំណាញ់ទី
× លោក Brendan Rodgers អ្នកចាត់ការទូទៅក្លិប Liverpool បានលើកឡើងថា Chelsea បានចតឡានចំនួនពីរគ្រឿងនៅមុខសំណាញ់ទី។ ការរិះគន់បែបនេះ បន្ទាប់ពីលោកខកចិត្តដែលក្រុមរបស់ខ្លួនចាញ់ក្រុមតោខៀវដែលជាគូប្រជែងពានរង្វាន់ក្នុងលទ្ធផល ២-០ នៅលើទឹកដី Anfield។
Demba Ba បានរកគ្រាប់បាល់បើកឆាកនៅមុនសម្រាកតង់ទីមួយ បន្ទាប់ពីប្រធានក្រុម Steven Gerrard ភ្លាត់ស្នៀតដួល ហើយ Willian បន្ថែមគ្រាប់ទីពីរនៅចុងម៉ោង ក្រោយការបញ្ជូនពី Fernando Torres ខណៈក្រុមកីឡាកររបស់ Liverpool សុទ្ធតែឡើងជ្រុលផុតពីតំបន់គ្រោះថ្នាក់។
លោក Rodgers បាននិយាយប្រាប់ Sky Sports News ថា៖ «អបអរសាទរចំពោះជ័យជម្នះរបស់ Chelsea ដែលបានឈ្នះការប្រកួត... ខ្ញុំគិតថា មានរថយន្តពីចតពីមុខសំណាញ់ទីរបស់ Chelsea នៅថ្ងៃនេះ»។
លោកបានបន្ថែមថា៖ «ខ្ញុំមើលឃើញថា វាហាក់បីដូចជាមានខ្សែការពារ៦នាក់ និងខ្សែបម្រើ៣នាក់នៅពីមុខ សរុបទៅ១០នាក់ ទាំងអ្នកចាំទី ដែលស្ថិតនៅពីក្រោយបាល់សម្រាប់រយៈពេល៩០នាទី»។
បរាជ័យរបស់ Liverpool បាននាំឲ្យ Chelsea និង Manchester City ដែលបានឈ្នះ Crystal Palace ២-០ នៅតែមានឱកាសប្រជែងយកពានសម្រាប់រដូវកាលនោះ។ ប៉ុន្តែទោះបីជាយ៉ាងណាក៏ដោយ Liverpool នៅតែមានក្តីសង្ឃឹម ខណៈពួកគេរំពឹងយ៉ាងខ្លាំងទៅលើខ្សែប្រយុទ្ធ Luis Suarez ដែលទើបជាប់ឆ្នោតជាកីឡាករឆ្នើមប្រចាំរដូវកាល (PFA Player of the Year)៕
© រក្សាសិទ្ធិដោយ thmeythmey.com