សុខភាព
អន្តរជាតិ
លោក ប៊ីល ហ្គេត៖ មូសជាសត្វដែលសម្លាប់មនុស្សច្រើនជាងគេបំផុតនៅលើលោក
× មហាសេដ្ឋីទី១របស់ពិភពលោក គឺ លោក ប៊ីល ហ្គេត (Bill Gate)បានចែករំលែករបាយការណ៍មួយរបស់អង្គការសុខភាពពិភពលោក នៅក្នុងបណ្ដាញសង្គម Twitter របស់លោកកាលពីពេលកន្លងទៅថ្មីៗនេះ ដែលរបាយការណ៍នោះបានបង្ហាញថា សត្វ«មូស» គឺជាសត្វដែលសម្លាប់មនុស្សអស់ច្រើនជាងគេនៅលើពិភពលោក។
បើយោងតាមរបាយការណ៍នោះ សត្វ«មូស» បានសម្លាប់មនុស្សអស់ចំនួន ៧២៥ ០០០ នាក់ក្នុងមួយឆ្នាំៗ តាមរយៈការចម្លងមេរោគជំងឺគ្រុនចាញ់ និងគ្រុនឈាម ខណៈពេលដែលមនុស្សបានសម្លាប់មនុស្សគ្នាឯងចំនួន ៤៧៥ ០០០ នាក់។
ចំណែកឯ «ពស់» បានសម្លាប់មនុស្សអស់ចំនួន ៥ ម៉ឺននាក់ ហើយសត្វ«ឆ្កែ» បានសម្លាប់មនុស្សអស់ ២៥ ០០០ នាក់ ក្នុងមួយឆ្នាំៗតាមរយៈការខាំនិងចម្លងជំងឺឆ្កែឆ្កួតទៅកាន់មនុស្ស។ ជាមួយគ្នានេះដែរសត្វរុយបឺតឈាម សត្វល្អិត Assassin Bug និងខ្យងហៀនទឹកសាប បានសម្លាប់មនុស្សជាង ១ ម៉ឺននាក់ក្នុងមួយឆ្នាំៗ ។
របាយការណ៍នោះក៏បានបង្ហាញថា ក្នុងមួយឆ្នាំៗ ព្រូនតេញ៉ាសម្លាប់ជាង ២៥០០ នាក់ ព្រូនទំពក់សម្លាប់មនុស្ស ២០០០ នាក់ ក្រពើសម្លាប់មនុស្សជាង ១០០០ នាក់ ដំរីទឹកសម្លាប់មនុស្សជាង ៥០០ នាក់ តោ និងដំរីសម្លាប់មនុស្សជាង ១០០ និងសត្វឆ្កែចចក និងត្រីឆ្លាម បានសម្លាប់មនុស្សអស់ជាង ១០ នាក់ក្នុងមូយឆ្នាំៗនោះ។
ការបង្ហាញនូវទិន្នន័យសត្វដែលសម្លាប់មនុស្សច្រើនជាងគេនេះ គឺត្រូវបានធ្វើឡើងបន្ទាប់ពីលោក ប៊ីល ហ្គេត បានមកកាន់ខេត្តប៉ៃលិនប្រទេសកម្ពុជា ដើម្បីពិនិត្យពីដំណើរការគម្រោងសុខភាពនៃមូលនិធិ Bill&Melinda Gates Foundation ក្នុងទិសដៅលុបបំបាត់ជំងឺគ្រុនចាញ់នៅក្នុងប្រទេសកម្ពុជា។
លោក ប៊ីល ហ្គេត បានសរសេរនៅក្នុងប្លុករបស់លោកថា៖«ប្រសិនបើយើងអាចលុបបំបាត់ជំងឺគ្រុនចាញ់នៅកម្ពុជា យើងមិនអាចត្រឹមតែជួយសង្គ្រោះជីវិតប្រជាជនកម្ពុជាប៉ុណ្ណោះទេ យើងថែមទាំងអាចរារាំងការរាលដាលទៅកាន់កន្លែងផ្សេងទៀត»៕
© រក្សាសិទ្ធិដោយ thmeythmey.com