កីឡាអន្តរជាតិ
អន្តរជាតិ
Atletico Madrid ឈ្នះពាន La Liga ខណៈគ្រូបង្វឹក Barcelona ចាកចេញ
× Atletico Madrid បានឈ្នះពានរង្វាន់ក្របខណ្ឌកីឡាបាល់ទាត់កំពូលរបស់អេស្ប៉ាញ (La Liga) ជាលើកទី១០ កាលពីថ្ងៃសៅរ៍ ប៉ុន្តែ ជាលើកទី១ក្នុងរយៈពេល១៨ឆ្នាំ ក្រោយពីបានធ្វើការវាយបកដេញតាមពីក្រោយដើម្បីបញ្ចប់ក្នុងលទ្ធផលស្មើ ១-១ នៅលើទឹកដីរបស់ក្រុមប្រជែងដណ្តើមពាន Barcelona។ ការខកខានលើកពានរបស់ Barcelona បាននាំឲ្យលោក Gerardo Martino ប្រកាសចាកចេញពីតួនាទីជាអ្នកចាត់ការទូទៅរបស់ក្លិបយក្សអេស្ប៉ាញមួយនេះ។
ការស៊ុតបាល់បញ្ចូលទីយ៉ាងល្អរបស់ខ្សែប្រយុទ្ធ Alexis Sanchez បានជួយឲ្យ Barcelona នាំមុខនៅនាទី ទី៣៣ ប៉ុន្តែ ការតែតបាល់បញ្ចូលទីរបស់កីឡាករ Diego Godin នៅនាទី ទី៤នៃតង់ទី២ គ្រប់គ្រាន់ក្នុងការធ្វើឲ្យ Atletico ទទួលបានពិន្ទុដែលពួកគេត្រូវការដើម្បីក្លាយជាក្រុមទី១ដែលមានមិនមែនជាក្រុម Barcelona និង Real Madrid ក្នុងការឈ្នះពាន La Liga ក្នុងរយៈពេល១០ឆ្នាំ។
ការទទួលបានមួយពិន្ទុដូចគ្នាសម្រាប់ក្រុមទាំងពីរ បានធ្វើឲ្យ Barcelona បញ្ចប់រដូវកាលដោយឈរនៅលើក្រុមលេខ៣ Real Madrid ដោយមាន៨៧ពិន្ទុដូចគ្នា ខណៈដែល Atletico របស់លោក Diego Simeone រកបាន៩០ពិន្ទុ។
ដោយឡែកការចាកចេញរបស់លោក Martino ត្រូវបានប្រកាសភ្លាមៗ បន្ទាប់ពី Barcelona ខកខានឱកាសលើកពាន។ លោក Martino ដែលបានដឹកនាំ Barcelona ចាប់តាំងពីខែកក្កដា ឆ្នាំ២០១៣ មកនោះ បានថ្លែងអំណរគុណដល់អ្នកគាំទ្រ និងថ្នាក់ដឹកនាំក្លិបដែលបានទុកចិត្តលើលោកនារយៈពេលកន្លងមក៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com