កីឡាអន្តរជាតិ
អន្តរជាតិ
FIFA ប្រឈមមុខការអំពាវនាវឲ្យលុបចោល World Cup នៅកាតា ក្រោយពីអំពើពុករលួយ
× មន្ត្រីជាន់ខ្ពស់របស់សហព័ន្ធកីឡាបាល់ទាត់អន្តរជាតិហៅកាត់ថា FIFA កំពុងតែធ្វើការពិចារណាជាលើកទី១ទៅលើការរៀបចំសាជាថ្មីទៅលើការបោះឆ្នោតសម្រាប់សិទ្ធិរៀបចំព្រឹត្តិការណ៍ World Cup ឆ្នាំ២០២២ ក្រោយពីមានការចោទប្រកាន់ស្តីពីអំពើពុករលួយថ្មីមួយប្រឆាំងនឹងប្រទេសម្ចាស់ផ្ទះកាតា។
ខណៈដែលរង់ចាំលទ្ធផលនៃការស៊ើបអង្កេតទៅលើការបោះឆ្នោតវគ្គពាក់កណ្តាលផ្តាច់ព្រ័ត្រក្នុងការប្រជែងដេញថ្លៃធ្វើជាម្ចាស់ផ្ទះនៃយុទ្ធនាការ World Cup ឆ្នាំ២០១៨ និង២០២២ មន្ត្រីកីឡាបាល់ទាត់ជាន់ខ្ពស់ដែលនឹងធ្វើដំណើរទៅចូលរួមព្រឹត្តិការណ៍ឆ្នាំ២០១៤ នៅប្រទេសប្រេស៊ីល ត្រូវបានគេយល់ឃើញថា នឹងពិចារណាទៅលើការឆ្លើយតបរបស់ពួកគេ ប្រសិនបើមានការណែនាំឲ្យមានការបោះឆ្នោតថ្មីមួយ ដោយផ្អែកទៅលើអ៊ីមែល និងឯកសារាប់លានស្តីពីសំណូក។
គណៈកម្មាធិការរៀបចំការប្រកួតរបស់កាតាសម្រាប់យុទ្ធនាការ World Cup ឆ្នាំ២០២២ នឹងជួបជាមួយនឹងលោក Michael Garcia មន្ត្រីស៊ើបអង្កេតរបស់ FIFA នៅថ្ងៃចន្ទនេះ ក្នុងប្រទេសអូម៉ង់។ នេះបើយោងទៅតាមទូរទស្សន៍ BBC។
នៅចក្រភពអង់គ្លេស មាននូវការខ្វល់ខ្វាយសារជាថ្មីពីសំណាក់អ្នកនយោបាយ និងអតីតប្រធានប្រតិបត្តិកីឡាបាល់ទាត់ ក្រោយពីកាសែត Sunday Times បានចោទប្រកាន់ថា លោក Mohamed bin Hammam សញ្ជាតិកាតា ដែលជាអតីតសមាជិកនៃគណៈកម្មាធិការប្រតិបត្តិរបស់ FIFA បានចំណាយប្រាក់៥លានដុល្លារអាមេរិកជាប្រាក់សុទ្ធ និងជាកាដូដល់មន្ត្រីជាន់កីឡាបាល់ទាត់ជាន់ខ្ពស់ដើម្បីជួយផ្តល់ការគាំទ្រជារួមគ្នាមួយពីក្រោយការដេញថ្លៃរបស់កាតា៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com