កីឡាជាតិ
ជាតិ
HBT៖ U21កម្ពុជាបាត់បង់ឱកាសទៅកាន់វគ្គ១/២ ក្រោយចាញ់វៀតណាម ៣-០
× ក្រុមកីឡាបាល់ទាត់ជម្រើសជាតិយុវជនអាយុក្រោម២១ឆ្នាំរបស់កម្ពុជា បានទទួលរងនូវការខកចិត្តនាការប្រកួតចុងក្រោយរបស់ខ្លួននៅក្នុងពូល B នៃព្រឹត្តិការណ៍ Hassanal Bolkiah Trophy នាល្ងាចថ្ងៃចន្ទនេះ ក្រោយបរាជ័យ ៣-០ ដោយសារវៀតណាមដែលប្រើប្រាស់ឈុត U19 ។
នាជំនួបនៅលើទីលាន Track & Field Sports Complex ក្នុងរាជធានីបង់ដារសិរិបេហ្គាវ៉ាននេះ ក្រុមកម្ពុជាត្រូវការឈ្នះជាដាច់ខាត ខណៈម្ចាស់ផ្ទះប្រ៊ុយណេ បានយកឈ្នះម៉ាឡេស៊ីនៅចុងម៉ោងក្នុងលទ្ធផល ២-១ ប៉ុន្តែអ្វីៗត្រូវបានបញ្ចប់សម្រាប់ក្រុមរបស់លោក Lee Tae Hoon។
ក្រុមកម្ពុជាបានអវត្តមានកីឡាករឆ្នើម៤រូបក្នុងជម្រើសដំបូងដែលក្នុងនោះមានប្រធានក្រុម គួច សុគម្ភៈ ខ្សែប្រយុទ្ធ ចាន់ វឌ្ឍនាកា ខ្សែបម្រើ ណុប តុលា និង សុះ ស៊ូហាណា។ នៅក្នុងតង់ទីមួយ យុវជនវៀតណាមបាននាំមុខ ២-០ ហើយពួកគេបន្ថែមបាន១គ្រាប់ទៀតនៅ១០នាទីចុងក្រោយមុននឹងបញ្ចប់ការប្រកួត។
ជ័យជម្នះនេះ បាននាំឲ្យវៀតណាម ចាប់ដៃជាមួយម៉ាឡេស៊ីក្នុងការឈានបន្តទៅវគ្គពាក់កណ្តាលផ្តាច់ព្រ័ត្រ ដោយម៉ាឡេស៊ីមាន១៣ពិន្ទុ វៀតណាមមាន១០ពិន្ទុ។ ម្ចាស់ផ្ទះប្រ៊ុយណេមានពិន្ទុស្មើវៀតណាម ប៉ុន្តែចាញ់ចំនួនគ្រាប់បាល់ស៊ុតបញ្ចូលទី ខណៈកម្ពុជាឈរនៅចំណាត់ថ្នាក់លេខបួនដោយមាន៩ពិន្ទុ។ នៅថ្ងៃដដែលឥណ្ឌូនេស៊ីបានយកឈ្នះសិង្ហបុរី ៦-០ ដើម្បីទទួលបាន៤ពិន្ទុត្រឡប់ទៅផ្ទះវិញ រីឯសិង្ហបុរីចាញ់ទាំង៥ប្រកួត។
សម្រាប់ការប្រកួតនៅវគ្គ១/២ផ្តាច់ព្រ័ត្រ ម៉ាឡេស៊ី ត្រូវជួបថៃដែលជាក្រុមលេខពីរពូល A ខណៈវៀតណាម ប៉ះក្រុមលេខមួយពូល A មីយ៉ាន់ម៉ា៕
© រក្សាសិទ្ធិដោយ thmeythmey.com