ជាតិ
នយោបាយជាតិ
កងវិស្វកម្ម១៨៤នាក់ ត្រូវបញ្ជូនទៅធ្វើបេសកម្មមនុស្សធម៌នៅលីបង់
× នៅព្រឹកថ្ងៃទី១៨ខែធ្នូនេះ កងកម្លាំងវិស្វកម្មចំនួន១៨៤នាក់ ដែលក្នុងចំណោមនោះមានស្ត្រី១១នាក់ ត្រូវបានបញ្ជូនទៅប្រទេសលីបង់ដើម្បីអនុវត្តការងារសាងសង់ផ្នែកវិស្វកម្មសំណង់ស៊ីវិល ដោះមីនដោយដៃ និងដោយគ្រឿងចក្រ។ ពិធីជូនដំណើរកម្លាំងរក្សាសន្តិភាពរបស់កម្ពុជា ត្រូវបានរៀបចំធ្វើនៅមូលដ្ឋានទ័ពអាកាស ក្រោមវត្តមានរបស់អ្នកស្រី Clair Van Der Vaeren អ្នកសម្របសម្រួលនៃអង្គការសហប្រជាជាតិប្រចាំកម្ពុជា និងលោកនាយឧត្តមសេនីយ៍ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ។
អ្នកសម្របសម្រួលនៃអង្គការសហប្រជាជាតិប្រចាំកម្ពុជា អ្នកស្រី Clair Van Der Vaeren បានថ្លែងនៅក្នុងពិធីបញ្ជូនកងកម្លាំងរក្សាសន្តិភាពរបស់កម្ពុជានៅព្រឹកថ្ងៃព្រហស្បតិ៍នេះថា៖«ភារកិច្ចដែលកម្ពុជាបានចូលរួមនេះ បានឆ្លុះបញ្ចាំងអោយឃើញពីភាពជោគជ័យដ៏ត្រចះត្រចង់របស់កម្ពុជាលើឆាកអន្តរជាតិ ហើយវាក៏ជាកិត្តិយសដ៏ធំធេងរបស់កម្ពុជាដែលជាប្រទេសមួយប្រកបដោយសន្តិភាព សន្តិសុខ និងមិត្តភាព។ តាមរយៈការចូលរួមចំណែកក្នុងបេសកកម្មរក្សាសន្តិភាពរបស់អង្គការសហប្រជាជាតិ បានធ្វើឲ្យកម្ពុជាក្លាយជាប្រទេសគំរូមួយសម្រាប់ពិភពលោក»។
នេះគឺជាលើកទី៥ហើយ ដេលកម្ពុជាបានបញ្ជូនកងកម្លាំងវិស្វកម្មទៅប្រទេសលីបង់។ កម្ពុជាបានចូលរួមក្នុងសកម្មភាពរក្សាសន្តិភាពនេះ ផ្នែកមនុស្សធម៌នេះ តាំងពីឆ្នាំ២០០៦មក។ នាយឧត្តមសេនីយ៍ ប៉ុល សារឿន បានថ្លែងថា សមិទ្ធផលនេះបានឆ្លុះបញ្ចាំងពីឆន្ទៈដ៏មោះមុតរបស់រដ្ឋាភិបាលកម្ពុជាក្នុងការចូលរួមគាំទ្រវិស័យរក្សាសន្តិភាពមនុស្សធម៌ ដើម្បីស្វែងរកសុខសន្តិសភាព ជូនប្រជាជនក្នុងពិភពលោក៕
© រក្សាសិទ្ធិដោយ thmeythmey.com