ជាតិ
សង្គមជាតិ
អាកាសធាតុត្រជាក់នឹងអូសបន្លាយដល់ខែកុម្ភៈខាងមុខ
× អាកាសធាតុត្រជាក់នៅឆ្នាំនេះ នឹងអូសបន្លាយពេលរហូតដល់ពាក់កណ្ដាលខែកុម្ភៈឆ្នាំ២០១៥ខាងមុខ ។ ប៉ុន្ដែអាកាសធាតុត្រជាក់នេះ មិនត្រជាក់ខ្លាំងជាប់គ្នារហូតនោះទេ ពោលគឺបានន័យថា ការត្រជាក់មានស្ថានភាពឡើង ហើយចុះវិញ ។ នេះបើតាមការបញ្ជាក់ពីលោក ចាន់ យុត្ថា អ្នកនាំពាក្យ និងជានាយកខុទ្ធកាល័យក្រសួងធនធានទឹក និងឧត្តុនិយម ថ្លែងប្រាប់សារព័ត៌មានថ្មីនៅព្រឹកថ្ងៃទី២០ធ្នូនេះ។
បើតាមលោក ចាន់ យុត្ថា នៅថ្ងៃទី២៣ធ្នូ អាកាសធាតុត្រជាក់នឹងមានស្ថានភាពធម្មតាវិញ។ ប៉ុន្ដែមិនមែនធម្មតារហូតនោះទេ «អាកាសធាតុនេះ គឺវានឹងថមថយមកវិញនៅថ្ងៃទី២៣ធ្នូ តែមិនមែនអត់រងារនោះទេ គឺពេលខ្លះត្រជាក់ខ្លាំង និងពេលខ្លះមិនសូវត្រជាក់។ ហើយអាកាសធាតុនេះ នឹងបន្ដទៅដល់ពាក់កណ្ដាលខែកុម្ភៈខាងមុខ»។
លោក ចាន់ យុត្ថា បន្ថែមថា អាកាសធាតុជាក់នេះ គឺមានស្ថានភាពត្រជាក់ខ្លាំងគួកត់សម្គាល់ជាងរាល់ឆ្នាំ ជាពិសេសគឺនៅតំបន់ជួរភ្នំ។
កន្លងមកក្រសួងធនធានទឹក និងឧត្តុនិយម បានជូនដំណឹងថា នៅតំបន់ជួរភ្នំ និងតំបន់ខ្ពង់រាប រួមមាន តំបនជួរភ្នំដងរែក ខេត្តឧត្តរមានជ័យ ព្រះវិហារ មណ្ឌលគីរី និងរតនៈគីរី មានសីតុណ្ហភាពអប្បបមារ មានពី១៥-១៧ អង្សាសេ សីតុណ្ហភាពអតិបរមា ពី២៥ ទៅ២៧ អង្សាសេ និងតាមតំបន់ផ្សេងៗទៀតមានសីតុណ្ហភាពទាបជាងនេះ ឬ ខ្ពស់ជាងនេះផងដែរ៕
© រក្សាសិទ្ធិដោយ thmeythmey.com