ជាតិ
សង្គមជាតិ
ថ្នាក់ដឹកនាំបណ្តាញសង្គមរបស់លោក កែម ឡី ជួបគ្នានៅថ្ងៃទី២៧ធ្នូ២០១៤
× ភ្នំពេញ៖ បណ្តាញសង្គម«ខ្មែរដើម្បីខ្មែរ»គ្រោងជួបគ្នានៅថ្ងៃទី២៧ខែធ្នូឆ្នាំ២០១៤ខាងមុខនេះ នៅទីក្រុងភ្នំពេញ។ រីឯគណបក្សមូលដ្ឋានដែលផ្តួចផ្តើមគំនិតដោយលោក កែម ឡី អ្នកស្រាវជ្រាវសង្គម និងលោក យ៉ង់ សាំងកុមារ នាយកអង្គការកសិកម្មសេដាក់ នឹងចាប់ផ្តើមដំណើរការនៅដើមឆ្នាំ២០១៥ ខាងមុខនេះ៕
សមាជិកបណ្តាញសង្គមរបស់លោក កែម ឡី អ្នកស្រាវជ្រាវសង្គមគ្រោងនឹងជួបជុំគ្នាជាលើកដំបូង ផ្លូវការនៅថ្ងៃទី២៧ខែធ្នូឆ្នាំ២០១៤ខាងមុខនេះ នៅទីក្រុងភ្នំពេញ។ នេះគឺជាលើកទី១ហើយដែលសមាជិកបណ្តាញសង្គម«ខ្មែរដើម្បីខ្មែរ»សម្រេចជួបជុំគ្នាជាផ្លូវការក្រោយពេលដែលមានលេចលឺព័ត៌មានជាច្រើនជុំវិញការបង្កើតគណបក្សមូលដ្ឋានដែលអាចដឹកនាំដោយលោក កែម ឡី និងលោក យ៉ង់ សាំងកុមារ នាយកអង្គការកសិកម្មសេដាក់។
លោក កែម ឡី បានថ្លែងប្រាប់នៅថ្ងៃសៅរ៍នេះថា សមាជិកប្រមាណជា១៥០ នឹងចូលរួមកិច្ចប្រជុំលើកទី១របស់បណ្តាញសង្គម។ នៅដើមឆ្នាំ២០១៥ ខាងមុខនេះ គណបក្សមូលដ្ឋានចំនួន២៥ឃុំនឹងចាប់ផ្តើមដំណើការ មុននឹងឈានទៅចុះឈ្មោះជាផ្លូវការដើម្បីចូលរួមការបោះឆ្នោតឃុំសង្កាត់ឆ្នាំ២០១៧ និងបោះឆ្នោតជាតិនៅឆ្នាំ២០១៨ ។
លោក កែម ឡី និងលោក យ៉ង់ សាំងកុមារ ដែលជាអ្នកផ្តួចផ្តើមគំនិតអោយបង្កើតគណបក្សមូលដ្ឋានធ្លាប់បានបដិសេធថា លោកទាំងពីរនាក់នឹងមិនក្លាយខ្លួនទៅជាប្រធានគណបក្សថ្មីនោះទេ។ អ្វីដែលលោកទាំងពីរនាក់កំពុងធ្វើ គឺគ្រាន់តែបង្រៀនពលរដ្ឋអោយចេះចូលរួមក្នុងសកម្មភាពនយោបាយតែប៉ុណ្ណោះ៕
© រក្សាសិទ្ធិដោយ thmeythmey.com