អន្តរជាតិ
នយោបាយអន្តរជាតិ
Air Asia៖ Pilot បានស្នើសុំចាកចេញពីផ្លូវហោះហើរ ដោយសារអាកាសធាតុអាក្រក់ ចំនុចខ្វែងក្រហម ជាកន្លែងដែលយន្តហោះបាត់ការទាក់ទង
× គេនៅទាន់រកឃើញយន្តហោះនៃក្រុមហ៊ុន Air Asia ដែលបានបាត់ទាក់ទងកាលពីព្រឹកថ្ងៃអាទិត្យនេះនៅឡើយទេ ប៉ុន្តែព័ត៌មានចុងក្រោយមួយដែលប្រកាសដោយក្រុមហ៊ុនAir Asia ផ្សាយថា អ្នកបើកយន្តហោះនោះបានស្នើសុំចាកចេញពីផ្លូវហោះហើររបស់ខ្លួន ដោយសារតែផ្លូវហោះហើររបស់ខ្លួនមានអាកាសធាតុអាក្រក់។
លោក ជាវ សំណាង លម្អិតព័ត៌មាននេះ
រហូតដល់រសៀលថ្ងៃអាទិត្យនេះ គេនៅតែមិនទាន់រកឃើញយន្តហោះនៃក្រុមហ៊ុន Air Asia ដែលបានចាកចេញពីក្រុង Surabaya នៃប្រទេសឥណ្ឌូនេស៊ីទៅប្រទេសសិង្ហបុរី ហើយដែលបាត់ការទាក់ទងនោះ នៅឡើយទេ។ ក្រុមហ៊ុនអាកាសចរណ៍ Air Asia បានផ្សាយឲ្យដឹងថា មុនការបាត់ ការទាក់ទងគ្នានេះ អ្នកបើកយន្តហោះបានស្នើសុំមកមូលដ្ឋានចរាចរណ៍ផ្លូវការអាកាសរបស់ឥណ្ឌូនេស៊ី ដើម្បីចាកចេញពីផ្លូវហោះហើររបស់ខ្លួនដោយសារអាកាសធាតុអាក្រក់។ នេះបើយោងតាមការផ្សាយរបស់សារព័ត៌មាន Channel News Asia។
គួរបញ្ជាក់ថា មានមនុស្សសរុប១៦២នាក់នៅក្នុងយន្តហោះដែលបានបាត់ដំណឹងនោះ ដោយក្នុងនោះរួមមាន៖ អ្នកដំណើរ១៥៥នាក់ អ្នកបើកយន្តហោះ២នាក់ និងក្រុមអ្នកបម្រើលើយន្តហោះចំនួន៥នាក់។ ហើយក្នុងចំណោមជនរងគ្រោះនៅលើយន្តហោះនោះ មានជនជាតិឥណ្ឌូនេស៊ី១៥៦នាក់ ជនជាតិកូរ៉េខាងត្បូង៣នាក់ ជនជាតិបារាំង១នាក់ ជនជាតិម៉ាឡេស៊ី ១នាក់ និងជនជាតិសឹង្ហបុរី១នាក់។
នាយករដ្ឋមន្ត្រីម៉ាឡេស៊ី និងនាយករដ្ឋមន្ត្រីនៃប្រទេសសឹង្ហបុរី ដែលបានចែករំលែកការព្រួយបារម្ភជាមួយក្រុមគ្រួសារអ្នកដំណើរទាំង១៦២នាក់នោះ បានប្រកាសផ្តល់ជំនួយសម្រាប់ប្រតិបត្តិការស្វែងរកយន្តហោះបាត់ដំណឹងនោះ។
យន្តហោះនៃក្រុមហ៊ុន Air Asia ជើងហោះហើរលេខ QZ8501 បានចាកចេញពីទីក្រុង Surabaya នៃប្រទេសឥណ្ឌូនេស៊ីនៅម៉ោង ៥និង៣៥នាទីព្រឹកថ្ងៃអាទិត្យនេះ ហើយបានបាត់ការទាក់ទងនៅម៉ោង៧និង២៤នាទី៕
© រក្សាសិទ្ធិដោយ thmeythmey.com