ជាតិ
នយោបាយជាតិ
យុវជននៅតែបញ្ចេញទស្សនៈផ្សេងគ្នា ចំពោះទិវា ៧មករា
× ថ្ងៃ ៧មករា ឆ្នាំ១៩៧៩-២០១៥ ជាខួបលើកទី៣៦នៃការអបអរថ្ងៃជ័យជម្នះលើរបបប្រល័យពូជសាសន៍ ប៉ុល ពត។ យុវជនកម្ពុជាមួយចំនួនបានបញ្ចេញទស្សនៈផ្សេងៗគ្នា ទាក់ទងនឹងថ្ងៃទី៧មករានេះ។
«៧មករា ជាថ្ងៃកំណើតទីពីររបស់ប្រជាពលរដ្ឋខ្មែរដែលរួចផុតពីរបបប៉ុលពត»។ នេះជាការលើកឡើងរបស់ យុវតី ឆាំង ម៉ារ៉ុង ជានិស្សិតសង្គមវិទ្យាឆ្នាំទី៣ នៃសាកលវិទ្យាល័យភូមិន្ទភ្នំពេញ។ កញ្ញា ឆាំង ម៉ារ៉ុង បានបន្ថែមថា៖«ប្រជាជនកម្ពុជាមិនគួរមើលរំលងថ្ងៃជ័យជម្នះ៧មករាឆ្នាំ១៩៧៩នោះទេ ព្រោះជាថ្ងៃដែលធ្វើឲ្យប្រជាជនខ្មែរទូទាំងប្រទេសរួចផុតពីរបបប្រល័យពូជសាសន៍កម្ពុជាប្រជាធិបតេយ្យ ដែលជារបបដែលកាប់ សម្លាប់ប្រជាជនខ្លួនឯងយ៉ាងព្រៃផ្សៃនោះ»។
យុវជន ម៉េង សុធារិទ្ធ ជាបុគ្គលិកក្រុមហ៊ុនឯកជនមួយ បានរៀបរាប់ថា ការរំលឹកគុណថ្ងៃ៧មករា ជាការល្អ។ យុវជនរូបនេះ បាននិយាយថា៖«ប្រសិនបើមិនមានថ្ងៃ៧ មករាទេនោះ ប្រទេសកម្ពុជា ក៏មិនមានសុខ សន្តិភាព ប្រជាជនមានភាពសម្បូរណ៍សប្បាយ ប្រទេសមានការអភិវឌ្ឍ និងរីកចម្រើនដូចសព្វថ្ងៃនេះដែរ»។
«ថ្ងៃ៧កមរា គឺជាថ្ងៃធម្មតាសម្រាប់ខ្ញុំ»។ នេះជាទស្សនៈរបស់កញ្ញាឧសភា។ ឧសភា ដែលជាបុគ្គលិកក្រុមហ៊ុនធនាគារក្នុងរាជធានីភ្នំពេញ បានរៀបរាប់ថា៖«ខ្ញុំគិតថា វាជាថ្ងៃធម្មតា ខ្ញុំមិនសូវចាប់អារម្មណ៍ឡើយ។ ខ្ញុំគឺជាក្មេងជំនាន់ក្រោយមិនបានឆ្លងកាត់ទិដ្ឋភាពជាក់ស្តែងកាលសម័យនោះ ដូច្នេះហើយទើបបានជា មិនសូវមានរូបភាពដែលអាចធ្វើឱ្យដក់ជាប់នៅក្នុងអារម្មណ៍នោះទេ»។
អ្នកដែលមិនចាប់អារម្មណ៍ទិវា៧មករាដែលរម្លឹកឡើងដោយគណបក្សប្រជាជនកម្ពុជានោះ ក៏មានយុវជន លាងហេង អាយុ២៤ឆ្នាំដែរ។ អតីតនិស្សិតផ្នែកសេដ្ឋកិច្ចរូបនេះបានពន្យល់ថា៖« ថ្ងៃ៧មករា គឺមិនសូវមានសារៈសំខាន់ខ្លាំងសម្រាប់ខ្ញុំនោះទេ ដោយសារតែខ្ញុំមិនសូវបានដឹងច្បាស់អំពីប្រវត្តិទាក់ទងនឹងថ្ងៃ៧មករានេះ ថាវាបានកើតឡើងយ៉ាងដូចម្តេច? ហើយតាមការស្រាវជ្រាវរបស់ខ្ញុំកន្លងមកក៏មិនមានឯកសារណាមួយនិយាយឱ្យលំអិតអំពីប្រវត្តិសាស្ត្រនៅក្នុងពេលនោះ»។ យុវជនកូនកាត់ចិនរូបនេះ បានបន្តថា៖ «ប្រវត្តិសាស្ត្រមានអាថ៌កំបាំងច្រើនណាស់។ យុវជន ត្រូវស្វែងយល់ពីប្រវត្តិសាស្ត្ររបស់ខ្លួនឱ្យបានច្បាស់ មុននឹងជឿជាក់លើព្រឹត្តិការណ៍អ្វីមួយ ហើយរាជរដ្ឋាភិបាលក៏មិនគួរមានចេតនាលាក់លៀមប្រវត្តិសាស្ត្រជាតិខ្លួននោះដែរ»។
សម្រាប់កញ្ញា ម៉ារ៉ុងវិញ បើទោះបីជាខ្លួនបានលើកសរសើរ និងដឹងគុណថ្ងៃ៧មករា ក៏ដោយ ក៏យុវតីវ័យ២១ឆ្នាំរូបនេះ អំពាវនាវដល់គណបក្សប្រជាជនកម្ពុជាដែលកំពុងដឹកនាំរដ្ឋាភិបាលបច្ចុប្បន្ន យកសមិទ្ធផលនានា ទៅប្រៀបធៀបតែជាមួយឆ្នាំ១៩៧៩ រហូតនោះទេ។ «ប៉ុន្តែរដ្ឋាភិបាលត្រូវធៀបទៅនឹងប្រទេសដទៃទៀតដែលធ្លាប់ធ្លាក់ក្នុងសង្គ្រាមរ៉ាំរ៉ៃ ប៉ុន្តែក្រោយមក ប្រទេសទាំងនោះបានអភិវឌ្ឍខ្លួនយ៉ាងលឿន»។ នេះជាការអំពាវនាវរបស់និស្សិតម៉ារ៉ុង៕
© រក្សាសិទ្ធិដោយ thmeythmey.com