ជាតិ
នយោបាយជាតិ
កម្ពុជាថ្កោលទោសការវាយប្រហារទីស្នាក់ការទស្សនាវដ្តី Charlie Hebdo
× លោកនាយករដ្ឋមន្ត្រី ហ៊ុន សែន និងរដ្ឋមន្ត្រីការបរទេសកម្ពុជាលោក ហោ ណាំហុងផ្ញើសាររំលែកទុក្ខពីរផ្សេងគ្នាទៅកាន់មេដឹកនាំនៃប្រទេសបារាំង បន្ទាប់ពីមានសោកនាដកម្មសម្លាប់អ្នកកាសែត និងប៉ូលីស១២នាក់។
លោក ហ៊ុន សែន នាយករដ្ឋមន្ត្រីកម្ពុជា បានផ្ញើសាររំលែកទុក្ខទៅសមភាគីបារាំងលោក Manuel Valls ជាមួយនឹងការថ្លែងថ្កោលទោសយ៉ាងខ្លាំងបំផុត ការវាយប្រហារពីសំណាក់ភេរវករ ដែលបានវាយប្រហារទីស្នាក់ការទស្សនាវដ្តី ឆាលី ហេបដូ (Charlie Hebdo) កាលពីថ្ងៃទី៧ ខែមករា ឆ្នាំ២០១៥ ។ នៅក្នុងលិខិតចុះថ្ងៃទី៨មករា លោក ហ៊ុន សែន បានសរសេរ ថា៖«ទង្វើដ៏ឃោរឃៅរបស់ ពួកជ្រុលនិយម វាក៏ជាការវាយប្រហារផងដែរប្រឆាំងនឹងលទ្ធិប្រជាធិបតេយ្យ និង សេរីភាព អ្នកកាសែត»។
នៅក្នុងសាររំលែកទុក្ខរបស់ប្រមុខការទូតកម្ពុជា លោកឧបនាយករដ្ឋមន្ត្រី ហោ ណាំហុងបានសរសេរផ្ញើទៅកាន់សមភាគីបារាំងលោក ឡូរ៉ង់ ហ្វាប្យ៊ូស ក្នុងអត្ថន័យស្រដៀងនឹងលោកនាយករដ្ឋមន្ត្រីដែរ៖«ខ្ញុំសូមថ្កោលទោសយ៉ាងខ្លាំងក្លាចំពោះការវាយប្រហារ របស់ភេរវករប្រឆាំងនឹងទីស្នាក់ការទស្សនាវដ្តី ឆាលី អេបដូ។ ក្នុងពេលដ៏ឈឺចាប់នេះ ខ្ញុំសូមសំដែងនូវការរំលែកទុក្ខដ៏ក្រៀមក្រំ ជូនចំពោះក្រុមគ្រួសារ សាច់ញាតិនៃជនរងគ្រោះ និងប្រទេសបារាំង»។
សារព័ត៌មានប្រចាំសប្តាហ៍បារាំង Charlie Hebdo នៅផ្លូវ Nicolas-Appert ក្នុងទីក្រុងប៉ារីស ប្រទេសបារាំង ត្រូវបានវាយប្រហារដោយក្រុមភេរវជន កាលពីរសៀលថ្ងៃទី៧ ខែមករា ហើយបានសម្លាប់មនុស្ស១២នាក់ដែលភាគច្រើនគឺជាអ្នកកាសែតល្បីឈ្មោះដែលក្នុងចំណោមនោះ ក៏អ្នកគូររូបត្លុក៥នាក់៕
© រក្សាសិទ្ធិដោយ thmeythmey.com