ជាតិ
នយោបាយជាតិ
គណបក្សអំណាចខ្មែរ៖ ការកាត់ទោសលោក សួន សេរីរដ្ឋា មិនប៉ះពាល់ដល់ការបង្កើតបក្សទេ
× អគ្គលេខាធិការ គណបក្សអំណាចខ្មែរលោក សៀង សុភារក្ស បានចេញសេចក្ដីប្រកាសព័ត៌មាន នៅថ្ងៃទី១៦មករានេះថា លោក សួន សេរីរដ្ឋា ប្រធានស្ថាបនិកអំណាចខ្មែរ ដែលត្រូវតុលាការសាលាដំបូងក្រុងភ្នំពេញ កាត់ទោសឲ្យជាប់ពន្ធនាគារ៧ឆ្នាំ និងពិន័យជាទឹកប្រាក់ចំនួន២៥លានរៀលនោះ គឺមិនប៉ះពាល់ដល់ការចុះបញ្ជីឈ្មោះ គណបក្សអំណាចខ្មែរ ទៅកាន់ក្រសួងមហាផ្ទៃឡើយ។
លោក សៀង សុភារក្ស បញ្ជាក់ថា តាមច្បាប់រដ្ឋធម្មនុញ្ញ នៃប្រទេសកម្ពុជា គឺមិនបានហាមប្រាម ឬបិទសិទ្ធិនយោបាយរបស់ប្រជាពលរដ្ឋណាម្នាក់ ក្នុងការបង្កើតគណបក្សនយោបាយឡើយ។ ហើយលោកថា សាលក្រមសាលាដំបូងនាពេលនេះ មិនមែនជាសាលក្រមស្ថាពរបិទផ្លូវតវ៉ានេះទេ។ ដូចនេះលោក សួន សេរីរដ្ឋា មានសិទ្ធិប្ដឹងឧទ្ធរណ៍ ជំទាស់នឹងសាលក្រមនេះ។
សារព័ត៌មានថ្មីៗ មិនទាន់អាចទាក់ទងលោក ខៀវ សុភ័គ អ្នកនាំពាក្យក្រសួងមហាផ្ទៃ សុំការអត្ថាធិប្បាយជុំវិញបញ្ហានេះនៅឡើយនោះទេ។
តុលាការសាលាដំបូងរាជធានីភ្នំពេញកាលពីពេលថ្មីៗនេះបានចេញសាលក្រមសម្រេចកាត់ទោសលោក សួន សេរីរដ្ឋា ប្រធានស្ថាបនិកអំណាចខ្មែរ ឲ្យជាប់ពន្ធនាគារ៧ឆ្នាំ និងពិន័យជាទឹកប្រាក់ចំនួន២៥លានរៀល និងចេញដីការតាមចាប់ខ្លួនផងដែរ ដោយចោទប្រកាន់លោក សួន សេរីរដ្ឋា ពីបទរួមគំនិតក្បត់ជាតិក្នុងអំឡុងពេលបោះឆ្នោតតំណាងរាស្ត្រ កាលពីខែកក្កដាឆ្នាំ២០១៣កន្លងទៅ៕
© រក្សាសិទ្ធិដោយ thmeythmey.com