ជាតិ
សង្គមជាតិ
លោក ហង់ ជួនណារ៉ុន៖ កង្វះអាហាររូបត្ថម្ភ នៅតែជាបញ្ហាប្រឈមមួយនៅកម្ពុជា
× ក្រសួងអប់រំយុវជន និងកីឡា បានរៀបចំសិក្ខាសាលាពិគ្រោះយោបល់ក្របខណ្ឌលទ្ធផលសម្រាប់ផែនការសកម្មភាពជាតិ ស្តីពីការគាំពារ និងអភិវឌ្ឍន៍កុមារតូចឆ្នាំ២០១៤-២០១៨ ។ សិក្ខាសាលានេះ បានចាប់ផ្តើមតាំងពីថ្ងៃទី១៥ខែកមរា នៅសណ្ឋាគារអប្សរាអង្គរ ក្រុងសៀមរាប និងបញ្ចប់នៅថ្ងៃទី១៧ខែមករានេះ។
សិក្ខាសាលានេះ រៀបចំឡើងក្នុងគោលបំណងបង្ហាញសេចក្តីព្រាងក្របខណ្ឌលទ្ធផលសម្រាប់ផែនការសកម្មភាពជាតិ ស្តីពីការគាំពារ និងអភិវឌ្ឍន៍កុមារតូចឆ្នាំ២០១៤-២០១៨ និងផ្តល់ធាតុចូលរួមបន្ថែម ពីសំណាក់ថ្នាក់ដឹកនាំ និងមន្ត្រីជំនាញរបស់ក្រសួង-ស្ថាប័ន និងដៃគូអភិវឌ្ឍន៍ពាក់ព័ន្ធនានា ដើម្បីរៀបចំសេចក្តីព្រាងចុងក្រោយសម្រាប់ដាក់ជូនគណៈកម្មាធិការជាតិពិនិត្យ និងអនុម័តនាពេលឆាប់ៗខាងមុខ។
ថ្លែងនៅក្នុងសិក្ខាសាលានោះ លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បានមានប្រសាសន៍ថា៖«កង្វះអាហាររូបត្ថម្ភ នៅតែជាបញ្ហាប្រឈមចម្បងមួយនៅក្នុងប្រទេសកម្ពុជា»។ នៅឆ្នាំ២០១០ មានកុមារកម្ពុជាប្រមាណ៤០ភាគរយ ស្ថិតក្នុងស្ថានភាពក្រិន ដែលតួលេខនេះ បានធ្វើឱ្យកម្ពុជា ស្ថិតនៅក្នុងប្រទេសមួយ ដែលមានអត្រាកុមារក្រិនខ្ពស់នៅក្នុងតំបន់។
លោករដ្ឋមន្ត្រី បានមានប្រសាសន៍បន្តថា៖«កុមារក្រិនរៀនមិនសូវពូកែទេ ដោយសារតែពួកគេទទួលរងការខូចខាតប្រព័ន្ធស្រូបយកចំណេះដឹង និងមានកុមារប្រមាណ២.៣០០នាក់ បានបាត់បង់ជីវិតក្នុងមួយឆ្នាំៗ ដោយសារតែមានជំងឺរាករូស ព្រោះផឹកទឹកមិនស្អាត និងគ្មានអនាម័យគ្រប់គ្រាន់ ដែលជាហេតុធ្វើឱ្យមានបញ្ហាខ្សោយពោះវៀន និងធ្វើឱ្យពួកគេពិបាកក្នុងការស្រូបយកសារធាតុចិញ្ចឹមានានា»។
បើតាមការអង្កេតសុខភាពនៅឆ្នាំ២០១០ អត្រាមរណភាពទារកមានការថយចុះ ពី៩៥មកនៅ៤៥ករណីក្នុង១ពាន់កំណើតរស់ ហើយអត្រាមរណភាពកុមារអាយុក្រោម៥ឆ្នាំ មានការថយចុះពី ១២៤មក៥៤ករណី ក្នុង១ពាន់កំណើតរស់។ ដោយឡែក របាយការណ៍របស់ក្រសួងសុខាភិបាល ក្នុងឆ្នាំ២០១៣កន្លងទៅ ក៏បានបង្ហាញថា ស្ត្រីមានគភ៌ដែលបានសម្រាលកូន នៅមូលដ្ឋានសុខាភិបាលមានការកើនឡើងយ៉ាងច្រើនគឺពី៣៩ភាគរយនៅឆ្នាំ២០០៨ ទៅដល់៨០ភាគរយនៅឆ្នាំ២០១៣ ៕
© រក្សាសិទ្ធិដោយ thmeythmey.com