ជាតិ
សង្គមជាតិ
សង្គមស៊ីវិលស្នើឱ្យរដ្ឋាភិបាលបង្កើតគោលនយោបាយច្បាស់លាស់ចំពោះពន្ធប្រាក់ខែ
×![]()
ដោយ: ខន ចំប៉ា
កាលពីពេលថ្មីៗនេះ នាយដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានចេញសេចក្តីជូនដំណឹងមួយស្តីពីការអនុវត្តបទប្បញ្ញត្តិស្តីពីពន្ធលើប្រាក់បៀរវត្សដែលបានកែប្រែសម្រាប់ឆ្នាំ២០១៥ ។ ការបង់ពន្ធគឺជាកាតព្វកិច្ចរបស់ប្រជាពលរដ្ឋ ប៉ុន្តែមានសំណួរជាច្រើនបានចោទសួរថា តើប្រជាពលរដ្ឋនឹងទទួលបានផលប្រយោជន៍អ្វីខ្លះ ពីការបង់ពន្ធនេះ? ដោយឡែកអង្គការសង្គមស៊ីវិល ក៏បានបង្ហាញក្តីបារម្ភផងដែរ។
លោក រុង ឈុន ប្រធានសមាគមគ្រូបង្រៀនកម្ពុជាឯករាជ្យ បានបញ្ចេញទស្សនៈថានយោបាយយកប្រាក់ពន្ធលើប្រាក់បៀវត្សរ៍របស់រដ្ឋាភិបាលធ្វើឱ្យប្រជាពលរដ្ឋមានភាពស្រពិចស្រពិល និងមិនពេញចិត្ត។ លោក រុង ឈុន បានពន្យល់ថា៖«រដ្ឋាភិបាលមិនបានបង្ហាញឱ្យច្បាស់លាស់ថា តើប្រាក់ពន្ធកាត់ពីមន្ត្រីរាជការសាធារណៈ និងឯកជននោះ នឹងយកទៅទ្រទ្រង់ ឬចំណាយលើវិស័យណាមួយឱ្យពិតប្រាកដ ហើយថាតើវាមានប្រសិទ្ធិភាពកម្រិតណា? ដើម្បីឆ្លើយតបទៅនឹងតម្រូវការរបស់ប្រជាពលរដ្ឋវិញ»។
«រដ្ឋាភិបាលត្រូវតែមានវិធានការ ឬគោលនយោបាយឱ្យបានច្បាស់លាស់ ក្នុងការចាត់ចែងប្រាក់ពន្ធលើប្រាក់បៀវត្សរ៍នេះ ដើម្បីធានាឱ្យមានតម្លាភាព និងការជឿទុកចិត្តពីប្រជាពលរដ្ឋ»។ នេះជាការលើកឡើង របស់ លោក ព្រាប កុល នាយកប្រតិបត្តិអង្គការតម្លាភាពកម្ពុជា។ លោក ព្រាប កុល បានបន្ថែមថា អ្វីដែលលោកចង់ឃើញពីគោលនយោបាយប្រមូលពន្ធលើប្រាក់បៀវត្សរ៍នេះ គឺរដ្ឋាភិបាលត្រូវតែមានតម្លាភាព និងប្រសិទ្ធិភាពក្នុងការផ្តល់សេវាសាធារណៈដែលជាផលប្រយោជន៍ទៅដល់ប្រជាពលរដ្ឋ ដែលធ្វើការក្នុងវិស័យឯកជន ក៏ដូចជាអង្គការសង្គមស៊ីវិល។
ចំណែកឯលោក វន ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធបានមានប្រសាសន៍ប្រាប់សារព័ត៌មានថ្មីៗនៅថ្ងៃនេះថាថ្វីដ្បិតតែលុយពន្ធត្រូវចូលជាថវិការដ្ឋមែន ប៉ុន្តែក្នុងនាមលោក ក៏ដូចជាប្រជាពលរដ្ឋទូទៅបារម្ភថា នឹងមិនទទួលបានផលប្រយោជន៍ សមស្របទៅតាមអ្វីដែលខ្លួនបានបង់ពន្ធជូនរដ្ឋ។ លោក វន ពៅបញ្ជាក់បន្ថែមថា ៖«រដ្ឋាភិបាលត្រូវធានាឱ្យប្រាកដថា ប្រាក់ពន្ធដែលរដ្ឋាភិបាលកាត់ពីមន្ត្រីរាជការ និងឯកជន ពិតជាបានចូលទៅក្នុងថវិការដ្ឋ និងប្រាក់ទាំងអស់នោះ ទៅបម្រើដល់ប្រជាពលរដ្ឋវិញ តាមរយៈការផ្តល់សេវាសាធារណៈនានា កសាងហេដ្ឋារចនាសម្ព័ន្ធ ឬជួយទំនុកបំរុងជាប្រាក់កាសនៅពេលដែលពលរដ្ឋគ្មានការងារធ្វើដូចនៅបរទេសជាដើម»។
មិនមែនតែសង្គមស៊ីវិលនោះទេ ដែលបានបង្ហាញក្តីបារម្ភ ចំពោះនយោបាយយកពន្ធខាងលើនេះ សូម្បីតែ បុគ្គលិកក្រុមហ៊ុនឯកជន និងម្ចាស់អាជីវកម្មមួយចំនួនក៏បានលើកឡើងពីកង្វល់របស់ខ្លួនដែរ។
ប្រធានក្រុមហ៊ុនឯកជនមួយនៅទីក្រុងភ្នំពេញដែលសុំមិនអោយបញ្ចេញឈ្មោះ ប្រតិកម្មថា ក្រុមហ៊ុនរបស់លោកបង់ពន្ធប្រាក់ខែជាប្រចាំជូនរដ្ឋ។ ប៉ុន្តែ ពួកគេមិនដឹងថា តើត្រូវទទួលបានអ្វីមកវិញ នៅពេលដែលបុគ្គលិកបង់ពន្ធទាំងនោះមានបញ្ហា។នៅក្នុងប្រទេសអភិវឌ្ឍន៍ជឿនលឿន ដូចជា ប្រទេសអាមេរិក បារាំង។ល។ ពលរដ្ឋបង់ពន្ធលើប្រាក់ខែមែន ប៉ុន្តែត្រឡប់មកវិញ ពួកគេទទួលបានប្រាក់ចូលនិវត្តន៍ ឬទទួលបានប្រាក់កាសខ្លះនៅពេលពួកគេអត់មានការងារធ្វើជាដើម។ «ចុះនៅកម្ពុជាវិញ យើងទទួលបានអ្វីខ្លះ?»។ នេះគឺជាសំណួររបស់ម្ចាស់ក្រុមហ៊ុនខាងលើ។
លោក ប៉ែន សំណាង ធ្វើការអោយក្រុមហ៊ុនឯកជនមួយនៅទីក្រុងភ្នំពេញសម្តែងអារម្មណ៍មិនចង់បង់ពន្ធលើប្រាក់ខែទាល់តែសោះ ពីព្រោះ រូបគេមិនដឹងថា នឹងទទួលបានអ្វីមកវិញ។ លោកសួរសំណួរថា បើលោកបង់ តើលោកបានអ្វីមកវិញ?។ អ្នកស្រី ជា ដាណែត នាយកវិទ្យុស្ត្រី FM 102 បានត្អូញត្អែរនៅក្នុងគណនីយហ្វេសប៊ុករបស់អ្នកស្រីថា៖«ឆ្នាំថ្មី នេះ ខ្ញុំត្រូវបង់ពន្ធលើប្រាក់ខែដល់ទៅ២០ភាគរយ។ វាច្រើនហួសហេតុពេកហើយ...ព្រោះខ្ញុំមិនមានបានទទួលអ្វីពីរដ្ឋាភិបាលវិញទេនៅពេលរ៉ឺត្រែ ត...បើជាមន្ត្រីរាជការ ពួកគេនឹងបានលុយរ៉ឺត្រែត នៅពេលចាស់ឈប់ធ្វើការ»។
យោងតាមមាត្រា៤៧ថ្មី នៃច្បាប់ស្តីពីសារពើពន្ធ និយោជិតជានិវាសនជន ពោលគឺសំដៅលើបុគ្គលមានចំណូលទាំងក្នុង និងក្រៅប្រទេស ត្រូវបង់ប្រាក់ពន្ធប្រចាំខែ និងត្រូវកាត់ទុកដោយនិយោជក តាមអត្រាកំណើនតាមថ្នាក់។
ប្រាក់ពន្ធលើប្រាក់បៀវត្សរ៍ដែលនិវាសនជន ត្រូវបង់ប្រចាំខែនិងត្រូវកាត់ទុកដោយនិយោជក តាមអត្រាកំណើនដូចតទៅចាប់ពី០រៀល ដល់៨សែន ឬ២០០ដុល្លារ(មិនជាប់ពន្ធ) ពី៨សែន ឬ២០០ដុល្លារ ដល់១លាន២សែន៥ពាន់ ឬ៣០១ដុល្លារ(ជាប់ពន្ថ៥ភាគរយ) ចាប់ពី១លាន២សែន៥ពាន់ ឬ៣០១ដុល្លារ ដល់៨លាន៥សែន ឬ២,១២៥ដុល្លារ(ជាប់ពន្ធ១០ភាគរយ) ចាប់ពី៨លាន៥សែន ឬ២,១២៥ដុល្លារដល់ ១២លាន៥សែន ឬ៣,១២៥ដុល្លារ(ជាប់ពន្ធ១៥ភាគរយ) និងលើសពី១២លាន៥សែន ឬ៣,១២៥ដុល្លារ (ជាប់ពន្ធ២០ភាគរយ)។
សូមបញ្ជាក់ថា យុទ្ធនាការយកពន្ធលើប្រាក់ខែនេះទំនងជាប៉ះពាល់ធ្ងន់ធ្ងរតែទៅលើ ពលរដ្ឋដែលមានការងារធ្វើល្អៗនៅទីប្រជុំជន ជាពិសេស នៅទីក្រុងភ្នំពេញ សៀមរាប ក្រុងព្រះសីហនុ កំពង់ចាម។ល។ បុគ្គលិកក្រុមហ៊ុន បុគ្គលិកអង្គការជាតិ និងអន្តរជាតិ អាចត្រូវបង់ពន្ធលើប្រាក់បៀវត្សរ៍ច្រើន។
តែចំពោះពលរដ្ឋដែលទទួលបានប្រាក់ខែច្រើនរយ ឬពាន់ដុល្លារដែលធ្វើការនៅតំបន់ដាច់ស្រយាលដោយក្រុមហ៊ុនគ្មានចុះបញ្ជីស្នាម ពួកគេពិតជាអាចគេចផុត ពីការបង់ពន្ធ៕
© រក្សាសិទ្ធិដោយ thmeythmey.com
